2 އަހަރެއްހާ ދުވަހުން ގުޅީފަޅުގައި މީހުން އާބަދުކުރެވޭނެކަމަށް ބެލެވޭ: އަކްރަމް

ގުޅީފަޅުގައި ދެ އަހަރެއްހާ ދުވަސްތެރޭގައި މީހުންނަށް އާބާދުވެވޭވަރަށް އަސާސީ ޚިދުމަތްތައް ނިންމުމަކީ ސަރުކާރުގެ ޢަމާޒެއް ކަމަށް މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވެއްޖެއެވެ.

އަކްރަމް މިހެން ވިދާޅުވީ ގުޅީފަޅުން ގޯތި ލިބުނު މީހުންނަށް ގޯތި ކަނޑާ ބިން ހަވާލުކުރުމަށް މިއަދު ކުރިއަށް ގެންދިޔަ މަސައްކަތަށްފަހު މީޑިއާއަށް މަޢުލޫމާތުދެއްވަމުންނެވެ. ގޯތި ކެނޑުމުގެ މަސައްކަތް ނޮވެންމަރުމަހުގެ ފުރަތަމަ ހަފްތާއަށް މުޅިން ނިމެނޭކަމަށް ޕްލޭނިން މިނިސްޓްރީން ވިދާޅުވެއެވެ.

މާލޭގެ ރައްޔިތުންނަށް ޚާއްސަކޮށްގެން ބިންވެރިޔާ ސްކީމްގެދަށުން ޖުމްލަ 9001 ގޯތި ދޫކުރެއެވެ. މީގެތެރެއިން ގުޅީފަޅުން 2218 ގޯތި ދިނުމަށް ނިންމާ، ގޯތި ލިިބުނު މީހުންނާ ލިޔުން ވަނީ ހަވާލުކުރައްވާފައެވެ.

އަދި މިހާރު މިވަނީ، ގުޅީފަޅުން ގޯތި ލިބުނު މީހުންނަށް ބިން ކަނޑާ، ގޯތި ހަވާލުކުރެއްވުމުގެ މަސައްކަތް ފަށްޓަވާފައެވެ. އެގޮތުން މިއަދު ވަނީ 21 ގޯތި ކަނޑާ، ބިންވެރިންނާ ހަވާލުކުރައްވާފައެވެ. އަދި އެސަރަޙައްދުތައް ބަލާލުމުގެ ފުރުޞަތުވެސްވަނީ ދެއްވާފައެވެ.

ގުޅީފަޅުން އެންމެ ފުރަތަމަ ގޯތި ކަނޑާ ހަވާލުކުރައްވާފައިވަނީ މާލޭގެ ރައްޔިތެއްކަމަށްވާ އަޙުމަދު ޝާކިރުއާއެވެ. އެއީ 4 މީހުންގެ ޖޮއިންޓް އެޕްލިކޭޝަނުން ލިބިފައިވާ 2450 އަކަފޫޓުގެ ބިމެވެ. ގޯތީގެ ލިޔުން ހަވާލުކޮށްދެއްވީ މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރގެ ސްޓޭޓް މިނިސްޓަރ އަކްރަމް ކަމާލުއްދީންއެވެ.

ޝާކިރު ބުނީ، އަމިއްލަ ނަމުގައި ގެއެއް ލިބުމަކީ، އަބަދުވެސް ކުރަމުން އައި އެންމެ ބޮޑު އުއްމީދުކަމަށެވެ. ސަރުކާރުން ބިންވެރިޔާ ސްކީމް އިޢުލާންކުރެއްވުމާއެކުވެސް، އެކަން މިސަރުކާރުން ކޮށްދެއްވާނެކަމާމެދު ޝައްކުނުކުރާ ކަމަށް އޭނާ ބުންޏެވެ.

"ބައްޕަގެ ގޯތި އޮތީ. 10 ކުދިން އެބަތިބި. އެހެންވީމަ މިއަދު އަމިއްލަ ގެއެއް ލިބުނީމަ ވަރަށް އުފާކުރަން. ވަރަށް ބޮޑު އުއްމީދެއް މިއީ." އަޙުމަދު ޝާކިރު ބުންޏެވެ.

ޕްލޭނިން މިނިސްޓްރީގެ ސީނިއަރ އެގްޒެކެޓިވް މުޙައްމަދު އާރިފް ވިދާޅުވީ، ފުރަތަމަ ބިން ދޭން ފަށާފައި މިވަނީ، ގުޅީފަޅުން ކުރިން ހިއްކާފައި އޮތް ސަރަޙައްދުން ކަމަށެވެ. އެ ސަރަހައްދުން 450 ގޯތި ދެވޭނެކަމަށް އޭނާ ވިދާޅުވިއެވެ. އިތުރަށް ހިމެނޭ ގޯތިތައް ދޫކުރާނީ މިހާރު ހިއްކަމުންދާ ސަރަޙައްދުންނެވެ. އާރިފް ވިދާޅުވީ ބޮޑު ސަރަޙައްދެއް ހިއްކާ ނިމިފައިވާކަމަށެވެ.

"ނޮވެމްބަރު ފުރަތަމަ ހަފްތާއާއި ހަމައަށް، ބިންތައް ކަނޑާ ދޫކޮށް ނިންމާނަން. އަދި އެމަސައްކަތް ނިމެންވާއިރަށް މިހާރު މިދަނީ ފެނާއި ނަރުދަމާ އަދި މަގުތައް ހެދުންފަދަ އަސާސީ ޚިދުމަތްތައް ޤާއިމުކުރުމުގެ މަސައްކަތް ފެށުމަށް ތައްޔާރުވަމުން." އާރިފް ވިދާޅުވިއެވެ.

ޕްލޭނިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ 2 އަހަރެއްހާ ދުވަސް ތެރޭގައި މީހުން އާބާދުވާން ފެށޭވަރަށް ގުޅީފަޅުގައި ފެނާއި ނަރުދަމާ ފަދަ އަސާސީ ޚިދުމަތްތައް ޤާއިމުކުރެއްވުމުގެ ރާއްވަވާފައިވާކަމަށެވެ. އަދި ބްރިޖުން ގުޅާފަޅު ގުޅާލުމުގެ މަސައްކަތްތައްވެސް އަންނަ އަހަރުގެ ތެރޭގައި ކުރިއަށްގެންދަވާނެކަމަށް އަކްރަމް ވިދާޅުވިއެވެ.

"ފެނާއި ނަރުދަމާ އަންނަ އަހަރު ކުރީކޮޅު ފަށާނެ. މި މަސައްކަތް އަހަރަކުން ނިމޭނެ. މިހާރުވެސް ކަމާގުޅުންހުރި އިދާރާތަކާއެކު ދަނީ މަސައްކަތް ކުރަމުން، އަސާސީ އެހެނިހެން ޚިދުމަތްތައް ޤާއިމުކުރުމުގެ މަސައްކަތް ފެށުމަށް." އަކްރަމް ވިދާޅުވިއެވެ.

ޕްލޭނިން މިނިސްޓްރީން ވިދާޅުވީ، ގޯތި ހެދުމުގެ މަސައްކަތްތައް ކުރިއަށްގެންދެވޭނީ އެޗްޑީސީގެ ދަށުން ހަދާފައިވާ އޮންނަ އިމާރާތްކުރުމާއި ގުޅޭ އުސޫލުގެތެރެއިންކަމަށެވެ.

ބިންވެރިޔާ ސްކީމުން މާލޭގެ 19639 ރައްޔިރުންނަށް ބިން ވަނީ ލިބިފައެވެ. އެއީ 9000އަށްވުރެ ގިނަ ގޯއްޗެވެ.

ގުޅިފަޅުން 4000 އަކަފޫޓު ފިޔަވާ، ދެން ހުރި 7 ސައިޒުގެ ގޯތި ކަނޑާ ދޫކުރާނެއެވެ. ހުޅުމާލެއިން ގޯތި ކެނޑުމުގެ މަސައްކަތްތައްވެސް ގެންދަވަނީ ކުރައްވަމުންނެވެ.