ނެގި ލޯނާ އެއްވަރަށް، ސަރުކާރަކަށް މަޝްރޫޢުތައް ނުހިންގުނު: ސަޢީދު

ނެގި ލޯނާއި އެއްވަރަށް މި ސަރުކާރަކަށް ދަޢުލަތަށް ފައިދާވާފަދަ މަޝްރޫޢުތަކެއް ނުހިންގުނުކަމަށް، ކުރީގެ އިކޮނޮމިކް މިނިސްޓަރު އަދި ޕީއެންސީގެ ނައިބު ރައީސް މުޙައްމަދު ސަޢީދު ވިދާޅުވެއްޖެއެވެ. ސަޢީދު މިހެން ވިދާޅުވީ ޕީއެސްއެމްއިން ގެނެސްދޭ "ދިވެހީންގެރާއްޖެ" ޕްރޮގުރާމުގައި ވާހަކަފުޅުދައްކަވަމުންނެވެ.

ރައްޔިތުންގެ މަޖިލީހުގެ މާވަށު ދާއިރާގެ މެންބަރުކަންވެސް ކުރައްވާ މުޙައްމަދު ސަޢީދު ވިދާޅުވީ، ރާއްޖޭގެ ދަރަނީގެ ޙާލަތު މިވަގުތު އޮތީ ވަރަށް ބޮޑަށް ކަންބޮޑުވާ ދަރަޖައެއްގައިކަމަށެވެ. އެގޮތުން ބޭރުގެ ދަރަނި ގާތްގަނޑަކަށް 125 ބިލިއަން ރުފިޔާއަށް އަރާއިރު، މި ސަރުކާރުން އެކަނި އުފަންކުރި ދަރަނި 75 ބިލިއަން ރުފިޔާއަށް އަށްވުރެ އިތުރުކަން ސަޢީދު ފާހަގަކުރެއްވިއެވެ.

ސަޢީދު ވިދާޅުވީ، ބޮޑު ދަރަންޏެއް މި ސަރުކާރުން ނެގި ނަމަވެސް، ދައުލަތަށް ޢަމްދަނީއެއް ވަންނާނެފަދަ ބޮޑު މަޝްރޫޢެއް މި ސަރުކާރަށް ހިންގިފައި ނުވާކަމަށެވެ. މިސާލެއްގެ ގޮތުގައި ސަޢީދު ނެންގެވީ ތިލަމާލޭ ބްރިޖު މަޝްރޫޢު ނުނިމި ދިގުލައިގެން ދިޔަ ދިއުމެވެ. އަދި ވެލާނާ އިންޓަރނޭޝަނަލް އެއަރޕޯޓު ތަރައްޤީކުރުމުގެ ސައްކަތްވެސް ނުނިމި ދިގުލައިގެން ދިއުމަކީވެސް ކަންބޮޑުވުމެއްކަމަށް ސަޢީދު ވިދާޅުވިއެވެ.

މިހާރު މަސައްކަތްދާ ސްޕީޑަށް ބަލާނަމަ އެއަރޕޯޓުގެ މަސައްކަތްތައް ނިންމާލެވޭނެކަމަށް އަންދާޒާކުރެވެނީ 2026 ވަނަ އަހަރަށްކަމަށާއި، ނަމަވެސް އައު ސަރުކާރުގެ އަމާޒަކީ އެ މަސައްކަތް އެއަށްވުރެ އަވަސްކުރުންކަން ސަޢީދު ފާހަގަކުރެއްވިއެވެ.

ސަޢީދު ވަނީ ސިޔާސީ އެކި ބޭނުންތަކަށް މި ސަރުކާރުން ދަރަންޏަށް ނެގި ފައިސާ ބޭނުންކޮށްފައިވާކަމަށް ތުޙުމަތު ކުރައްވާފައެވެ. އަދި ޢާމްދަނީ ލިބޭ މަޝްރޫޢެއް ނެގި ލޯނުތަކުން ނުހިންގޭކަމަށްވެސް ސަޢީދު ވިދާޅުވިއެވެ.

ސަޢީދު ވިދާޅުވީ، ސަރުކާރުގެ ބައެއް ކުންފުނިތަކުގެ ދަރަނި ފިތްކަނޑާއިގެން ދާހާ ބޮޑުކަމަށާއި، ބޮޑެތި ޢަދަދުތަކުން ފައިސާ ނުދައްކާ އެތައް ބިލްތަކެއް އެބަހުރިކަމަށެވެ. އަދި ބައެއް ކުންފުނިތައް ސިޔާސީ ބޭނުންތަކަށް ސަރުކާރުން ބޭނުންކޮށްފައިވާކަމަށްވެސް ސަޢީދު ތުޙުމަތުކުރެއްވިއެވެ.

"އަވަށްޓެރި ބައެއް ޤައުމުތަކުން، ޚާއްސަކޮށް އިންޑިއާއިން ނަގާފައިވާ ދަރަނި 3.2 ބިލިއަން 3.5 ބިލިއަން އެމެރިކާ ޑޮލަރަށް އެބަ އަރާ. އެހެންނަމަވެސް، އެ ނެގި ދަރަންޏެއް ރިއަލައިޒް ވެފައެއް ނެތޭ މަޝްރޫޢަކަށެއް. ސީދާ ޢާމްދަނީ ލިބޭނެ މަޝްރޫޢަކަށް." ސަޢީދު ވިދާޅުވިއެވެ.

ޕީ.އެން.ސީގެ ނައިބު ރައީސް އަދި މަޖިލީހުގެ މާވަށު ދާއިރާގެ މެންބަރު ސަޢީދު ވިދާޅުވީ، އިންތިޚާބީ ރައީސް ޑރ. މުޙައްމަދު މުޢިއްޒުގެ ޚާރިޖީ ސިޔާސަތަކީ ދިވެހިންގެ މަސްލަޙަތާއި ތަރައްޤީއާއި ކުރިއެރުމަށް އިސްކަންދޭ ސިިޔާސަތެއްކަމަށެވެ. އަދި ބޭރުގެ އިންވެސްޓަރުންނާއި ގުޅިގެން، ފޮރިން އިންވެސްޓްމަންޓްތައް ރާއްޖެއަށް ގެނެސް، މިވަގުތު ރާއްޖެ މިއޮތް ހާލަތުން އަރާ ގަތުމަށް ބުރަ މަސައްކަތްތަކެއް ޑރ. މުޢިއްޒުގެ ސަރުކާރުން ކުރައްވާނެކަމަށް ސަޢީދު ވިދާޅުވިއެވެ.