ޑރ.މުއިއްޒުގެ "ފުށިދިއްގަރުފަޅު" މަޝްރޫޢު ހިންގެވުމަށް ބަޖެޓްގައި 400 މިލިއަން ރުފިޔާ

އިންތިޚާބީ ރައީސް ޑރ.މުޙައްމަދު މުޢިއްޒުގެ ތަޞައްވުރާއި އެއްގޮތަށް މާލެ ސަރަޙައްދުގައި އަލަށް ފެށުމަށް ނިންމާފައިވާ ބޯހިޔާވަހިކަމުގެ އެންމެ ބިޔަ މަޝްރޫޢު، ފުށިދިއްގަރުފަޅު ހިއްކުމުގެ މަޝްރޫޢު، އަންނަ އަހަރަށް ފާސްކުރުމަށް މަޖިލީހަށް ހުށައެޅި ބަޖެޓުގައި ހިމަނައިފިއެވެ.

2024 ވަނަ އަހަރު ޕަބްލިކް ސެކްޓަރ އިންވެސްޓް ޕްރޮގްރާމްތައް ހިންގުމަށް 8.6 ބިލިއަން ރުފިޔާގެ ބަޖެޓެއް ވަނީ ކަނޑައަޅާފައެވެ. މީގެތެރެއިން 1.1 ބިލިއަން ޚަރަދުކުރުމަށް ހަމަމެހިފައިވަނީ އަލަށް ފަށާ މަޝްރޫޢުތަކަށެވެ. އަދި މިވަގުތު ހިންގަމުންދާ 449 ޕްރޮޖެކްޓަކަށް 6.2 ބިލިއަން ރުފިޔާ ވަނީ ކަނޑައަޅާފައެވެ.

އަލަށް ފެށުމަށް ހަމަޖެހިފައިވާ މަޝްރޫޢުތަކުގައި އެންމެ ބޮޑު ޙޭދައެއް ކުރުމަށް ނިންމާފައިވަނީ، އިންތިޚާބީ ރައީސް ޑރ.މުޙައްމަދު މުޢިއްޒު އިޢުލާންކޮށްފައިވާ ފުށިދިއްގަރުފަޅު ހިއްކުމުގެ މަޝްރޫޢުއަށެވެ. މި ޕްރޮޖެކްޓަކީ މާލެ ސަރަޙައްދުގެ ބޯހިޔާވަހިކަން ޙައްލުކޮށްދެއްވުމަށް އަންނަ ސަރުކާރުގައި ހިންގެވުމަށް ނިންމަވާފައިވާ އެންމެ ބޮޑު މަޝްރޫޢުއެވެ.

މި ޕްރޮޖެކްޓްގައި ފުށިދިއްގަރުފަޅު ހިއްކުމަށް ބަޖެޓުގައި 400 މިލިއަން ރުފިޔާ ވަނީ ކަނޑައަޅާފައެވެ. ޑރ.މުޢިއްޒުގެ ތަޞައްވުރަކީ އެ ފަޅު ހިއްކާ، 11000 ގޯއްޗާއި 20000 ފްލެޓް އެތަނުގައި ތަރައްޤީކުރެއްވުމެވެ. އެމަނިކުފާނުގެ ވިސްނުންފުޅަކީ ދަޢުރުގެ ކުރީކޮޅު މި މަޝްރޫޢު ފަށާ، ދަޢުރު ނިމުމުގެ ކުރިން އެ ޕްރޮޖެކްޓްގެ ބޮޑު ބައެއް ނިންމާލުމެވެ.

ހިނގަމުންދާ މަޝްރޫޢުތަކުގައި އެންމެ ބޮޑު ހޭދައެއް ކުރަން ހިމަނާފައިވަނީ ވެލާނާ އިންޓަނޭޝަން އެއަރޕޯޓް ޓަރމިނަލް ތަރައްޤީކުރުމުގެ މަޝްރޫޢުއަށެވެ. އެ މަޝްރޫޢުއަށް 1 ބިލިއަން ރުފިޔާ ވަނީ ކަނޑައަޅާފައެވެ.

މިހާރު ފަށައިގެން ކުރިއަށްގެންދާ ތިލަމާލެ ބްރިޖްގެ މަސައްކަތް ނިންމުމަށް 942 މިލިއަން ރުފިޔާ މަޖިލީހަށް ފާސްކުރަން ހުށައެޅި ބަޖެޓުގައި ހިމަނާފައިވެއެވެ. ކޮންޓްރެކްޓަރާއެކު އެއްބަސްވެފައިވާގޮތުން އަންނަ އަހަރުގެ ނިޔަލަށް އެ ޕްރޮޖެކްޓް އެއްކޮށް ނިންމަންޖެހެއެވެ.

• ޕީއެސްއައިޕީގައި ހިމެނޭ އިތުރު ދާއިރާތައް:
• * ލަފާފުރުމުގެ ދަތިކަން ހައްލުކުރުން: 3.2 ބިލިއަން ރުފިޔާ
• * ބިން ހިއްކުން: 1.6 ބިލިއަން ރުފިޔާ
• * ތިމާވެށި ރައްކާތެރިކުރުން: 1.1 ބިލިއަން ރުފިޔާ
• * ފެނާއި ނަރުދަމާ: 645 މިލިއަން ރުފިޔާ
• * މަގުހެދުން: 565 މިލިއަން ރުފިޔާ
• * ގުޅިފަޅު ޕޯޓް: 527 މިލިއަން ރުފިޔާ
• * އެއަރޕޯޓްތައް ތަރައްޤީކުރުން: 462 މިލިއަން ރުފިޔާ
• * ސިއްޙީ ދާއިރާ ތަރައްޤީކުރުން: 439 މިލިއަން ރުފިޔާ
• * ބޯހިޔާވަހިކަމުގެ އެހެނިގެން މަޝްރޫޢުތައް : 404 މިލިއަން ރުފިޔާ
• * ތަޢުލީމީ ދާއިރާގެ ވަސީލަތްތައް ޤާއިމުކުރުން: 237 މިލިއަން ރުފިޔާ

މި ޕްރޮޖެކްޓްތަކުގެ އިތުރުންވެސް، އާންމުންނަށް މުހިންމު ޚިދުމަތްތައް ދިނުމަށް ބޭނުންވާ ޢުމްރާނީ ވަސީލަތްތައް ޤައިމުކުރުމަށް ބަޖެޓުގައި ހިމަނާފައިވެއެވެ.