ގޯތީގެ ރަޖިސްޓްރީގައި ސޮއިނުކުރާ މީހުންނަށް ބުރާސްފަތީގެ ނިޔަލަށް ފުރުޞަތުދޭނެ

ގޯތީގެ ރަޖިސްޓްރީގައި މިހާތަނަށް ސޮއިނުކުރާ މީހުންނަށް ބުރާސްފަތީގެ ނިޔަލަށް ފުރުޞަތުދޭނެ ކަމަށް ހައުސިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވެއްޖެއެވެ.

ޕީއެސްއެމް ނިއުސްއާއި ވާހަކަދައްކަވަމުން އަކްރަމް ކަމާލުއްދީން ވިދާޅުވީ މިނިސްޓްރީން މަސައްކަތް ކުރަމުންދަނީ މިއަދުގެ ނިޔަލަށް ގޯތީގެ ރަޖިސްޓްރީތަކުގައި ސޮއިކުރުމުގެ މަސައްކަތް ނިންމުމަށްކަމަށެވެ. ނަމަވެސް މީގެތެރޭގައި އަދިވެސް ރަޖިސްޓްރީގައި ސޮއިނުކުރެވޭ މީހުން ތިބިކަމަށެވެ.

އަކްރަމް ވިދާޅުވީ، މިނިސްޓްރީން ދެއްވި ވަގުތުގައި ރަޖިސްޓްރީގައި ސޮއިކުރަން ނާދެވުނު މީހުންނާއި، އެހެނިހެން ސަބަބުތަކާހުރެ މިހާތަނަށް ސޮއިނުކުރެވިވާ މީހުންނާއެކު، ކޮންޓްރެކްޓްގައި ސޮއިކުރުމުގެ މަސައްކަތް އަންނަ ބުރާސްފަތި ދުވަހާއި ހަމައަށް ކުރިއަށްގެންދަވާނެކަމަށެވެ. އެއްބަސްވުންތަކުގައި ސޮއިކުރުމުގެ މަސައްކަތް މިހާރު ކުރިއަށްގެންދަނީ ދަރުބާރުގޭގައެވެ. ހަފްތާ ބަންދާއި، އަދި ނުރަސްމީ ގަޑިތަކާއެކު އެމަސައްކަތް މިނިސްޓްރީން އަންނަނީ ކުރިއަށްގެންދަވަމުންނެވެ.

ސަރުކާރުން މަސައްކަތްކުރެއްވީ ނޮވެމްބަރު 5ވަނަ ދުވަހުގެ ނިޔަލަށް، ގޯތި ދިނުމުގެ ހުރިހާ މަސައްކަތެއް ނިންމުމަށެވެ. ނަމަވެސް އެމަސައްކަތް އަދިވެސް އަންނަނީ ކުރިއަށްގެންދަވަމުންނެވެ.

މިމަސައްކަތް މިހާތަނަށް ނިންމާލެވިފައިވާ މިންވަރުގެ ތަފްސީލެއް މިނިސްޓްރީން ޙިއްސާކުރައްވާފައެއް ނުވެއެވެ.

މާލެ ސަރަޙައްދުގައި ފަށާފައިވާ ބޯހިޔާވަހިކަމުގެ މަޝްރޫޢުގައި، ޝަރުތުހަމަވެ، މާލޭގެ 19000އަށްވުރެ ގިނަ ރައްޔިތުންނަށް ގޯތި ލިބެއެވެ. ޖޮއިންޓްކޮށް ހުށައެޅި މީހުންނާއެކު އެއީ 9001 ގޯއްޗެވެ.

ބިންވެރިޔާ ސްކީމްގައި ގޯތި ދޫކުރަނީ، ހުޅުމާލެ، ގުޅިފަޅު އަދި ގިރާވަރުފަޅުންނެވެ. އެގޮތުން ހުޅުމާލެއިން 1351 ގޯތި، ގުޅިފަޅުން 2218 ގޯތި އަދި ގިރާވަރު ފަޅުން 5432 ގޯތި ދޫކުރެއެވެ.

ގުޅިފަޅާއި ގިރާވަރުފަޅުން ގޯތި ދޫކުރަނީ ބިން ހިއްކައިގެންނެވެ. އެ ދެ ޕްރޮޖެކްޓްގައިވެސް ބިން ހިއްކާ ނިމޭވަރަކުން އެ ސަރަޙައްދުތަކުން ވަނީ ބިން ދޫކުރަން ފަށާފައެވެ. ގުޅިފަޅު މަޝްރޫޢުގައި ކުރިން ހިއްކާފައި އޮތް ސަރަޙައްދާއި އަލަށް ހިއްކާ ސަރަޙައްދުން ގޯތި ދޫކުރެއެވެ. އަދި ގިރާވަރު ފަޅު މަޝްރޫޢަކީ މުޅިން އައު މަޝްރޫޢެކެވެ.

މީގެއިތުރުން، ބިން ދޫކުރުމުގެ ޕްރޮޖެކްޓަށް، ހުޅުމާލެ އިތުރަށް ހިއްކުމުގެ މަސައްކަތްވެސް ސަރުކާރުން ވަނީ ފައްޓަވާފައެވެ. މި ޕްރޮޖެކްޓްގައި ހުޅުމާލެ ފަޅުން 62 ހެކްޓަރު ހިއްކައެވެ.

ސަރުކާރުން ވަނީ ގޯއްޗާއި ފްލެޓް ދޫކުރުމުގެ ދެވަނަ ބުރެއް ކުރިއަށްގެންދިއުމަށް ނިންމަވާ އެމަސައްކަތްވެސް ފައްޓަވާފައެވެ. އެގޮތުން ކުރިމަތިލުމަށް ދިން މުއްދަތު ހަމަވެ، ފޯމުތައް ރިވިއުކުރުމުގެ މަސައްކަތް މިނިސްޓްރީން ގެންދަވަނީ ކުރައްވަމުންނެވެ.