ފޯނަށް އަންނަ ކޯޑެއް ހޯދަންކަމަށް ބުނެ އޮޅުވާލަނީ؛ 48 ގަޑިއިރުގެތެރޭ 6 މައްސަލަ
-
މިގޮތަށް ފައިސާ ހޯދަމުންދަނީ ވަރަށް ހީލަތްތެރިކަމާއެކުކަން ފުލުހުން ފާހަގަކުރޭ
-
މިދިޔަ 48 ގަޑިއިރުގެ ތެރޭގައި 35000 އަށްވުރެ ގިނަ ރުފިޔާ ގެއްލިފައިވޭ
-
އަމިއްލަ ނަމްބަރަށް އަންނަ އޯޓީޕީ ކޯޑު އެހެން ފަރާތަކާއި ހިއްސާނުކުރުމަށް ފުލުހުން އެދޭ
އޮޅުވާލައިގެން ފައިސާ ހޯދުމަށް އައު އުކުޅުތައް ބޭނުންކުރަމުންދާކަމަށާއި، އަދި މިދުވަސްވަރު އެފަދަ މައްސަލަތައް އިތުރުވެފައިވާކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ މިހާރަކަށް އައިސް ފޭސްބުކް ހެކްކޮށްގެން ޕާސްވޯޑް ރީސެޓްކުރަން އެހީތެރިކަން ހޯދަންކަމަށް ބުނެ އޮޅުވާލައިގެން ފައިސާ ހޯދުމަށް އެކަންކަން ކުރާ ފަރާތްތަކުން ވަރަށް ގިނަ މަސައްކަތްތަކެއް ކުރަމުންދާކަމަށެވެ.
ފޭސްބުކް ހެކްކޮށްފިކަމަށް ބުނެ އޮޅުވާލައިގެން ފައިސާ ހޯދަމުންދަނީ ވަރަށް ހީލަތްތެރިކަމާއެކުކަން ފުލުހުން ފާހަގަކުރެއެވެ. އެގޮތުން ބައެއް މީހުންނަށް ގުޅުމަށްފަހު އެމީހަކު ގެންގުޅޭ ނަންބަރަކީ މީގެކުރިން އެ ގުޅި މިހާ ގެންގުޅުނު ނަމްބަރުކަމަށް ބުނާކަމަށާއި، އެއަށްފަހު އޭނާގެ ފޭސްބުކް ހެކްކޮށްގެން ޕާސްވޯޑް ރީސެޓްކުރުމަށް ބޭނުންވާ ކޯޑް ދަނީ އެ ނަމްބަރަށްކަމަށް ބުނާކަމަށް ފުލުހުން ބުނެއެވެ. އަދި އެގޮތަށް އޮޅުވާލައިގެން ހޯދާ ކޯޑަކީ ބައެއް ފަރާތްތަކުގެ އިންޓަނެޓް ބެންކިންގެ ތަފްސީލްތައް ހިމެނޭ އީމެއިލްގެ ކޮންޓްރޯލް ލިބޭ ކޯޑެކެވެ.
މިދިޔަ 48 ގަޑިއިރުގެ ތެރޭގައިވެސް މިފަދަ 6 މައްސަލަ ހުށަހަޅާފައިވާކަމަށެވެ. އަދި އެ މައްސަލަތަކުގައި ހިމެނޭ ފައިސާގެ އަދަދު 35000 އަށްވުރެ ގިނަކަމަށްވެސް ފުލުހުން ވިދާޅުވެއެވެ.
ފޭސްބުކް އެކައުންޓް ހެކް ކޮށްގެން ފައިސާ ހޯދާ މައްސަލަތަކެއް. ސަމާލުވޭ!https://t.co/sG47aeUfaT pic.twitter.com/h5io1hrXm3
— Maldives Police (@PoliceMv) October 4, 2023
މި މައްސަލަތައް އިތުރުވަމުންދާތީ ފުލުހުން ވަނީ އަމިއްލަ ނަމްބަރަށް އަންނަ އޯޓީޕީ ކޯޑު އިތުރު އެހެން މީހަކާއި ހިއްސާނުކުރުމަށް އިލްތިމާސްކޮށްފައިވެއެވެ. އަދި މީސްމީޑިއާގެ ވަސީލަތްތަކާއި އަދި އެހެން ގޮތްގޮތުންވެސް އޮޅުވާލައިގެން ފައިސާ ހޯދުމަށް ވާހަކަ ދައްކާ މީހުންގެ ކިބައިން ސަލާމަށްވެ ރައްކާތެރިވެތިބުމަށް ސަމާލުކަން ދިނުމަށްވެސް ފުލުހުން އިލްތިމާސްކުރެއެވެ. މީގެއިތުރުން ކާކުކަން ޔަގީންކުރުމަށްފަހު ނޫނީ ފައިސާގެ އެއްވެސް މުއާމަލާތެއް ނުހިންގުމަށްވެސް ފުލުހުން ބާރު އަޅުއްވައެވެ.
އޮޅުވާލައިގެން ފައިސާ ހޯދުމުގެ މައްސަލަތައް ރާއްޖޭގައި އިތުރުވަމުންދާތާ އަހަރުތަކެއްވިޔަސް އެކަމަށް އެެދެވޭ ހައްލެއް މިހާތަނަށް ހޯދިފައެއް ނުވެއެވެ. އަދި މީގެކުރިން ހަމައެކަނި ފޯނުކޮށްގެން މިފަދަ ހީލަތްތައް ހަދަމުންދިޔަނަމަވެސް، މިއަދު އެ މަސައްކަތް ފުޅާވެ، ކުށްވެރިން ދަނީ ސޯޝަލް މީޑިއާގެ އެކި ޕްލެޓްފޯމްތަކުގައި އޮޅުވާލައިގެން ފައިސާ ހޯދުމުގެ މަސައްކަތްކުރަމުންނެވެ،