ބޯހިޔާވަހިކަމުގެ ބޮޑު މަޝްރޫޢު "ފުށިދިއްގަރުފަޅު" ޕްރޮޖެކްޓް ބަޖެޓުން އުނިކޮށްފި

ފައިސާ އިތުރުކޮށް ކޮމިޓީން ފާސްކުރި ބަޖެޓުން އައު ސަރުކާރުގެ ބޯހިޔާވަހިކަމުގެ ބޮޑު މަޝްރޫޢު، ފުށިދިއްގަރުފަޅު ޕްރޮޖެކްޓް ބަޖެޓުން އުނިކޮށްފިއެވެ. ބަޖެޓު ފާސްކުރުމަށް ބޭއްވި ކޮމިޓީގެ ފަހުގެ ބައްދަލުވުމުގައި ވަނީ، ބަޖެޓަށް ގެނައި ބަދަލުތައް ފާސްކޮށްފައެވެ.

ކޮމިޓީ ބައްދަލުވުމުގައި ވަނީ ބަޖެޓަށް އިތުރުކުރި ފައިސާއާއި، ޕްރޮޖެކްޓްތަކުގެ ސްކޯޕަށް ގެނައި ބަދަލާއި، އުނިކުރި ފައިސާގެ ތަފްސީލްތައް ހުށައަޅާފައެވެ. ޕީއެސްއައިޕީ މަޝްރޫޢުތަކަށް ގެންނެވި ބަދަލުތައް ކޮމިޓީގައި ހުށައެޅުއްވީ، ދާންދޫ ދާއިރާގެ މެންބަރު ޔައުގޫބު އަބްދުﷲއެވެ.

ބަޖެޓަށް ގެނައި ބަދަލުގައި، އަންނަ އަހަރުގެ ބަޖެޓުން އުނިކުރަން ނިންމި އެއް މަޝްރޫޢަކީ އައު ސަރުކާރުގެ އެންމެ ބޮޑު އެއް މަޝްރޫޢު ފުށިދިގަރުފަޅު ޕްރޮޖެކްޓެވެ. މިމަޝްރޫޢަށް އަންނަ އަހަރުގެ ބަޖެޓުގައި 400 މިލިއަން ރުފިޔާ ހިމަނުއްވާފައިވެއެވެ.

ޕްރޮޖެކްޓުން އުނިކުރި ފައިސާ، އެހެނިހެން ޕްރޮޖެކްޓްތަކުގެ ބަޖެޓަށް ވަނީ އިތުރުކޮށްފައެވެ. ފައިސާ އިތުރުކުރި ޕްރޮޖެކްޓްތަކާއި، އިތުރުކުރި ފައިސާގެ އަދަދުތަކުގެ ތަފްސީލްތައް ކޮމިޓީގައި ހުށައަޅާ، ވަނީ ފާސްކޮށްފައެވެ. އެގޮތުން ބަޖެޓް އިތުރުކުރި މަޝްރޫޢުތަކުގެ ތެރޭގައި އެއަރޕޯޓްތަކާއި، ރަށްރަށުގެ ބަނދަރު ހެދުމާއި، ސިއްޙީ މަރުކަޒާއި ސްކޫލްތަކާއި ކުޅިވަރު ވަސީލަތްތައް ފަދަ ޕީއެސްއައިޕީ މަޝްރޫޢުތަކަށް ހިމެނެއެވެ.

ދާންދޫ ދާއިރާގެ މެންބަރު ޔައުގޫބު އަބްދުﷲ ހުށަހެޅުއްވި ބަދަލުތައް، ސަރުކާރާއި އިދިކޮޅު މެޖޯރިޓީ އޮންނަ އެކޮމިޓީން ވަނީ ފާސްކޮށްފައެވެ.

ފުށިދިއްގަރު ފަޅު މަޝްރޫޢަކީ، މާލެ ސަރަޙައްދުގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ގެންނަވަން، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އެންމެ ބޮޑު ތަޞައްވުރެއް އޮތް މަޝްރޫޢެވެ. އެހެންކަމުން އަންނަ އަހަރުގެ ބަޖެޓުގައި އައު ސަރުކާރަށް ލިބުނު ހަނި ފުރުޞަތުގައި، ފުށިދިއްގަރު ފަޅު މަޝްރޫޢު ހިންގުމަށް 400 މިލިއަން ރުފިޔާ ބަޖެޓްގައި ހިމެނިއެވެ.

ފުށިދިއްގަރު ފަޅު ހިއްކުމުގެ ޢަމަލީ މަސައްކަތް ފެއްޓެވުމަށް، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ "ހަފްތާ 14" އެޖެންޑާގައި ވަނީ ހިމަނުއްވާފައެވެ. 14 ހަފްތާގެ މުއްދަތު ހަމަވާނީ އަންނަ ފެބްރުއަރީމަހުގެ ތެރޭގައެވެ.

ޑރ.މުޢިއްޒުގެ ތަޞައްވުރަކީ އެ ފަޅު ހިއްކާ، 11000 ގޯއްޗާއި 20000 ފްލެޓް އެތަނުގައި ތަރައްޤީކުރެއްވުމެވެ. އެމަނިކުފާނުގެ ވިސްނުންފުޅަކީ ދަޢުރުގެ ކުރީކޮޅު މިމަޝްރޫޢު ފައްޓަވާ، ދަޢުރު ނިމުމުގެ ކުރިން ބޮޑު ބައެއް ނިންމާލުމެވެ.

މިމަޝްރޫޢުގެ ދަށުން 1280 ހެކްޓަރުގެ ބިން ހިއްކާނެއެވެ. އެއީ ހުޅުމާލެ ފޭސް 1،2 އެއްކޮށްލައިގެން، އޭގެ ތިންގުނައަށްވުރެ ބޮޑު ރަށެކެވެ.

ކޮމިޓީން ފާސްކުރި ބަޖެޓުގައި 2024 ވަނަ އަހަރު ޕަބްލިކް ސެކްޓަރ އިންވެސްޓް ޕްރޮގްރާމްތައް ހިންގުމަށް 8.6 ބިލިއަން ރުފިޔާގެ ބަޖެޓެއް ވަނީ ކަނޑައަޅާފައެވެ. މީގެތެރެއިން އަލަށް ފަށާ މަސައްކަތްތަކަށް ހިމަނާފައިވަނީ 1.1 ބިލިއަން ރުފިޔާއެވެ. އަދި މިވަގުތު ހިންގަމުންދާ 449 ޕްރޮޖެކްޓަކަށް 6.2 ބިލިއަން ރުފިޔާ ވަނީ ކަނޑައަޅާފައެވެ.