އަމީނީމަގު ބައެއް ބަންދުކުރުމާއި ގުޅިގެން ބަސް ރޫޓްތަކަށް ބޮޑެތި ބަދަލުތަކެއް

އަމީނީ މަގުގައި ތާރުއަޅައިގެން ތަރައްޤީކުރުމުގެ މަސައްކަތަށް މަގުން ބޮޑުބައެއް ބަންދުކޮށްފައިވާތީ، ރާއްޖެ ޓްރާންސްޕޯޓް ލިންކް، އާރްޓީއެލްގެ ބަހުގެ ޚިދުމަތްދޭ ރޫޓުތަކަށް ބޮޑެތި ބަދަލުތަކެއް ގެނެސްފިއެވެ.

މިހާރު ބަންދުކޮށްފައިވާ ސަރަޙައްދަކީ މާލޭގެ އެތެރޭގެ ބަހުގެ ޚިދުމަތާއި، އަދި މާލެއާއި ހުޅުމާލެއާއި ދެމެދު ބާއްވާ ދަތުރުތަކަށްވެސް ބޭނުންކުރާ މައި އެއް ސަރަޙައްދެކެވެ. މި ރޫޓުތަކަށް މައިގަނޑު 3 ބަދަލެއް ވަނީ ގެނެސްފައެވެ.

ކުރިން އޮތްގޮތުން، ހުޅުމާލެއާއި މާލެއާއި ދެމެދުގެ ދަތުރުތައް، ދަރުމަވަންތަ ހޮސްޕިޓަލް ސަރަޙައްދާއި ވެސްޓް ޕަރކް ސަރަޙައްދަށް ބާއްވައެވެ. ނަމަވެސް އަމިނީ މަގުން ބަސް ދަތުރުތައް ކުރާ ސަރަޙައްދުތައް ބަންދުކުރުމާއި ގުޅިގެން، މިހާރު އެ ދަތުރުތަކުގެ ފަހު ސްޓޮޕަކީ މާލޭ މާފަންނު ބަސް ޓަރމިނަލް ކަމުގައި ވަނީ ހަމަޖައްސާފައެވެ.

އެގޮތުން އާރް-1 އަދި އާރް-3ގެ ދަތުރުތައް ފަށާ ސްޕޯޓްކަމުގައާއި، އާރް-7ގެ ދަތުރުތަކުގެ މާލޭގެ ފަހު ސްޓޮޕްކަމުގައި މާފަންނު ބަސް ޓަރމިނަލްވަނީ ހަމަޖައްސާފައެވެ. މާލެއާއި ހުޅުމާލެއާއި ދެމެދު ދަތުރުކުރާ ބަސްތަކަކީ ސައިޒުން ބޮޑެތި ބަސްތަކަކަށްވުމާއެކު، އެ ބަސްތައް އެތެރޭގެ މަގުތަކުގައި ދުއްވުމަށް ބޭނުން ނުކުރެވެއެވެ.

ދެން ބަދަލުގެނެސްފައިވަނީ މާލޭގެ އެތެރޭގެ ދަތުރުތަކަށެވެ. އެގޮތުން އަމީނީ ރޫޓް(އާރް-11)ގެ ދަތުރުތައް އަމީނީ މަގުންގޮސް ހަނދުވަރީ ހިނގުމުން އަޅައިގެން ދަތުރުކުރުމަށާއި، އޯކިޑް ރޫޓް (އާރް-10)ގެ ދަތުރުތައް މަޖީދީ މަގުންގޮސް، ވެސްޓް ޕަރކް ސްޓޮޕުން އަނބުރާލާގޮތަށް ވަނީ ދަތުރުތަކަށް ބަދަލުގެނެސްފައެވެ.

ބަސް ދަތުރުތަކަށް ގެނައި ބަދަލުތައް ސާފުކުރުމަށް އެމްޓީސީސީގެ ހޮޓްލައިން 1650އަށް ގުޅުމުން އިތުރު މަޢުލޫމާތު ލިބޭނެކަމަށް އެ ކުންފުނިން ބުނެއެވެ.

އަމީނީ މަގުގެ މަސައްކަތް ހުއްޓާލާފައިވަނީ، ސަރުކާރު ބަދަލުވުމުގެ މަރުޙަލާގައެވެ. ނަމަވެސް ކުރިއެކޭއެއްގޮތަށް އަނެއްކާވެސް މިހާރު ވަނީ މަގުގެ މަސައްކަތް ފަށާފައެވެ. ކޮންޓްރެކްޓަރ، ރޯޑް ޑިވެލޮޕްމަންޓް ކޯޕަރޭޝަނުން މަޢުލޫމާތުދޭގޮތުން، އެ މަސައްކަތް 1މަހާ 20 ދުވަހުން ނިންމުމަށް ވަނީ ޢަމާޒު ހިފާފައެވެ. ތާރުއަޅައިގެން އެ މަގު ތަރައްޤީކުރާއިރު، މަގުގައި ދުއްވާ ސަރަޙައްދު އިތުރަށް ފުޅާކޮށް ޒަމާނީ ބަދަލުތަކާއެކު ތަރައްޤީކުރުމަށް ވަނީ ހަމަޖެހިފައެވެ.