ފަތުރުވެރިކަން އިޝްތިހާރުކުރުމަށް 181 މެންބަރުންގެ ޓީމެއް ޑަބްލިއުޓީއެމަށް
-
މިމަހުގެ 8އާ ހަމައަށް މި ފެއަރ ކުރިއަށްދާނެ
-
އިސްކޮށް ހުންނެވީ އެމްއެމްޕީއާރުސީގެ ސީއީއޯ އަދި އެމްޑީ ޠައްޔިބު
-
ހާއްސަ ޕްރެސް ކޮންފަރެންސެއް އެމްއެމްޕީއާރުސީން ބާއްވާނެ
ދުނިޔޭގެ އެންމެ ބޮޑު ފަތުރުވެރިކަމުގެ ފެއަރތަކުގެތެރޭގައި ހިމެނޭ، ވޯލްޑް ޓްރެވަލް މާކެޓު ލަންޑަން، ޑަބްލިއުޓީއެމް ލަންޑަންގައި ރާއްޖެއިން ބައިވެރިވެއްޖެއެވެ.
މިފެއަރ ކުރިއަށްދަނީ މިމަހުގެ 6އިން 8 އަށް ލަންޑަންގެ އެކްސެލްގައެވެ. މިއަހަރުގެ ޑަބްލިއުޓީއެމް ފެއަރގައި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީއާއި އެކު ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ 92 ކުންފުންޏަކުން 181 މަންދޫބުންގެ ވަފުދެއްވަނީ ބައިވެފައެވެ. މި ވަފްގައި އިސްކޮށް ހުންނެވީ އެމްއެމްޕީއާރުސީގެ ސީއީއޯ އަދި އެމްޑީ ޠައްޔިބު މުޙައްމަދެވެ.
ޑަބްލިއުޓީއެމް ލަންޑަން އަކީ ދުނިޔޭގެ ފެންވަރުގައި ބާއްވާ ފަތުރުވެރިކަމާ ބެހޭ އެންމެ ބޮޑު އެއް ފެއާއެވެ. މި ފެއާއަކީ ޓޫރިޒަމް ސިނާއަތުގައި ހިމެނޭ އެންމެހާ ފަރާތްތައް އެއްތަނަކުން ބައްދަލުކޮށް، މަޝްވަރާކޮށް ވިޔަފާރީގެ ގުޅުންތައް ބަދަހިކުރުމުގެ ފުރުސަތު އެންމެ ފުޅާ ދާއިރާއެއްގާ ފޯރުކޮށްދޭ ފަތުރުވެރިކަމުގެ އެންމެ ބޮޑު އެއް ހަރަކާތެވެ.
އެމްއެމްޕީއާރުސީން ވިދާޅުވީ މިއަހަރުގެ ފެއަރ މެދުވެރިކޮށް އިނގިރޭސިވިލާތުގެ ޓޫރިޒަމް ދާއިރާގެ ފަރާތްތަކުގެ އިތުރުން ދުނިޔޭގެ ޓޫރިޒަމް ޕާޓްނަރުންނާ ބައްދަލުކޮށް ރާއްޖެ އާއި ރާއްޖޭގެ ފަތުރުވެރިކަމުގެ އުފެއްދުންތަކާ ބެހޭ އެންމެ ފަހުގެ މައުލޫމާތު ދުނިޔެއަށް ހާމަކޮށްދިނުމަށް މަސައްކަތްކުރާނެ ކަމަށެވެ.
މި ފެއާގައި ރާއްޖެ އިޝްތިހާރުކުރަމުންދަނީ 500 އަކަށްފޫޓުގެ ޑަބަލްޑެކް ސްޓޭންޑެއްގައެވެ. މި ސްޓޭޓުގައި ރާއްޖެއަށް ޒިޔާރަތްކުރާ ފަރާތްތަކަށް ލިބެން ހުރި ތަފާތު ތަޖުރިބާތައް ފެނިގެންދާނެއެވެ.
މި އަހަރުގެ ސްޓޭންޓުގައިވަނީ އެކްސްޕީރިއަންސް ޒޯނެއް ގާއިމްކޮށްފައެވެ. އަދި ރާއްޖޭގެ ކަނޑު އަޑީގެ މުއްސަނދިކަން ދައްކުވައިދޭ 'އަންޑަރވޯޓާ ޓަނަލް' ވޯކްވޭއެއްވެސް މިފަހަރުގެ ސްޓޭންޑުގައި ހިމެނެއެވެ. ޑަބްލިއުޓީއެމް ފެއަރގެ ހަވާސާގައި ރާއްޖޭގެ މައުލޫމާތުދިނުމަށް ހާއްސަ ޕްރެސް ކޮންފަރެންސެއް އެމްއެމްޕީއާރުސީން ބާއްވާނެއެވެ.
އިނގިރޭސިވިލާތަކީ ރާއްޖޭގެ ފަތުރުވެރިކަމަށް މުހިންމު ޤައުމެކެވެ. ރާއްޖެއަށް މިހާރު 4ވަނައަށް އެންމެ ގިނައިން ފަތުރުވެރިން އަންނަނީ އިނގިރޭސިވިލާތުންނެވެ. އެގޮތުން މިއަހަރުގެ އޮކްޓޫބަރުމަހުގެ ނިޔަލަށް އެޤައުމުން ރާއްޖެއަށް 122614 ފަތުރުވެރިން އައިސްފައިވާއިރު، މިއީ ރާއްޖެއަށް މި މުއްދަތުގައި ޒިޔާރަތްކުރި ޖުމްލަ ފަތުރުވެރިންގެ 8.1 އިންސައްތައެވެ.