ހުޅުމާލޭގެ ގޯތިތަކުގައި 10 ފަންގިފިލާއަށް ޢިމާރާތްކުރެވޭގޮތަށް ބަދަލު ގެނެސްފި
-
މީގެ ކުރިން މިކަން އޮންނަނީ ޓެރަސް އާއި އެކު ހަތް ފަންގިފިލާ އަށް އިމާރާތްކުރެވޭ ގޮތައް
-
އައު އުސޫލާއެކު މިހާރު ޓެރަސް އާއެކު 10 ފަންގިފިލާއަށް އިމާރާތް ކުރެވޭނެ
-
ކޮންމެ ދެ ކޮޓަރީގެ އެޕާޓްމަންޓަކަށް 2 ސައިކަލް އިމާރާތް ކުރާނެ ޖާގަ
-
އެއް ކޮޓަރީގެ އެޕާޓްމަންޓް އަކަށް އެއް ސައިކަލު ޕާކް ކުރާނެ ޖާގަ
ހުޅުމާލޭގައި އާއްމުން ދިރިއުޅުމަށް ދޫކޮށްފައިވާ ގޯތިތަކުގައި 10 ފަންގިފިލާއަށް ޢިމާރާތް ކުރެވޭގޮތަށް ހައުސިންގ ޑިވްލޮޕްމަންޓް ކޯޕަރޭޝަން (އެޗްޑީސީ)އިން ޤަވާއިދު ބަދަލު ގެނެސްފިއެވެ. ހުޅުމާލޭގައި ޢާންމު ދިރިއުޅުމަށް މިހާތަނަށް ޢިމާރާތް ކުރުމުގެ ހުއްދަ އޮތީ ޓެރަހާއެކު 7 ފަންގިފިލާއަށެވެ.
ނަމަވެސް އިމާރަތް ކުރުމުގެ ޤަވާއިދަށް ގެނައި ބަދަލާއެކު، ހުޅުމާލެއިން ގެދޮރުވެރިކަމަށް ކަނޑައަޅާފައިވާ ރެޒިޑެންޝަލް ޕްލޮޓްތަކުގައި ގެތައް 10 ފަންގިފިލާއަށް ނުވަތަ 31 މީޓަރަށް ޢިމާރާތް ކުރެވޭނެކަމަށް އެޗްޑީސީން ބުންޏެވެ.
މީގެ އިތުރުން އެޗްޑީސީން ވަނީ ޢިމާރާތުގެ ފަންގިފުލާގެ ޢަދަދު ބެލުމުގައި ބިމުގެ އަޑިއަށް ހުންނަ ބައި ނުވަތަ ބޭސްމަންޓް ނުހިމަނާ ޓެރަހުގެ ދެބައިކުޅަ އެއްބައި ހިޔާކޮށްގެން ބޭނުންކުރެވޭނެގޮތަށް ބަދަލު ގެނެސްފައެވެ. އަލަށް އެކުލަވާލި ޤަވާއިދު ބުނާގޮތުން 15 މީޓަރަށްވުރެ އުސް ޢިމާރާތެއްގައިނަމަ ލިފްޓު ބެހެއްޓުން ލާޒިމްކުރެއެވެ. އަދި ލިފްޓްގެ މެޝިން ރޫމް އެންމެ އުސްވެގެން ބެހެއްޓޭނީ ޓެރަހުން ފެށިގެން ހަތަރު މީޓަރަށްކަމަށްވެސް ޤަވާއިދުގައި ބަޔާންކުރެއެވެ.
އައު ޤަވާއިދުގައި ވަނީ ޢިމާރާތުގައި ހުންނަ އެޕާޓޫމަންޓުގެ ޢަދަދަށްބަލައި ޕާކިން ޖާގަ ކަނޑައެޅުމަށްވެސް ލާޒިމްކޮށްފައެވެ. މިގޮތުން، މަދުވެގެން ދެ ސައިކަލު ޕާކް ކުރާނެ ޖާގަ ކޮންމެ ދެ ކޮޓަރީގެ އެޕާޓްމަންޓަކަށް ކަނޑައަޅަން ޖެހޭނެކަމަށާއި، ކޮންމެ އެއް ކޮޓަރީގެ އެޕާޓްމަންޓް އަކަށް އެއް ސައިކަލު ޕާކް ކުރާނެ ޖާގަ ކަނޑައަޅަން ޖެހޭނެ ކަމަށް އެޗްޑީސީއިން ބުނެއެވެ.
ހުޅުމާލޭގައި ޢާންމުން ދިރިއުޅުމަށް ދޫކޮށްފައިވާ ގޯތި ތަކުގައި ޢިމާރާތްކުރެވޭނެ އެންމެ އުސްމިނަށް ބަދަލު ގެނެސްފައިމިވަނީ، ހުޅުމާލެއާއި ގުޅީފަޅު އަދި ގިރާވަރުފަޅުން ގޯތި ދިނުމަށް ނިންމާ ގޯތި ދޫކުރަން ފަށާފައިވާ ވަގުތެއްގައެވެ.