ކުނބުރުދޫ ގޮނޑުދޮށް ޙިމާޔަތްކޮށްފި

އދ.ކުނބުރުދޫގެ ގޮނޑުދޮށް ޙިމާޔަތްކުރުމުގެ މަސައްކަތް ނިންމާލައިފިއެވެ. ކުނބުރުދޫ ގޮނޑުދޮށް ހިމާޔަތް ކުރުމުގެ މަސައްކަތް ކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީންނެވެ.

މިމަސައްކަތުގެ ދަށުން 24,000 ކިއުބިކް މީޓަރުގެ ސަރަޙައްދެއްގެ ބިން ހިއްކާ، 430 މީޓަރުގެ ސަރަޙައްދެއްގައި ބޮޑުހިލައިގެ ރިވެޓްމެންޓް ވަނީ ޖަހާފައެވެ. މީގެ އިތުރުން 280 މީޓަރުގެ ސަރަޙައްދެއްގައި ޖިއޯޓިއުބް ރިވެޓްމެންޓް ޖެހުމާއި، 7,171 ކިއުބިކް މީޓަރުގެ ސަރަޙައްދެއްގެ ގޮނޑުދޮށަށް އަލުން ވެލިއަޅާފައިވެއެވެ. މިމަސައްކަތް ކޮށްފައިވަނީ ދަޢުލަތުގެ ބަޖެޓުން 21.14 މިލިޔަން ރުފިޔާ ވަނީ ޚަރަދުކޮށްފައެވެ.

640 މީހުންގެ އާބާދީއެއް އޮންނަ ކުނބުރުދޫއަކީ އަރިއަތޮޅަށް ނިސްބަތްވާ ރީތި ތުނޑިއެއް އޮންނަ ހިތްގައިމު ކުޑަ ރަށެކެވެ. ދިރިއުޅުމަށްޓަކައި އާމްދަނީ ހޯދުމަށް އެރަށުގެ ގިނަމީހުން ކުރާ މަސައްކަތަކީ ރިޒޯޓްތަކުގައި ވަޒީފާ އަދާކުރުމެވެ.

ރަށްގިރުމުގެ ބިރުވެރިކަމަކީ ޒަމާނުއްސުރެ ކުނބުރުދޫ ރައްޔިތުން ތަޙައްމަލުކުރަމުން އައައިސްފައިވާ މައްސަލައެކެވެ. މިކަމުގެ ސަބަބުން ރަށުގެ އުތުރާއި ދެކުނުން ހޭޅިފަށާއި ހަމައަށް ރަށްގިރާ ރަށުގެ ގޮނޑުދޮށުގެ މަލަމަތިން ކުރިން ފެނުނު ރީތިކަންވެސް ވަނީ ގެއްލިފައެބެ. އެހެންކަމުން އެރަށު ގޮނޑުދޮށް ހިމާޔަތްކޮށް ނިމުމާއެކު ކުނބުރުދޫއަށް ކުރިމަތިވެފައިވާ ރަށް ގިރުމުގެ މައްސަލަ ހައްލުވެގެންދާނެއެވެ.