ފައިސާ ފޮނުވުމުގެ ޚިދުމަތުގެ ތެރެއިން ރާއްޖެއިން ބޭރަށް 50 މިލިއަނެއްހާ ޑޮލަރު

މިދިޔަ އަހަރުތެރޭ ދިވެހިން އެންމެ ގިނައިން ފައިސާ ފޮނުވާފައިވަނީ އިންޑިއާއަށާއި ފިލިޕީންސްއަށްކަމަށް މަރުކަޒީ ބޭންކުގެ ރިޕޯޓަކުން ދަައްކައިފިއެވެ.

މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ނެރެފައިވާ ޕޭމަންޓްސް ބުލެޓިން ރިޕޯޓުގައިވަނީ ރާއްޖޭގެ ޕޭމަންޓު ނިޒާމަށް ފާއިތުވި 4 އަހަރުތެރޭގައި އައިސްފައިވާ ބަދަލުތަކާއި، ފައިސާ ދެއްކުމުގައި ބޭންކުތަކުން ދޭ ތަފާތު ހިދުމަތްތައް އާއްމުން ހޯދާ މިންވަރުގެ ތަފާސް ހިސާބުތައް ހިމަނާފައެވެ. އެގޮތުން ބޭންކު އެކައުންޓުތައް ހުޅުވާ މިންވަރު އަހަރުން އަހަރަށް އިތުރުވެފައިވާ މިންވަރާ، ބޭންކުތައް މެދުވެރިކޮށް ފައިސާގެ މުއާމަލާތްތައް ހިންގާ މިންވަރުގެ އިތުރުން ރެމިޓެންސްގެ ޙިދުމަތަަކާއި ގުޅޭ ތަފާސް ހިސާބުތައް އެމްއެމްއޭގެ ރިޕޯޓުގައި ހިމަނާފައިވެއެވެ.

ބޭންކުތަކުގެ އިތުރުން ރާއްޖޭގައި ރެމިޓެންސްގެ ޙިދުމަތް ދެމުންދަނީ 2 ކުންފުންޏަކުންނެވެ. އެމްއެމްއޭއިން ހާމަކުރާގޮތުގައި 2020ވަނަ އަހަރު ރެމިޓެންސްގެ ޙިދުމަތަކަށް އޮތް ޑިމާންޑު ބޮޑުވެގެން ދިޔަ ނަމަވެސް 2019 އިން 2022ވަނަ އަހަރާއި ހަމައަށް މި ޙިދުމަތަށް އޮތް ޑިމާންޑުވަނީ 35 އިންސައްތަ ދަށްވެފައެވެ. މިއީ ފައިސާގެ އަދަދުން ބަލާނަމަ 80 މިލިއަން ޑޮލަރުން 52 މިލިއަން ޑޮލަރުގެ ދަށްވުމެކެވެ.

މިދިޔަ އަހަރުތެރޭ ރެމިޓެންސްގެ ގޮތުގައި ރާއްޖެއިން 49 މިލިއަން ޑޮލަރު އެކި ޤައުމުތަކަށް ފޮނުވާފައެވެ. މިއީ މުޅި ޖުމްލަ ރެމިޓެންސްގެ 94 އިންސައްތައެވެ. މިދިޔަ އަހަރުތެރޭ އިންވާޑް ރެމިޓެންސް ނުވަތަ ބޭރު ޤައުމުތަކުގައި ދިރިއުޅޭ މީހުން ރާއްޖޭގައި ދިރިއުޅޭ މީހުންނަށް ފޮނުވާފައިވާ ފައިސާގެ ޖުމްލަ އަކީ 3 މިލިއަން ޑޮލަރެވެ. މިއީ ޖުމްލަ ރެމިޓެންސްގެ 6 އިންސައްތައެވެ.

އައުޓްވާޑް ރެމިޓެންސް ނުވަތަ ރާއްޖެއިން ބޭރަށް ފޮނުވާފައިވާ ފައިސާގެތެރެއިން، 36.3 މިލިއަން ޑޮލަރަކީ ރާއްޖޭގައި ދިރިއުޅޭ ބޭރު ޤައުމުތަކުގެ މީހުން ފޮނުވާފައިވާ ފައިސާއެވެ. އަދި ބާކީ 12.7 މިލިއަން ޑޮލަރަކީ ދިވެހިން ރާއްޖެއިން ބޭރަށް ފޮނުވާފައިވާ ފައިސާއެވެ.

އެހެންކަމުން ރެމިޓެންސްގެ ޙިދުމަތް ހޯދާ ފަރާތްތަކުގެތެރެއިން 74 އިންސައްތައަކީ ބޭރުގެ ފަރާތްތަކެވެ. އަދި ދިވެހިން މި ޙިދުމަތް ހޯދާ މިންވަރީ 26 އިންސައްތައެވެ. ތަފާސް ހިސާބުތައް ދައްކާގޮތުން މިދިޔަ އަހަރުތެރޭ ރާއްޖޭގައި ދިރިއުޅޭ ބޭރުގައުމުތަކުގެ މީހުންގެ ތެރެއިން ރެމިޓެންސްގެ ޙިދުމަތް އެންމެ ގިނައިން ހޯދާފައިވަނީ ބަންގްލަދޭޝް، ނޭޕާލް އަދި ފިލިޕީންސްއަށް ނިސްބަތްވާ މީހުންނެވެ. އަދި ދިވެހިން އެންމެ ގިނައިން ފައިސާ ފޮނުވާފައިވަނީ އިންޑިއާ، ފިލިޕީންސް އަދި ތައިލޭންޑަށެވެ.

އެމްއެމްއޭގެ ރިޕޯޓުގައިވާގޮތުގައި ރާއްޖެއަށް ބޭރުގައުމުތަކުގައި ދިރިއުޅޭ މީހުން ފޮނުވާފައިވާ ފައިސާގެ ތެރެއިން ގިނައީ ދިވެހިންނަށް ފޮނުވާފައިވާ ފައިސާއެވެ. އެގޮތުން ޖުމްލަ އިންވާޑް ރެމިޓެންސްގެ 76 އިންސައްތައަކީ ދިވެހިންނަށް ފޮނުވާފައިވާ ފައިސާއެވެ. ބާކީ 24 އިންސައްތައަކީ ރާއްޖޭގައި އުޅޭ ބޭރުޤައުމުތަކުގެ މީހުންނަށް ފޮނުވާފައިވާ ފައިސާއެވެ.

މިދިޔަ އަހަރުތެރޭ ބޭރު ޤައުމުތަކުގައި ދިރިއުޅޭ މީހުން، ރާއްޖޭގައި ދިރިއުޅޭ ދިވެހިންނަށް 2.3 މިލިއަން ޑޮލަރު ފޮނުވާފައިވާއިރު، މީގެތެރެއިން، 22.8 އިންސައްތަ އަކީ ޔުނައިޓެޑް އަރަބް އެމިރޭޓްސް، ޔޫ.އޭ.އީއިން ރާއްޖެއަށް ފޮނުވާފައިވާ ފައިސާއެވެ. އަދި ޗައިނާއިން 6 އިންސައްތަ އަދި ޖަރުމަންވިލާތުން 5.5 އިންސައްތަ ހިއްސާކުރެއެވެ.