މޯލްޑިވްސް އޮލިމްޕިކް ކޮމިޓީގެ އަހަރީ ޢާއްމު ޖަލްސާ މި މަހުގެ އަށާވީސް ވަނަ ދުވަހު ބާއްވަން ނިންމައިފިއެވެ.
ހޮޓެލް ޖެންގައި ބާއްވުމަށް ހަމަޖެހިފައިވާ މި ޖަލްސާގައި މައިގަނޑު ގޮތެއްގައި އޮންނާނީ މިދިޔަ އަހަރުގެ ރިޕޯޓް ފާސްކުރުމާ މި އަހަރުގެ ބަޖެޓް ފާސްކުރުމެވެ. މިދިޔަ އަހަރު އެމްއޯސީން ވަނީ އޮލިމްޕިކް ހައުސް އަޅަން ނިންމައި ފަންސާސް ހަތް މިލިއަން ރުފިޔާގެ ބަޖެޓެއް ފާސްކޮށްފައެވެ. ނަމަވެސް އެކަން އަދި ފަށާފައިނުވެއެވެ. އޮލިމްޕިކް ކޮމިޓީގެ އަހަރީ ޖަލްސާ މި ބާއްވަނީ ގިނަ އެސޯސިއޭޝަންތަކެއްގެ އިންތިހާބީ ކޮންގްރެސްގައި މައްސަލަޖެހި، ބޮޑެތި މައްސަލަތަކެއް ފެންމަތިވަމުންދާ ދުވަސްވަރެއްގައެވެ. ހައުންސިން މިނިސްޓްރީގެ އެދުމުގެ މަތީން ބެޓްމިންޓަން އިންތިޙާބް ފަސްކޮށްފައިވާއިރު، ނިމިގެންދިޔަ ވޮލީ ބޯލް އެސޯސިއޭޝަންގެ އިންތިޙާބްގައިވެސް މައްސަލަތަކެއް ހުރިކަން ބައެއް ފަރާތްތަކުންވަނީ ފާހަގަކޮށްފައެވެ.