ދިގުލައިގެންގޮސްފައިވާ ޖާހު ފްލެޓްތައް ނިންމަން އެޗްޑީސީން ހަވާލުވެއްޖެ

މަސައްކަތް ނުނިމި ދިގުލައިގެންގޮސްފައިވާ ޖާހު އިންވެސްޓްމަންޓްގެ ފްލެޓްތައް، ނިންމުމުގެ މަސައްކަތް އެޗްޑީސީގެ ބެލުމުގެދަށުން އަލުން ފަށައިފިއެވެ.

އެޗްޑީސީން އަމިއްލަ 6 ކުންފުންޏަކާއި ހަވާލުކޮށްގެން ހުޅުމާލެ ފުރަތަމަ ފިޔަވަހީގައި ކުރިއަށްގެންދާ ޕްރޮޖެކްޓްގައި، ޖާހު އިންވެސްޓްމަންޓާއި ހަވާލުކޮށްގެން ކުރިއަށްގެންދަނީ "ދަ ގަރޑަންސް" ޕްރޮޖެކްޓްގެ މަސައްކަތެވެ. މިލަގްޒަރީ ހައުސިން ޕްރޮޖެކްޓްގައި 83 އެޕަރޓްމަންޓް ހިމެނެއެވެ.

މި މަޝްރޫޢުގެ މަސައްކަތް އެ ކުންފުންޏާއި ހަވާލުކޮށްގެން ފެށީ 2017ވަނަ އަހަރެވެ. އެގްރިމެންޓްގެ މުއްދަތު ހަމަވެ، އިތުރު ފުރުޞަތު ދިނުމަށް ފަހުގައިވެސް މިހާތަނަށް މިޕްރޮޖެކްޓް ފުރިހަމަކޮށްފައެއް ނުވެއެވެ.

"ދަ ގަރޑަންސް" ޕްރޮޖެކްޓްގައި ހިމެނޭ އެޕަރޓްމަންޓްތައް ވިއްކާ، އަދި އެތަންތަން ގަތް މީހުން ވަނީ ފައިސާވެސް ދައްކާފައެވެ. އަދި މަސައްކަތްތައް ލަސްވުމުގެ ޝަކުވާއާއި ކަންބޮޑުވުން އެ ފަރާތްތަކުން އަންނަނީ ފާޅުކުރަމުންނެވެ.

މިކަމާއި ގުޅިގެން ހައުސިން ޑިވެލޮޕްމަންޓް ކޯޕަރޭޝަނުން މިވަނީ، މި މަޝްރޫޢު އެކޯޕަރޭޝަން ބެލުމުގެދަށުން ނިންމުމުގެ މަސައްކަތް ފަށާފައެވެ. އެޗްޑީސީން ހަވާލުވެފައިވަނީ މިހާރު ނުނިމި ހުރި މަސައްކަތްތައް އަވަހަށް ނިންމުމަށެވެ. އެޗްޑީސީން ބުނީ މިހާރު ކުރިއަށްދާ މަސައްކަތުގައި، 9 ފަންގިފިލާގެ ފިނިޝިން މަސައްކަތްތައް ހިމެނޭކަމަށެވެ. އޭގެތެރޭގައި ޕްލާސްޓަރިން، ޕުޓީގެ މަސައްކަތް، މުށި އަދި ސީލިންގް ކުރުމުގެ މަސައްކަތް ދަނީ ހިންގަމުންނެވެ.

މި މަސައްކަތް 6 މަސްދުވަހުގެ ތެރޭގައި ނިންމުމަށް ވަނީ ހަމަޖެހިފައެވެ. އެޗްޑީސީން ބުނީ ހުރިހާ މަސައްކަތެއް އަންނަ އަހަރުގެ ފެބްރުއަރީ މަހަށް ނިންމާނެކަމަށެވެ. މި ޕްރޮޖެކްޓްގައި ހިމެނެނީ 2 ކޮޓަރިއާއި 3 ކޮޓަރީގެ އެޕަރޓްމަންޓްތަކެވެ.