ހިއްކި ބިން ތަރައްޤީކުރުމުގައި އިޤްތިޞާދީ ބޭނުންތަކަށް އިސްކަން ދޭނަން: އަލީ ނިޒާރު

އައްޑޫ ސިޓީން ހިއްކި ސަރަޙައްދުތަކުގެ ލޭންޑް ޔޫސް ޕްލޭން ތައްޔާރުކުރުމަށް މިހާރު ބަޔަކާ ހަވާލުކުރުމަށް ތައްޔާރުވަމުންދާކަމަށާއި، ބިންތައް ތަރައްޤީކުރުމުގައި އިޤްތިޞާދީ ފުރުޞަތުތައް ފަހިކުރުމަށް ޚާއްސަ އިސްކަމެއް ދެއްވާނެކަމަށް އައްޑޫ ސީޓިގެ މޭޔަރ އަލީ ނިޒާރު ވިދާޅުވެއްޖެއެވެ.

އައްޑޫ ސިޓީ ބިން ހިއްކުމުގެ މަސައްކަތަކީ އައްޑޫ ސިޓީގައި މިހާތަނަށް ކުރިއަށްގެންދިޔަ ތަރައްޤީގެ އެންމެ ބިޔަ މަޝްރޫޢުއެވެ.

އައްޑޫގެ މީހުން ދިރިއުޅޭ 3 ރަށެއް ބިން ހިއްކުމުގެ އިތުރުން، ރިސޯޓް ހެދުމަށް ހިއްކު 3 ރަށާއެކު ޖުމްލަ 228 ހެކްޓަރުގެ ބިން މި ޕްރޮޖެކްޓްގެ ތެރެއިން ވަނީ ހިއްކާފައެވެ.

އައްޑޫ ބިން ހިއްކުމުގެ މަޝްރޫޢުގައި ފަތުރުވެރިކަމާއި އިޤްތިޞާދީ ހަރަކާތްތަކަށް ޚާއްސަ ސަރަޙައްދުތައްވެސް ހިމެނެއެވެ. މި މަޝްރޫޢު ނިމިގެންދާއިރު އައްޑޫ ސިޓީ ހިތަދޫއަށް 80 ހެކްޓަރުގެ ބިން، މަރަދޫ އަދި މަރަދޫފޭދޫ އަށް 76 ހެކްޓަރުގެ ބިން، ހުޅުދޫ އަދި މީދޫއަށް 32.3 ހެކްޓަރުގެ ބިން އިތުރުވެގެންދާނެއެވެ. މީގެއިތުރުން އިންޓަގްރޭޓަޑް ޓޫރިޒަމަށް ޚާއްސަކޮށްގެން ތަރައްޤީކުރާ ހަންކެޑެއަށް 4.7 ހެކްޓަރުގެ ބިން އަދި ފަތުރުވެރިކަމަށް ޚާއްސަކޮށް އައްޑޫ ސިޓީ ފަޅުތެރެއިން 8.3 ހެކްޓަރުގެ 3 ރަށާއި 5 ހެކްޓަރުގެ 2 ރަށެއް އިތުރުކުރެވޭނެއެވެ.

ޕީއެސްއެމްއަށް މަޢުލޫމާތު ދެއްވަމުން އައްޑޫ ސިޓި ކައުންސިލްގެ މޭޔަރ އަލީ ނިޒާރު ވިދާޅުވީ، ބިން ހިއްކުމުގެ ހުރިހާ މަސައްކަތްތައް ސެޕްޓެމްބަރުމަހު ނިންމާލުމަށްފަހު މިހާރު ކުރިއަށްދަނީ ހިއްކި ސަރަހައްދު ޙިމާޔަތްކުރުމަށް ބޮޑު ހިލަ ޖެހުމުގެ މަސައްކަތްކަމަށެވެ.

ނިޒާރު ވިދާޅުވީ މި މަސައްކަތް ކުރިއަށްދާއިރު، ހިއްކި ސަރަޙައްދު ބޭނުންކުރަން ފެށުމަށް ލޭންޑް ޔޫސް ޕްލޭން ތައްޔާރުކުރުމަށް ކުރަންޖެހޭ މަސައްކަތްތައް ފަށާފައިވާކަމަށެވެ. އަދި އެ މަސައްކަތް ވަރަށް އަވަހަށް ބަޔަކާއި ހަވާލުކުރާނެކަމަށާއި މަސައްކަތް ހަވާލުކުރާނީ ވީހާވެސް ކުރު މުއްދަތަކުން ރަނގަޅަށް މަސައްކަތް ނިންމާނެ ކުންފުންޏަކާއިކަމަށްވެސް އޭނާ ވިދާޅުވިއެވެ.

މޭޔަރު ވިދާޅުވީ ބޯހިޔާވަހިކަމުގެ އިތުރުން، ލޭންޑް ޔޫސް ޕްލޭންގައި އެންމެ އިސްކަމެއް ދޭނީ އައްޑޫގެ އިޤްތިޞާދު ފުޅާކުރުމަށް ކުރެވޭނެ މަސައްކަތްތަކަށްކަމަށެވެ.

"ކުރު މުއްދަތަކުން އަވަހަށް މި ޕްލޭން ތައްޔާރުކުރަން މި މަސައްކަތް ކުރަނީ. ސިނާޢީ މަސައްކަތްތަކާއި ފަތުރުވެރިކަމަށްވެސް ބިން ކަނޑަޅާނަން. އަދި ގެދޮރު ދިނުމަށް ބިން ހިމަނާނަން، އޭގެ ތެރޭގައި ފްލެޓް އަދި ރޯހައުސްއަށް ބިން ހިމަނާނަން. އިޤްތިޞާދީ ކަންކަމަށް ޚާއްސަ އިސްކަމެއް ދޭނަން." އަލީ ނިޒާރު ވިދާޅުވިއެވެ.

އައްޑޫ ސިޓީއަކީ 20000 އަށްވުރެ ބޮޑު އާބާދީއެއް އޮތް ސަރަޙައްދެކެވެ. ސަރުކާރުން އައްޑޫގެ ބިން ހިއްކައިދެއްވުމުގެ އެންމެ ބޮޑު ބޭނުމަކީވެސް، ބޯހިޔާވަހިކަމުގެ މައްސަލަ ޙައްލުކޮށް، އައްޑުއަށް އާމްދަނީ ވަންނާނެ އިތުރު މަގުތައް ފަހިކޮށްދިނުމެވެ.

އައްޑޫ ސިޓީ ބިން ހިއްކުމުގެ މަޝްރޫޢުއަކީ 1.6 ބިލިއަން ރުފިޔާގެ މަޝްރޫޢުއެކެވެ. މިއީ އައްޑޫގެ ތާރީޚުގައިވެސް ހިންގާ މިފަދަ އެންމެ ބޮޑު މަޝްރޫޢުއެވެ.