އައްޑޫ ސިޓީން ގޯތި ލިބުނު މީހުންނަށް އަންނަ މަހު ބިން ހަވާލުކުރަން ފަށާނަން: މޭޔަރ

އައްޑޫ ސިޓީން ގޯތި ލިބުނު މީހުންނާއި ބިން ހަވާލުކުރުުމުގެ މަސައްކަތްތައް އަންނަ މަހުގެތެރޭގައި ފަށްޓަވާނެ ކަމަށް އައްޑޫ ސިޓީގެ މޭޔަރ އަލީ ނިޒާރު ވިދާޅުވެއްޖެއެވެ.

އަހަރުތަކަކަށްފަހު އައްޑޫ ސިޓީން ގޯތި ދޫކުރުމަށް ހުޅުވާލީ މިއަހަރުގެ ޖެނުއަރީމަހުއެވެ. އެފަހަރު އައްޑޫ ސިޓީގެ އެކި ރަށްތައް ހިމެނޭހެން 1000ގޯއްޗަށް ހުޅުވާލިއެވެ. އައްޑޫ ސިޓީން ގޯތި ލިބޭ މީހުންގެ ލިސްޓް ނެރެފައިވަނީ އޯގަސްޓްމަހުގެ ތެރޭގައެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން އައްޑޫ ސިޓީގެ މޭޔަރ އަލީ ނިޒާރު ވިދާޅުވީ، ގޯއްޗަށް ހުޅުވާލި ފުރުޞަތުގައި 4،160 ފޯމު ހުށަހެޅި ކަމަށެވެ. މީގެ ތެރެއިން 4052 މީހެއްގެ ޝަރުތު ހަމަވެއެވެ.

މޭޔަރ ވިދާޅުވީ، މިހާރު ކުރަމުންދަނީ ގޯތި ހަވާލުކުރެއްވުމުގެ ފަހުގެ މަރުހަލާގެ މަސައްކަތްތައްކަމަށެވެ. އަންނަ މަހުގެ ތެރޭގައި ބިންތައް ހަވާލުކުރަން ފަށްޓަވާނެކަމަށްވެސް މޭޔަރ އަލީ ނިޒާރު ވިދާޅުވިއެވެ.

އެކި ފިޔަވަހިތަކަށް ބަހާލައިގެން ކުރިއަށްގެންދާ މިމަސައްކަތުގެ ތެރެއިން އެންމެ ފުރަތަމަ ދޭނީ، މިހާރު އިޢުލާންކޮށްފައިވާ 4 އަވަށުން ޖުމްލަ 1000 ގޯއްޗެވެ. އެއީ ހިތަދޫން 500 ގޯތި، ފޭދޫން 300 ގޯތިި ހުޅުދޫން 100 ގޯތި އަދި މީދޫން 100 ގޯއްޗެވެ.

މޭޔަރ ވިދާޅުވީ މިދޫކުރާ 1000 ގޯއްޗާއެކުވެސް އައްޑޫގެ ބޯހިޔާވަހިކަމުގެ މައްސަލަ އެއްކޮށް ޙައްލު ނުވާނެކަމަށެވެ. އެހެންކަމުން ބޯހިޔާވަހިކަން ބޭނުންވެގެން ދެން ހުށައެޅި މީހުންނަށް، މިހާރު އައްޑޫގައި ހިއްކާފައިވާ ސަރަޙައްދުން ގޯތި ދެއްވުމަށް ލޭންޑް ޔޫސް ޕްލޭންގައި ހިމަނުއްވާނެކަމަށެވެ. އައްޑޫ ސިޓީގެ ބިން ހިއްކުމުގެ ބިޔަ މަޝްރޫޢުގެ މަސައްކަތް މިހާރު ވަނީ ނިންމާލާފައެވެ.

މޭޔަރ ވިދާޅުވި އައްޑޫގެ ބޯހިޔާވަހިކަމުގެ މައްސަލައަށް ޙައްލު ގެނައުމަށް، ފްލެޓްވެސް ތަރައްޤީކުރަން ޖެހޭކަމަށެވެ. މިވަގުތު އައްޑޫގައި 275 ފްލެޓް ތަރައްޤީކުރުމުގެ މަޝްރޫޢެއްވެސް ސަރުކާރުން އަންނަނީ ކުރިއަށްގެންދަމުންނެވެ. މޭޔަރ ނިޒާރު ވިދާޅުވީ، އައްޑޫގެ ބޯހިޔާވަހިކަމުގެ މައްސަލަ ޙައްލުވެގެން އައުމަށް 1000އެއްހާ ފްލެޓްވެސް ބޭނުންވާކަމަށެވެ. ބިން ހިއްކުމުގެ މަޝްރޫޢުއާއެކު ބޯހިޔާވަހިކަމަށް މުހިންމު މަސައްކަތްތަކެއް ޕްލޭންކޮށްފައިވާ ކަމަށް މޭޔަރ ވަނީ ވިދާޅުވެފައެވެ.

މުޅި އައްޑޫ ސިޓީއަށް ބަލާއިރު ހިތަދޫން އެންމެ ފަހުން ގޯތި ދޫކޮށްފައިވަނީ މީގެ 21 އަހަރު ކުރިން 2002ވަނަ އަހަރުއެވެ. އަދި، ހުޅުދޫއާއި މީދޫންވެސް ގޯތިދޫނުކުރާތާ 15 އަހަރުވެފައިވާއިރު، ފޭދޫން ގޯތި ދޫނުކުރާތާ 25 އަހަރު ވަނީ ވެފައެވެ.