ނޭނގި ޕާޓީއަށް ވެއްދުމުގެ ޝަކުވާ ބޮޑު، އީސީން އަނެއްކާވެސް ދަފްތަރު ޢާންމުކޮށްފި

ސިޔާސީ ޕާޓީތަކަށް މެންބަރުންގެ ގޮތުގައި މިވަގުތު ދަފްތަރު ކުރެވިފައިވާ ހުރިހާ އެންމެންގެ މަޢުލޫމާތު ހިމެނޭ ލިސްޓެއްއިލެކްޝަންސް ކޮމިޝަނުން ޢާންމުކުރައްވައިފިއެވެ.

އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބު ވިދާޅުވީ ސިޔާސީ ޕާޓީތަކުގެ ދަފްތަރުގައި ހިމެނޭ ހުރިހާ އެންމެންގެ މަޢުލޫމާތު އަނެއްކާވެސް ކޮމިޝަނުން ޢާންމުކުރީ ސިޔާސީ ޕާޓީތަކުގެ ދަފްތަރުގެ ސައްޙަކަން ކަށަވަރު ކުރުމަށް ކަމަށެވެ. އެމީހާއަށް ނޭނގި ޕާޓީއަށް ވެއްދުމާއި، ނޭނގި އެއް ޕާޓީން އަނެއް ޕާޓީއަށް މެންބަރުން ބަދަލުކުރާކަމުގެ ޝަކުވާ ކެނޑިނޭޅި އެކޮމިޝަނަށް ލިބެމުންދާކަން ހަބީބު ފާހަގަކުރެއްވިއެވެ. ސިޔާސީ ޕާޓީތަކުގެ މެންބަރުން ހިމެނޭ ދަފްތަރު އިލެކްޝަންސް ކޮމިޝަނުން މީގެ ކުރިންވެސް ޢާންމުކޮށްފައިވެއެވެ.

ސިޔާސީ ޕާޓީތަކަށް މެންބަރުންގެ ގޮތުގައި މިވަގުތު އިލެކްޝަންސް ކޮމިޝަނުގައި ދަފްތަރު ކުރެވިފައިވާ ހުރިހާ އެންމެންގެ މަޢުލޫމާތު ހިމެނޭ ލިސްޓު އިއްޔެ ކޮމިޝަނުން ޢާންމުކޮށްފި.
ސިޔާސީ ޕާޓީތަކުގެ ދަފްތަރުގައި ހިމެނޭ ހުރިހާ އެންމެންގެ މަޢުލޫމާތު އަނެއްކާވެސް ކޮމިޝަނުން ޢާންމުކުރީ… pic.twitter.com/0Mc9uYkK5n

— Ismail Habeeb (@IsmailHabeeb) October 30, 2023

އިލެކްޝަންސް ކޮމިޝަންގެ ދަފްތަރުގައި 10 ސިޔާސީ ޕާޓީއެއް އޮވެއެވެ. އަދި ރާއްޖޭގެ ވޯޓުލެވޭ އާބާދީގެ 56 އިންސައްތަ މީހުންނަކީ ސިޔާސީ ޕާޓީއަށް ނިސްބަތްވާ މީހުންނެވެ. 44 އިންސައްތަ މީހުން އެއްވެސް ސިޔާސީ ޕާޓީއަކަށް ނިސްބަތް ނުވެއެވެ.

ސިޔާސީ ޕާޓީތަކަށް މެންބަރުންގެ ގޮތުގައި މިވަގުތު ދަފްތަރު ކުރެވިފައިވާ ހުރިހާ އެންމެންގެ މަޢުލޫމާތު ހިމެނޭ ލިސްޓު އިލެކްޝަންސް ކޮމިޝަނުގެ ވެބްސައިޓުން ފެންނަންހުންނާނެއެވެ. އަދި ލިސްޓުގައި ނަން އޮތްތޯ ޗެކްކުރެއްވުމަށް ޕީޕީއާރު ހުސްތަންކޮޅެއް ދޫކޮށްލެއްވުމަށް ފަހު، އައިޑެންޓިޓީ ކާޑު ނަމްބަރު ޖެއްސެވުމަށްފަހު 1414 އަށް މެސެޖު ކޮށްލުމުން ޗެކްކޮށްލެއްވޭނެއެވެ.

ޝަކުވާ ހުށަހެޅުމަށް ބޭނުން ކުރާނީ ސިޔާސީ ޕާޓީގެ ދަފްތަރަށް ޝަކުވާ ހުށަހަޅާ ފޯމުންކަމަށް އިލެކްޝަންސް ކޮމިޝަނުން ވިދާޅުވެއެވެ.

މި ފޯމު ކޮމިޝަނުގެ ވެބްސައިޓުން އަދި ކޮމިޝަނުގެ އިދާރާގެ ކައުންޓަރުން ލިބޭނެއެވެ. ޝަކުވާ ބަލައިގަންނާނީ އަންނަމަހުގެ 30ވަނަ ދުވަހުގެ މެންދުރުފަހު 3:00 އާ ހަމަޔަށްކަމަށްވެސް އިލެކްޝަންސް ކޮމިޝަނުން ވިދާޅުވެއެވެ.