ގޯއްޗާއި ފްލެޓަށް އެދި ދެވަނަ ބުރުގައި 40000 ފޯމު

ގެދޮރުވެރިޔާ އާއި ބިންވެރިޔާ ސްކީމްގެ ދެވަނަ ފިޔަވައްސަށް 40000އަށްވުރެ ގިނަ ފޯމު ހުށައަޅާފައިވާ ކަމަށް މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރއިން ވިދާޅުވެއްޖެއެވެ. މިއީ ފުރަތަމަ ބުރަށްވުރެ، 5000 ފޯމު އިތުރު އަދަދެކެވެ.

މާލެ ސަރަޙައްދުގައި ކުރިއަށްގެންދާ ބޯހިޔާވަހިކަމުގެ މަޝްރޫޢުގެ ދެވަނަ ފިޔަވަހީގައި ސަރުކާރުން ހުޅުވާލީ، 4000 ގޯއްޗާއި 6000 ފްލެޓަށް ކުރިމަތިލުމަށެވެ.

ގޯއްޗާއި ފްލެޓަށް ކުރިމަތިލުމަށް ދިން ވަގުތު، މިއަދު 15:00އާއި ހަމައަށް ވަނީ ހަމަވެފައެވެ.

ހައުސިން މިނިސްޓްރީން ވިދާޅުވީ ވަގުތު ހަމަވިއިރު، ބިންވެރިޔާ ސްކީމްގެ ދަށުން ގޯއްޗަށް އެދި 19347 މީހުން ފޯމު ހުށައަޅާފައިވާކަމަށެވެ. އަދި ގެދޮރުވެރިޔާ ސްކީމްގައި ފްލެޓަށް އެދި، 21247 މީހުން ފޯމު ހުށައަޅާފައިވާކަމަށެވެ.

މި ދެ ސްކީމަށް ފޯމު ހުށައެޅި މީހުންގެ ޖުމްލަ އަދަދު 40594އަށް އަރައެވެ.

މިފަހަރުވެސް ވަނީ އެކަކަށްވުރެ ގިނަ މީހުންނަށް ބައިވެރިވެވޭގޮތަށް، ޖޮއިންޓްކޮށް ފޯމު ހުށައެޅުމުގެ ފުރުޞަތުވެސް ދީފައެވެ. ޖޮއިންޓް އެޕްލިކޭޝަން ނުވަތަ، އެކަކަށްވުރެ ގިނަ މީހުންގެ ނަމުގައި ހުށަހަޅާ އެޕްލިކޭޝަނުގައި އިތުރަށް ބައިވެރިވާ ކޮންމެ މީހަކަށް 400 އަކަފޫޓު ގޯތީގެ ބޮޑުމިނަށް އިތުރު ކުރެވޭނެއެވެ. 7 މީހުންނަށް ވުރެ ގިނަ މީހުން ޖޮއިންޓް އެޕްލިކޭޝަނުގައި ބައިވެރިވާނަމަ، އެ އެޕްލިކޭޝަނަށް ލިބޭނީ، ޖުމުލަ 4,000 އަކަފޫޓެވެ.

މި ސްކީމްގެ ދަށުން ގޯތި ދޫކުރުމަށް ހަމަޖެހިފައިވަނީ ގިރާވަރު އުތުރުފަޅުންނެވެ. އަދި ގޯތި ދޫކުރަން 5,525,000 އަކަފޫޓުގެ ސަރަހައްދެއް ކަނޑައަޅާފައިވެއެވެ. މި ފަހަރު ދޫކުރާ ގޯތީގެ އެންމެ ކުޑަ ސައިޒަކީ، 1,250 އަކަފޫޓެވެ.

ބިންވެރިޔާ އާއި ގެދޮރުވެރިޔާ ސްކީމްގެ ދެވަނަ ބުރެއް ހުޅުވާލާފައިވަނީ، ފުރަތަމަ ފިޔަވަހީގައި އެކަމަށް އެދުނު މީހުންގެ އަދަދު އިތުރުވުމުގެ ސަބަބުން، ބޯހިޔާވަހިކަމަށް އާއްމު ރައްޔިތުން ބޭނުންވެފައިވާ މިންވަރަށް ރިޢާޔަތްކޮށްކަމަަށް ޕްލޭނިން މިނިސްޓްރީން ވިދާޅުވެއެވެ.

މިފަހަރު ހުޅުވާލީ މިދެބަޔަށްވެސް މާލޭގައި ދިރިއުޅޭ އެހެން ރަށްރަށުގެ މީހުންނަށްވެސް ކުރިމަތިލެވޭގޮތަށެވެ. އެގޮތުން މާލޭގައި ދިރިއުޅޭތާ 20 އަހަރު ވެފައިވާ ކޮންމެ މީހަކަށްވެސް ގޯއްޗަށް އެދި ފޯމު ހުށައެޅުމުގެ ފުރުޞަތު ވަނީ ދީފައެވެ. އަދި މާލޭގައި ދިރިއުޅޭތާ 15 އަހަރުވެފައިވާ މީހުންނަށް ފްލެޓަށް ހުށައެޅުމުގެ ފުރުޞަތު ދީފައިވެއެވެ.

ފޯމު ހުށައެޅުން ކުރިަށްގެންދިޔައީ، "ގެދޮރުވެރިން" ޕޯޓަލް މެދުވެރިކޮށް އޮންލައިންކޮށެވެ.

ބޯހިޔާވަހިކަމުގެ މަޝްރޫޢުގެ ފުރަތަމަ ފިޔަވަހީގައި ސަރުކާރުން ހުޅުވާލީ 5000ގޯއްޗާއި، 4000 ފްލެޓަށެވެ. ބިންވެރިޔާ ސްކީމްގައި ވަކިވަކިން އަދި ޖޮއިންޓް އެޕްލިކޭޝަންތައް ހިމެނޭހެން 15164 ފޯމު ހުށައަޅާފައިވެއެވެ.

ފުރަތަމަ ބުރުގައި"'ގެދޮރުވެރިޔާ' ސްކީމުގެ ދަށުން ފުލެޓަށް އެދި ޖުމްލަ 20،697 މީހުން ފޯމު ހުށަހަޅާފައިވެއެވެ. އޭގެ ތެރޭގައި ތިން ކޮޓަރީގެ އެޕާޓްމަންޓަށް 14،489 މީހުން އަދި ދެ ކޮޓަރީގެ އެޕާޓްމަންޓަށް 6،208 މީހުން ފޯމް ހުށައެޅިއެވެ.

ފްލެޓް ލިބޭ މީހުންގެ ދާއިމީ ލިސްޓްވެސް ވަނީ އާއްމުކުރައްވާފައެވެ. ނަމަވެސް އަދި ފްލެޓް ހަވާލުކުރަން ފަށާފައެއް ނުވެއެވެ. ބިންވެރިޔާ ސްކީމުގެ ދަށުން ފުރަތަމަ ބުރުގައި ގޯތި ލިބުނު މީހުންނަށް ސަރުކާރުން މިހާރުވަނީ ބިން ހަވާލުކުރައްވަން ފަށްޓަވާފައެވެ.