ހުޅުމާލެ ޗެނަލްގައި ޖެޓްސްކީ ފިޔަވައި އިންޖީނުލީ އެއްވެސް އުޅަނދެއް ނުދުއްވޭނެ: އެޗްޑީސީ

ހުޅުމާލޭގެ ފޭސް 1 އަދި ފޭސް 2 ގުޅޭ ސަރަހައްދުގައިވާ ޗެނަލް ސަރަހައްދުގައި ޖެޓްސްކީ ފިޔަވައި އިންޖީނުލީ އެއްވެސް އުޅަނދެއް ބޭނުންކުރުމަކީ މަނާކަމެއް ކަމަށް އެޗްޑީސީން ހާމަކޮށްފިއެވެ.

ހައުސިންގ ޑިވެލޮޕްމަންޓް ކޯރޕަރޭޝަން، އެޗްޑީސީން ހުޅުމާލެ އިރުމަތީ ފަރާތު ފަޅު އަދި ހުޅުމާލެ ފޭސް 1 އަދި ފޭސް 2 ގުޅޭ ސަރަހައްދުގައިވާ ޗެނަލް ބޭނުންކުރުމާއި ގުޅޭގޮތުން ބުނެފައިވަނީ މި ދެ ސަރަަހައްދުވެސް ބޭނުންކުރެވޭނީ ހަމައެކަނި މޫދަށްއެރުމަށްކަމަށެވެ. އަދި މޫދު ކުޅިވަރު ކުޅުމަށާއި އަދި މޫދު ކުޅިވަރުގައި ބޭނުންކުރާ ކެނޯ އަދި ޖެޓްސްކީ ފަދަ ތަކެތި ދުއްވުމަށްކަމަށެވެ.

އެޗްޑީސީން ބުނީ ހުޅުމާލެ ފޭސް 1 އަދި ފޭސް 2 ސަރަހައްދުގެ ޗެނަލްގައި ޖެޓްސްކީ ދުއްވޭނީ ހަމައެކަނި އިރުމަތީކޮޅުން ހުޅަނގުކޮޅަށް ނުވަތަ ހުޅަނގުކޮޅުން އިރުމަތީކޮޅަށް ހުރަސް ކުރުމަށް މަޑު ދުވެލީގައި ކަމަށެވެ.

މިނޫން ގޮތަކަށް އެ ސަރަހައްދު ބޭނުންކުރުމަކީ މަނާކަމެއްކަމަށާއިމ ގަވާއިދާ ޚިލާފުވާ ފަރާތްތަކަށް ސަރުކާރުގެ ކަމާބެހޭ އިދާރާތަކާއި ގުޅިގެން ފިޔަވަޅު އަޅާނެ ކަމަށްވެސް އެޗްޑީސީންވަނީ ބުނެފައެވެ.

ހުޅުމާލެ ފޭސް 1 އަދި ފޭސް 2 ސަރަހައްދުގެ ޗެނަލްއަކީ އޮއިދެމޭ ގޮތަށް ހަދާފައިވާ ތަނެކެވެ. މިތަނުގެ ފުން މިނުގައި 1.85 މީޓަރު އަދި ފުޅާމިނުގައި 50 މީޓަރު ހުރެއެވެ.