ސަރުކާރުން ޤާނޫނުތައް ފާސްކުރަނީ ވަކި މީހަކަށް ބަލައިގެން ނޫންކަމަށާއި، ޤާނޫނުތައް ހަދަނީ ހުރިހާ އެސޯސިއޭޝަނެއްގެވެސް ފައިދާއަށްކަމަށް ކުޅިވަރާއިބެހޭ ވަޒީރު އަހުމަދު ޒުހޫރު ވިދާޅުވެއްޖެއެވެ.
މިނިސްޓަރ ވިދާޅުވީ އެއްވެސް އެސޯސިއޭޝަނެއްގެ ހިންގުމާ ނުބެހޭނެކަމަށާއި، ސަރުކާރަކީ އެސޯސިއޭޝަންތައް ހިންގުމަށް އެހީވެދޭ ފަރާތްކަމަށެވެ. މިނިސްޓަރ މިމޭރުމުން ވާހަކަފުޅުދައްކާފައިވަނީ ކުޅިވަރުގެ ޤައުމީ މަޖިލީހުން ފާސްކޮށްފައިވާ ޤަރާރަކީ ވަކި މީހަކަށް ނިސްބަތްކޮށް ފާސްކޮށްފައިވާ ޤަރާރެއްކަމަށް ދެކެވޭ ވާހަކަތަކަށް ޖަވާބުދާރީވަމުންނެވެ. ކުޅިވަރުގެ އެންމެހާ އެސޯސިއޭޝަންތަކުގެ ހާޒިރުގައި މިނިސްޓަރ ޒުހޫރު ވިދާޅުވީ ކުޅިވަރުގެ އެކިއެކި މަޤާމްތަކަށް ޔޫތް މިނިސްޓްރީގެ ބޭފުޅުން އަންނަން ބޭނުންވެގެން އެކަމުގެ ޝަކުވާ ހުދު މިނިސްޓަރަށްވެސް ލިބިވަޑައިގެންފައިވާކަމަށެވެ.
img:http://s1.psmnews.mv/images/660x400/14591791862935.jpg|އެމްއޯސީގެ އަހަރީ އާންމު ޖަލްސާ (ފޮޓޯ:ޕީއެސްއެމް-ވަހީދު)
"މިހާރުވެސް ތިން އެސޯސިއޭޝަނުން މުސާރަ ނަގާ ފަރާތްތައް މިތާނގައި އެބަތިބި. އެސޯސިއޭޝަނުން ފައިސާ ނަގައިގެން، އަނެއް އެސޯސިއޭޝަނުން މުސާރައިގެ ގޮތުގައި ފައިސާ ނަގާ ފަރާތްތައް އެބަތިބި. މިހާރު ޤަވާއިދަށް ގެނެސްފައިވާ ބަދަލަކީ އެއްވެސް މީހަކަށް ގެނެސްފައިވާ ބަދަލެއްނޫން. އެއީ ކުޅިވަރު ކުރިއަރުވާ، ވީހާވެސް ދެފުއް ފެންނަ ގޮތަކަށް ކަންކަން ކުރުމަށް އެކުލަވާލާފައިވާ ޤަވާއިދެއް." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިހާރު އޮލިމްޕިކް ކޮމެޓީއަކީ ވަކި ގާނޫނީ ޝަހުސެއްކަމަށާއި، އެކޮމެޓީގެ މަސައްކަތްތައް ހިނގާނީ އެފަރާތުން ބޭނުންވާ ގޮަތަށްކަމަށެވެ. ނަމަވެސް ކަންތައްތައް ކުރަންވާނީ ރާއްޖޭގެ ޤާނޫނާ އެއްގޮތަށްކަމަށްވެސް މިނިސްޓަރ ޒުހޫރު ވިދާޅުވިއެވެ.