އެއްވެސް ޤައުމެއްގެ ސިފައިން ރާއްޖޭގައި ތިބުމަށް ފުރުޞަތު ނުދޭނަން: ޑރ.މުޢިއްޒު

އެއްވެސް ޤައުމެއްގެ ސިފައިން ރާއްޖޭގައި ތިބުމަށް ފުރުޞަތު ނުދެއްވާނެކަމަށް އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ބްލޫމްބަރގު ޓީވީއަށް ދެއްވި ޚާއްސަ ބަސްދީގަތުމެއްގައެވެ.

އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވީ، ރާއްޖޭގެ މިނިވަންކަމަށް އަސަރުކުރާނެ އެއްވެސް ކަމަކަށް އެމަނިކުފާނުގެ ވެރިކަމުގައި ފުރުޞަތު ނުދެއްވާނެކަމަށެވެ.

ރާއްޖޭގައި ތިބި އިންޑިއާ ސިފައިން ފޮނުވާލުމަށް ކުރަމުންދާ މަސައްކަތްތަކާއި ގުޅޭގޮތުން ބްލޫމްބަރގު ޓީވީއިން ކުރި ސުވާލަށް ޖަވާބު ދެއްވަމުން އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވީ، އެއްވެސް ޤައުމެއްގެ ސިފައިން ރާއްޖޭގައި ތިބުމަށް ދިވެހިން ބޭނުން ނުވާ ކަމަށެވެ. އަދި އިންޑިއާ ސިފައިން ރާއްޖެއިން ފޮނުވާލުމަށްޓަކައި މަޝްވަރާ ބައްދަލުވުންތައް މިހާރުވެސް އިންޑިއާގެ ހައި ކޮމިޝަނަރ މުނޫ މަހާވަރާއެކު ކުރިއަށްދާކަމަށާއި، މި މަޝްވަރާތައް ކާމިޔާބުކަމަށްވެސް ޑރ. މުޢިއްޒު ވިދާޅުވިއެވެ.

ޑރ. މުޢިއްޒު ވިދާޅުވީ، ރާއްޖެއިން އަބަދުވެސް ހުރިހާ ޤައުމަކާއެކު ވަރަށް ޤާތްކޮށް މަސައްކަތްކުރައްވާނެ ކަމަށާއި، އެއްވެސް ޤައުމަކާއި ވަކި ހާއްސަ ގުޅުމެއް ނުބާއްވާނެ ކަމަށެވެ.

" ޕްރޯ ޗައިނާ މީހެއްގެ ގޮތުގައި ލޭބަލްވެފައި އޮތް ނަމަވެސް އަޅުގަނޑު ޕްރޯ ޗައިނާއެއް ނޫން، ރާއްޖެއިން ހުރިހާ ޤައުމަކާއި އެކުވެސް ގާތްކޮށް މަސައްކަތްކުރާނެ، ް، ރާއްޖެއަކީ ކުޑަ ޤައުމެއް، ރާއްޖެއިން ބޭނުމެއް ނުވޭ، ދުނިޔޭގެ ބޮޑެތި ޤައުމުތަކުގެ ކޯޅުންގަނޑުގެތެރެއަށް ވަންނާކަށް." ޑރ. މުޢިއްޒު ވިދާޅުވިއެވެ.

President-elect Mohamed Muizzu says he intends to work closely with all countries. Maldives is too small to take sides in a “geopolitical rivalry between bigger nations,” he says https://t.co/nT5YTWiNej pic.twitter.com/6DuEyzyddS

— Bloomberg TV (@BloombergTV) October 27, 2023

ޓެރެރިޒަމާއި ދީނީގޮތުން ހައްދުފަހަނަ އަޅާ ދިޔުމާއި ގުޅޭގޮތުން ކުރި ސުވާލަކަށް ޖަވާބުދެއްވަމުން ޑރ. މުޢިއްޒު ވިދާޅުވީ، މިއީ ދުނިޔޭގެ ހުރިހާ ޤައުމަކަށްވެސް ކުރިމަތިވެފައިވާ މައްސަލައެއް ކަމަށާއި، މިކަމަށް ރާއްޖޭގައި ހައްލު ގެނައުމަށް އާއްމުން ހޭލުންތެރިކުރުވުމަށް ގިނަ މަސައްކަތްތަކެއް ކުރައްވާނެ ކަމަށެވެ.

"ރާއްޖެއަކީ އާބާދީ ކުޑަ ޤައުމެއް، އާއްމުން ހޭލުންތެރިކޮށް، އިސްލާމްދީނަކީ ސުލްހަވެރި ދީނެއްގައި ކިޔައިދީ، ހަރުކަށި ފިކުރު ގެންގުޅޭ ފަރާތްތައް އަނބުރާ މުޖުތަމައުއަށް ގެނެސްދިނުމަށް މަސައްކަތްތައް ކުރާނަން." ޑރ. މުޢިއްޒު ވިދާޅުވިއެވެ.

އިންތިޚާބީ ރައީސްގެ މި ބަސްދީގަތުމުގައި އިސްރާއީލުގެ ހައްދުފަހަނައަޅާފައިވާ ޔަހޫދީ ސިފައިން ޣައްޒާއަށް ދެމުންގެންދާ އުދުވާނީ ހަމަލާތަކާއި ގުޅޭގޮތުންވެސް ވަނީ އަލިއަޅުވާލައްވާ ވާހަކަފުޅުދައްކަވާފައެވެ. ޑރ. މުޢިއްޒު ވިދާޅުވީ، ރާއްޖެއިން އަބަދުވެސް ތިބޭނީ ފަލަސްތީނު ރައްޔިތުންނާއެކު ކަމަށެވެ. އަމިއްލަ މިނިވަން ޤައުމެއްގެ ގޮތުގައި ފަލަސްތީނު އޮތުމުގެ ހައްޤު އެޤައުމުގެ ރައްޔިތުންނަށް އެބައޮތްކަން ފާހަގަކުރައްވާ ޑރ. މުޢިއްޒު ވިދާޅުވީ، މިކަމުގައި ފަލަސްތީނުން ބޭނުންވާ އެހީތެރިކަން ރާއްޖެއިން ދެމުންދާނެ ކަމަށެވެ.

މިއަހަރު ބޭއްވި ރިޔާސީ އިންތިޚާބު ކާމިޔާބުކުރެއްވިފަހުން ޑރ. މުޙައްމަދު މުޢިއްޒު ގެންދަވަނީ ރާއްޖެއިން ބޭރުގެ ބޮޑެތި މީޑިއާތަކާއި ނިއުސް އެޖެންސީތަކަށް ޚާއްސަ ބަސްދީގަތުންތަކެއް ދެއްވަމުންނެވެ. އެގޮތުން އެމަނިކުފާނު މީގެ ކުރިން ވަނީ އަލްޖަޒީރާއާއި، ޗައިނާގެ ޒިންހުއާ ނިއުސް އޭޖެންސީއާއި، ބީ.ބީ.ސީއަށް ޚާއްސަ ބަސްދީގަތުންތަކެއް ދެއްވާފައެވެ.