ގޯތި ދޫކުރުމުގެ މަސައްކަތް ހަފްތާ ބަންދާއެކު ކުރިއަށް، ނޮވެމްބަރު 5އަށް ނިމޭނެ
-
ބިންވެރިޔާ ސްކީމްގެ ފުރަތަމަ ފިޔަވަހީގައި 9001 ގޯތި ދޫކުރޭ
-
ގޯތި ދޫކުރަނީ ހުޅުމާލެ، ގުޅިފަޅި އަދި ގިރާވަރުފަޅުން
-
އެގްރިމެންޓް ހެދުމުގެ މަސައްކަތްތައް އަދިވެސް ކުރިއަށްދޭ
މާލެ ސަރަޙައްދުން ގޯތި ދޫކުރުމުގެ ފުރަތަމަ ފިޔަވަހީގައި ގޯތި ލިބުނު މީހުންނަށް، ލިޔުން ހަވާލުކޮށް ގޯތި ދޫކުރުމުގެ މަސައްކަތްތައް ސަރުކާރުން އިޢުލާންކޮށްފައިވާ ތާރީޚަށް ނިމޭނެކަމުގެ ޔަގީންކަން އެބައޮތްކަމަށް މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗައިން ވިދާޅުވެއްޖެއެވެ. ސަރުކާރުން އަންނަނީ، ރައީސް އިބްރާޙިމް މުޙައްމަދު ޞާލިޙުވެސް ވިދާޅުވެއްފައިވާގޮތަށް ގޯތި ދޫކުރުމުގެ މަސައްކަތްތައް ނޮވެމްބަރު 5އަށް ނިންމުމަށް މަސައްކަތްކުރަމުންނެވެ.
މާލެއިން ގޯތި ދޫކުރުމުގެ ފުރަތަމަ ފިޔަވަހީގައި 9001 ގޯތި ދޫކުރުމަށް ވަނީ ނިންމާފައެވެ. ޖޮއިންޓްކޮށް ބައިވެރިވި މީހުންނާއެކު 19639 މީހުންނަށް ގޯތި ދޫކުރުރުމަށްވެސް ވަނީ ނިންމާފައެވެ.
ޕީއެސްއެމްއަށް މަޢުލޫމާތު ދެއްވަމުން މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ، ގޯތި ދޫކުރުމާއި ގުޅޭ މަސައްކަތްތައް ކަނޑައެޅިފައިވާގޮތަށް ކުރިއަށްދާކަމަށެވެ.
އެގޮތުން ކޮންޓްރެކްޓް ހެދުމުގެ މަސައްކަތާއެކު، ބިން ހަވާލުކުރުމުގެ މަސައްކަތްތައްވެސް މިނިސްޓްރީން ދަނީ ކުރިއަށްގެންދަމުންނެވެ. ގޯތި ލިބުނު މީހުންނާއެކު، އެގްރިމެންޓްގައި ސޮއިކުރުމުގެ މަސައްކަތްތައް މިހާރު ކުރަމުންދަނީ ދަރުބާރުގޭގައެވެ.
ގޯތިީގެ ރަޖިސްޓްރީ ދޫކޮށް ނިންމުމަށް ކަނޑައަޅާފައިވާ މުއްދަތު ހަމަވާން ހަފްތާއަކަށްވެފައިވާއިރު، އެގްރިމެންޓްގައި ސޮއިކުރުމުގެ މަސައްކަތްތައް އަވަސްކުރުމަށް ހަފްތާ ބަންދާއެކު މަސައްކަތްތައް ކުރިއަށްދާކަން އަކްރަމް ފާހަގަކުރެއްވިއެވެ. ނަމަވެސް މިހާތަނަށް އެގްރިމެންޓް ހެދި އަދަދުތަކާއި އަދި ހަވާލުކުރެވުނު ގޯތީގެ މަޢުލޫމާތު މިނިސްޓްރީއިން ހާމަނުކުރައްވައެވެ.
ބިންވެރިޔާ ސްކީމްގައި ގޯތި ދޫކުރަނީ، ހުޅުމާލެ، ގުޅިފަޅު އަދި ގިރާވަރުފަޅުންނެވެ. އެގޮތުން ހުޅުމާލެއިން 1351 ގޯތި، ގުޅިފަޅުން 2218 ބިން އަދި ގިރާވަރު ފަޅުން 5432 ގޯތި ދޫކުރެއެވެ.
ގުޅިފަޅާއި ގިރާވަރުފަޅުން ގޯތި ދޫކުރަނީ ބިން ހިއްކައިގެންނެވެ. އެ ދެ ޕްރޮޖެކްޓްގައިވެސް ބިން ހިއްކާ ނިމޭވަރަކުން އެ ސަރަޙައްދުތަކުން ވަނީ ބިން ދޫކުރަން ފަށާފައެވެ. ގުޅިފަޅު މަޝްރޫޢުގައި ކުރިން ހިއްކާފައި އޮތް ސަރަޙައްދާއި އަލަށް ހިއްކާ ސަރަޙައްދުން ގޯތި ދޫކުރެއެވެ. އަދި ގިރާވަރު ފަޅު މަޝްރޫޢުއަކީ މުޅިން އާ މަޝްރޫޢުއެކެވެ.
މީގެއިތުރުން، ބިން ދޫކުރުމުގެ ޕްރޮޖެކްޓަށް، ހުޅުމާލެ އިތުރަށް ހިއްކުމުގެ މަސައްކަތްވެސް ސަރުކާރުން ވަނީ ފައްޓަވާފައެވެ. މި ޕްރޮޖެކްޓްގައި ހުޅުމާލެ ފަޅުން 62 ހެކްޓަރު ހިއްކައެވެ.
ސަރުކާރުން ވަނީ ގޯއްޗާއި ފްލެޓް ދޫކުރުމުގެ ދެވަނަ ބުރެއް ކުރިއަށްގެންދިއުމަށް ނިންމާ އެ މަސައްކަތްވެސް ފައްޓަވާފައެވެ. އެގޮތުން ކުރިމަތިލުމަށް ދިން މުއްދަތު ހަމަވެ، ފޯމުތައް ރިވިއުކުރަންޖެހޭ މަސައްކަތްތައް މިނިސްޓްރީން ދަނީ ކުރަމުންނެވެ.