ގޯއްޗާއި ފްލެޓު ދޫކުރުމުގައި ދިރިއުޅުމުގެ ހާލަތު ބެލުމުގެ މަސައްކަތް ކައުންސިލްތަކަށް ދޫކޮށްލައްވާނެކަމަށް، ގެދޮރުވެރިކަމާއި ބިމާއި ޢުމްރާނީ ތަރައްޤީއާ ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވެއްޖެއެވެ. ޑރ.ހައިދަރު މިހެން ވިދާޅުވީ، ގެދޮރުވެރިކަމާއި ގުޅޭގޮތުން އާ ސަރުކާރުގެ ސިޔާސަތުތަކަށް އަލިއަޅުއްވާލައްވާ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުންނެވެ.
ގެދޮރުވެރިކަމާއި ބޭހޭ ވަޒީރު، ޑރ.ޢަލީ ހައިދަރު ވިދާޅުވީ، ގޯއްޗާއި ފްލެޓް ދޫކުރުމުގައި ޢަމަލިކުރާނެ ރަނގަޅު ޢުސޫލުއް އޮންނަންޖެހޭކަމަށާއި، އެންމެ މުހިންމު އެއް ކަމަކީ، ލިސްޓަށް މާކްސް ދޭއިރު، މީހުން ދިރިއުޅުމުގެ ޙާލަތަށް ރިޢާޔަތްކުރެވޭނެ އެކަށީގެންވާ ނިޒާމެއް ޤާއިމުކުރުންކަމަށެވެ.
ވަޒީރު ވިދާޅުވީ ފޯމުގައި ހިމަނާ މަޢުލޫމާތަށް އެކަނި ބަލައިގެން ބޯހިޔާވަހިކަމަށް އޭގެ އެންމެ ޙައްގުވެރިން ކަނޑަނޭޅޭކަމަށެވެ. އެހެންކަމުން ދިރިއުޅުމުގެ ހާލަތު ބަލާނެކަމަށާއި، ވުޒާރާއިން އެކަން ކުރުމުގެ ބަދަލުގައި، ރައްޔިތުންނާއި އެންމެ ގާތުން މަސައްކަތް ކުރާ މުއައްސަސާކަމުގައިވާ ކައުންސިލްތަކާއި އެ މަސައްކަތް ކުރުމަށް ހަވާލުކުރަންޖެހޭކަމަށް ހައިދަރު ވިދާޅުވިއެވެ.
އާ ސަރުކާރުގެ ވިސްނުމަކީވެސް، ގޯއްޗާއި ފްލެޓަށް މީހުން ހޮވުމުގައި ދިރިއުޅުމުގެ ޙާލަތު ބެލުމުގެ މަސައްކަތް ކައުންސިލްތަކަށް ދޫކޮށްލެއްވުންކަމަށް ގެދޮރުވެރިކަމާއި ބެހޭ ވަޒީރު ވިދާޅުވިއެވެ. ކައުންސިލްތަކަކީ ރައްޔިތުންގެ ޙާލަތު އެންމެ ގާތުން އެނގޭ އިދާރާކަމަށާއި، ގެދޮރުވެރިކަން ދޭއިރު އޭގެ އެންމެ ޙައްގުވެރިން ދެނެގަނެ، ދެފުށްފެންނަ ގޮތަކަށް ކުރިއަށްގެންދެވޭނީ ކައުންސިލްތަކުން އެކަންކޮށްގެންކަމަށް ވަޒީރު ވިދާޅުވިއެވެ.
"އިންސާފުވެރިކަމާއި، ތެދުވެރިކަމާއި ދެފުއްފެންނަގޮތަށް، ޙައްގުވެރިންނަށް އިސްކަންދޭންޖެހޭ. އެ ޙާލަތު އެންމެ ބޮޑަށް އިނގޭނީ ކައުންސިލްތަކަށް. ސޯޝަލް ހައުސިންގެ ކަންކަން އެގޮތަށް ރާވާ، ކައުންސިލްތަކާއި އެ މަސައްކަތް ހަވާލުކުރާނަން. ރާއްޖޭގެ އެހެން ރަށްރަށުގައިވެސް އެކަން ކުރަނީ އެހެން." ވަޒީރު ވިދާޅުވިއެވެ.
ގެދޮރުވެރިކަމާ ބެހޭ ވަޒީރު ޑރ. ޢަލީ ޙައިދަރު ވިދާޅުވީ، ވެރިކަން ކުރާ ރަށަށް މާލެ ވުމަކީ، އެ މަސައްކަތް އެ އޮންނަ އުސޫލާއި ޚިލާފަށް ކުރަންޖެހޭ ސަބަބެއް ނޫންކަމަށެވެ. އެހެން ރަށްރަށުގައިވެސް ގޯއްޗާއި ފްލެޓް ދޫކުރުމުގައި ޙާލަތު ބެލުމުގެ މަސައްކަތް ކައުންސިލްތަކުން ކުރާގޮތަށް، މާލޭގައިވެސް ސިޓީ ކައުންސިލަށް އެ ބާރު ދިނުމަކީ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވިސްނުންފުޅުކަމަށެވެ.
މިދިޔަ ސަރުކާރުގައި ހުޅުވާލި ގެދޮރުވެރިޔާ ސްކީމްގައި، ޝަރުތު ހަމަވި 13000އަށްވުރެ ގިނަ މީހުންނަށް ފްލެޓް ދިނުމަށް އޮތީ ނިންމާފައެވެ. ޕޮއިންޓް ލިބުނު ތަރުތީބުން، ފުރަތަމަ ދޭން ނިންމާފައިވަނީ ޢިމާރާތްކުރާ 4000 ފްލެޓެވެ. ނަމަވެސް މި ޕްރޮޖެކްޓްގައި ޕޮއިންޓް ދިން ގޮތާމެދު އާންމުންގެ ގިނަ ޝަކުވާތަކާއި ކަންބޮޑުވުންތައް ހުރުމުން، އެންޓި ކޮރަޕްޝަން ކޮމިޝަން، އޭސީސީން ވަނީ އެ މައްސަލަ ބަލަންދެން ފްލެޓު ދޫކުރުން ހުއްޓުވާފައެވެ. އޭސީސީން ވިދާޅުވީ މިކަމުގައި ދެން ކުރިއަށްދާނެ ގޮތެއް ވަރަށް އަވަހަށް ނިންމާނެކަމަށެވެ.
އާ ސަރުކާރުން ވަނީ، ފްލެޓް ލިސްޓް އަލުން ރިވިއުކުރުމަށްވެސް ނިންމަވާފައެވެ. މިދިޔަ ސަރުކާރުގައި ފްލެޓް ލިސްޓް ކަނޑައަޅިއިރު، ދިރިއުޅުމުގެ ޙާލަތު ބަލަން ގޮސްފައިވަނީ ދެހާހެއްހާ ގެއަށްކަމަށް، އޭރު ސަރުކާރުން ހާމަކުރިއެވެ. އާ ސަރުކާރުގެ ވިސްނުމަކީ، ދިރިއުޅުމުގެ ޙާލަތަށް ބެލުމަށް ފަހުގައި ނޫނީ، ފްލެޓާއި ގޯތި ލިބޭ މީހުން ކަނޑަނޭޅުމެވެ. އެހެންނަމަވެސް މިދިޔަ ސަރުކާރުގައި ގޯއްޗާއި ފްލެޓް ލިބުނު އެއްވެސް މީހެއްގެ އަތުން، ގޯތި/ފްލެޓް އަތުނުލާނެކަމުގެ ޔަގީންކަން ސަރުކާރުންދެއެވެ.