އަވަސް ފަރުވާގެ ޚިދުމަތާއެކު ހއ.އަތޮޅުގެ ރައްޔިތުންނަށް ބޮޑު ލުޔެއް

ތިލަދުންމަތީ އުތުރުބުރީ ދިއްދޫގައި ހުންނަ އެއަތޮޅު ހޮސްޕިޓަލުގައި އަވަސް ފަރުވާގެ ޚިދުމަތް ފަށައިފިއެވެ. މި ހިދުމަތް ފަށްޓަވައިދެއްވީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީގެ ސީއީއޯ އާދަމް އާޒިމްއެވެ.

ފަސް ހާހަށްވުރެ ބޮޑު އާބާދީއެއް ދިރިއުޅެމުން އަންނަ ހއ.ދިއްދޫއަކީ އުތުރުގެ ރަށްތަކުގެ ތެރެއިން އެކި ބޭނުންތަކުގައި ކޮންމެ ދުވަހަކުވެސް އެންމެ ގިނަ ބަޔަކު ޒިޔާރަތްކުރާ އެއް ރަށެވެ. ހާއްސަކޮށް ސިއްޙީ ޚިދުމަތް ހޯދުމަށް ޒިޔާރަތް ކުރާ މީހުން ވަރަށް ގިނައެވެ. އަތޮޅުގެ ހުރިހާ ރައްޔިތުން ސިއްހީ ހިދުމަތް ހޯދުމަށް ބަރޯސާވެފައި އޮންނަނީ ދިއްދޫގައި ހުންނަ އަތޮޅު ހޮސްޕިޓަލަށެވެ. ނަމަވެސް އެ ރައްޔިތުންނަށް މިހާތަަނށް އޮތް އެންމެ ބޮޑު އެއް ދައްޗަކީ ދިއްދޫގައި އަވަސް ފަރުވާގެ ހިދުމަތް މީގެ ކުރިން ގާއިމްވެފައި ނެތުމެވެ.

ނަމަވެސް އެ ހޮސްޕިޓަލުގައި އައު ޚިދުމަތްތައް ތަޢާރަފްކޮށް، ޚިދުމަތް ފުޅާކުރުމަށް ސަރުކާރުން ކުރައްވަމުން އަންނަ މަސައްކަތުގެ ދަށުން މިހާރު މިވަނީ އެމަޖެންސީ ނުވަތަ ސިއްޙީ ކުއްލި ފަރުވާއަށް ޚާއްޞާ ތަނެއް ޤާއިމްކޮށް ޚިދުމަތް ފޭން ފަށްޓަވާފައެވެ.

އަވަސް ފަރުވާގެ ހިދުމަތް ފެށުމާއި ގުޅިގެން ޕީއެސްއެމްނިއުސްއަށް މައުލޫމާތު ދެއްވަމުން ދިއްދޫ ހޮސްޕިޓަލްގެ މެނޭޖަރ އޮފް ހެލްތް ސާރވިސް އާދަމް ނަޞީރު ވިދާޅުވީ، ހޮސްޕިޓަލުގައި މުހިންމު އެތަކެއް ހިދުމަތްތަކެއް މިހާރު ފެށިފައިވާކަމަށެވެ. އެހެންނަމަވެސް އެންމެ ބޭނުންތެރި އެއް ޚިދުމަތްކަމަށްވާ އަވަސް ފަރުވާގެ ޚިދުމަތް މީގެ ކުރިން ފެށިގައި ނުވާތީ ރައްޔިތުންގެ ކަންބޮޑުވުން އޮތްކަމަށް އާދަމް ވިދާޅުވިއެވެ. އެހެންނަމަވެސް އަވަސް ފަރުވާ ދިނުމުގައި ބޭނުންވާނެ ހުރިހާ ވަސީލައްތަކާއި ހުރިހާ ކަމެއް ފުރިހަމަ ކުރުމަށް ފަހު ޤާއިމްކުރެވުނު އެތަނާއެކު ރައްޔިތުންގެ އެ ކަންބޮޑުވުމަށް ބޮޑު ޙައްލެއް އަންނާނެކަން އާދަމް ފާހަގަކުރެއްވިއެވެ.

އާދަމް ވިދާޅުވީ އަވަސް ފަރުވާގެ ޚިދުމަތަކީ ހަމައެކަނި ދިއްދޫގެ ރައްޔިތުއްނަށް ލިބިގެން ދިޔަ ޚިދުމަތެއް ނޫންކަމަށެވެ. މިއީ މުޅި އަތޮޅުގެ ރައްޔިތުންނަށް ލިބިގެން ދިޔަ ހިދުމަތެއެއކަން ފާހަގަކުރައްވާ ހޮސްޕިޓަލުގެ މެނޭޖަރ ވިދާޅުވީ، މި ޚިދުމަތާއެކު މުޅި ހއ.އަތޮޅުގެ ހުރިހާ ރައްތަކުގެ ރައްޔިތުންނަށް ލުއި ފަސޭހަވެގެންދާނެކަމަށެވެ.

މި ހޮސްޕިޓަލުގައި އަވަސް ފަރުވާގެ ޚިދުމަތް ދެ އެނދާއެކު ފެށިނަމަވެސް، ކުރިއަށް އޮތްތަނުގައި އެނދުގެ އަދަދު އިތުރުކުރައްވާނެކަމަށް މެނޭޖަރ ވިދާޅުވިއެވެ. އަދި އެމެޖެންސީގެ ހާލަތްތަކުގައި އީއާރު ފުރި އިތުރު އެނދުގެ ހިދުމަތް ބޭނުންވި ކަމުގައިވިއަސް އެ ކަމަށްވެސް ތައްޔާރުވެފައިވާކަމަށް އާދަމް ނަޞީރު ވިދާޅުވިއެވެ.

" އަޅުގަނޑުމެންނަށް ކުއްލި ހާލަތުގައި ހިދުމަތް ދެވޭ ދެ ބޭޑު މީނީ. އެހެންނަމަވެސް ކުއްލި ހާލަތުގައި އިތުރު ބަޔަކު އައިސްފިކަމުގައި ވާނަމަ ޚިދުމަތް ދެވޭނެ އިތުރު ބެޑްތައް އަޅުގަނޑުމެންގެ ވޯޑްގައި ހުންނާނެ. މި ހޮސްޕިޓަލަކީ 27 އެނދުގެ ހޮސްޕިޓަލެއް. އެހެންވީމަ އަޅުގަނޑުމެންގެ ތިން ވޯޑް އެބައިން. އެމަރޖެންސީގައި މީހުން އައިކަމުގައި ވީނަމަވެސް ހިދުމަތް ފޯރުކޮށްދެވޭނެ އެއްވެސް ދަތިކަމެއް ނެތި" އާދަމް ނަސީރު ވިދާޅުވިއެވެ.

އާދަމް ވިދާޅުވީ ދިއްދޫ ހޮސްޕިޓަލުގައި މިކުރު މުއްދަތުގެ ތެރޭގައި އައު އިތުރު ޚިދުމަތްތަކެއް ތައާރަފް ކުރެވިއްޖެކަމަށެވެ. އެގޮތުން އެ ހޮސްޕިޓަލުގައި މުޅިން އަލަށް ލޮލުގެ ޚިދުމަތް، ޑީޓެއިލް އެކްރޭގެ ޚިދުމަތް، އަދި ޑައިލަސިސްގެ ޚިދުމަތް ފުޅާކުރެވިފައިވާކަން އާދަމް ފާހަގަކުރެއްވިއެވެ.

މީގެ އިތުރުން ދަތުގެ ފަރުވާގެ ޚިދުމަތާއި، ފިޒިއަތެރަޕީ، ކަށީގެ އޮޕަރޭޝަންގެ އިތުރުންވެސް، އިތުރު އޮޕަރޭޝަންތައް ދިއްދޫ ހޮސްޕިޓަލުން ކުރެވޭނެކަން އޭނާ ފާހަގަކުރެއްވިއެވެ. އަދި އެ ހޮސްޕިޓަލުގެ ހިދުމަތް ފުޅާކުރުމަށް ގިނަ މަސައްކަތްތަކެއް ކުރެވެމުންދާއިރު، އެތަނުގައި މަސައްކަތް ކުރާ ޑޮކްޓަރުންނާއި މުވައްޒަފުންގެ އަދަދުވެސް ބޮޑުތަނުން އިތުރުކުރެވިފައިވާކަމަށް ހޮސްޕިޓަލުގެ މެނޭޖަރ ވިދާޅުވިއެވެ.

"ހޮސްޕިޓަލްގެ ޑޮކްޓަރުންގެ އަދަދު ވަރަށް ބޮޑުތަނުން އިތުރު ކުރެވިއްޖެ. ކުރީގައި ތިބޭނީ ސްޕެސަލިސްޓް އެންމެ ޑޮކްޓަރެއް. މިހާރު ވައްތަރަކުން ދެ ޑޮކްޓަރުން ތިބޭނެ. ހަމަ އެގޮތައް އަޅުގަނޑުމެންގެ މުވައްޒަފުންގެ އަދަދުވެސް ވަރަށް ބޮޑުތަނުން އިތުރުވެގެން ހިނގައްޖެ. އަދި އަޅުގަނޑުމެން ހިދުމަތް ފުޅާ ކުރުމަށްޓަކައި ހޮސްޕިޓަލުގެ އޯޕީޑީ ނުވަތަ ސްޕެސަލިސްޓު ޑޮކްޓަރުންގެ ހިދުމަތް ދެ ދަންފަޅިއަށް ފެށުމަށް މި ދަނީ ތައްޔާރުވަމުން" ނަސީރު ވިދާޅުވިއެވެ.

ދިއްދޫގައި ހުންނަ އަތޮޅު ހޮސްޕިޓަލުން މީގެ ކުރިން ދުވާލެއްގެ މައްޗައް ހިދުމަތް ހޯދާ މީހުންގެ އަދަދު އުޅެނީ 250 ނުވަތަ 300 މީހުންނެއެވެ. މަހެއްގެ މައްޗައް 2000ހާއެއް މީހުން ދިއްދޫ ހޮސްޕިޓަލުން ހިދުމަތް ހޯދާކަމަށް ދިއްދޫ ހޮސްޕިޓަލުން ވިދާޅުވިއެވެ. އެހެންނަމަވެސް ޤައުމީ ދަތުރުފަތުރުގެ ނިޒާމު، އާރްޓީއެލްގެ ފެރީއާއެކު ހޮސްޕިޓަލުން ހިދުމަތް ހޯދާ އެއަދަދު ބޮޑުތަނުން އިތުރުވެފައިވާކަމަށް ދިއްދޫ ހޮސްޕިޓަލުން ފާހަގަކުރައްވައެވެ. ދިއްދޫ ހޮއްޕިޓަލުން ވިދާޅުވީ މިހާރު މަހެއްގެ މައްޗައް 3 ހާހަށްވުރެ ގިނަ މީހުން ޚިދުމަތް ހޯދާކަމަށެވެ.

ސިއްޙީ ޚިދުމަތްތައް ލާމަރުކަޒީ ކުރުމުގެ މަސައްކަތުގެ ދަށުން ރާއްޖޭގެ އެކި ކަންކޮލޫތަކުގެ އަތޮޅު ހޮސްޕިޓަލްތައް އިތުރަށް ތަރައްޤީކުރުމަށް ސަރުކާރުން އަންނަނީ މަސައްކަތްކުރަމުންނެވެ.

އެގޮތުން ދިއްދޫގައި ޒަމާނީ އައު ޚިދުމަތްތަކާއެކު 55 އެނދުގެ އައު ހޮސްޕިޓަލެއް އެޅުމަށް ސަރުކާރުން ވަނީ ނިންމަވާފައެވެ.