"ރަސްމާލެ" ވެގެންދާނީ ބޯހިޔާވަހިކަމުގެ ދާއިމީ ހައްލަށް: ރައީސުލްޖުމްހޫރިއްޔާ

ފުށިދިއްގަރު ފަޅު ހިއްކާ ތަރައްޤީކުރާ "ރަސްމާލެ" ވެގެންދާނީ މާލެ ސަރަޙައްދުގައި ޒަމާނުއްސުރެ އޮތް ބޯހިޔާވަހިކަމުގެ ބޮޑު މައްސަލައަށް ދާއިމީ ހައްލު ގެނެސްދޭނެ ބިޔަ މަޝްރޫޢަށްކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

"ރަސްމާލެ" މަޝްރޫޢު ފައްޓަވައިދެއްވީ އެކަމަށްޓަކާ ބޭއްވި ޚާއްސަ ރަސްމިއްޔާތެއްގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުއެވެ. ރައީސުލްޖުމްހޫރިއްޔާ ވިދާޅުވީ މިއީ މިހާތަނަށް ރާއްޖޭގައި ކުރިއަށްގެންދާ ބިން ހިއްކުމުގެ އެންމެ ބިޔަ މަޝްރޫޢުކަމަށެވެ.

މިމަޝްރޫޢުގެ ދަށުން 1153 ހެކްޓަރުގެ ބިން ހިއްކާނެއެވެ.

ރައީސުލްޖުމްހޫރިއްޔާ ވިދާޅުވީ ކެމްޕެއިންތަކުގައި ތަކުރާރުކޮށް ވަޢުދުވެވަޑައިގެންނެވިގޮތަށް، ސަރުކާރުން އެންމެ އިސްކަންދޭ މަސައްކަތްތަކުގެތެރޭގައި ގެދޮރުވެރިކަމާއި ބޯހިޔާވަހިކަމުގެ މަސައްކަތްތައް ހިމަނުއްވާފައިވާކަމަށެވެ. އެގޮތުން މިފެށިގެން ދިޔައީ މީގެތެރޭގައި ހިމެނޭ އެންމެ މުހިންމު މަޝްރޫޢުކަމަށް ރައީސް ވިދާޅުވިއެވެ. އަދި މިމަސައްކަތް ސަރުކާރުގެ ފުރަތަމަ 14 ހަފްތާގެ ތެރޭގައި ފެށިގެންދިޔައިރު، ބިން ހިއްކުމުގެ މަސައްކަތް 8 މަސްދުވަހުގެ ތެރޭގައި މުޅިން ނިންމަވާނެ ކަމަށް ރައީސް ވިދާޅުވިއެވެ. މިއީ ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހި އެއްކޮށްލުމުން ވާ ބޮޑުމިނަށްވުރެ، 3 ގުނަ ބޮޑު ރަށަކަށް ވާނެކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ "ރަސްމާލެ" ތަރައްޤީކުރަނީ ތިމާވެއްޓާއި ރައްޓެހި، އެންމެ ޒަމާނީ ބައިނަލްއަޤްވާމީ ފެންވަރުގައި ޤަބޫލުކުރާ މިންގަނޑުތަކަށްކަމަށެވެ. އަދި މި ސީޓީވެގެންދާނީ "ސޭފް އައިލެންޑް" ކޮންސެޕްޓަަށް ތަރައްޤީކުރާ ރަށަކަށް ކަމަށް އެމަނިކުފާނު ވިދާޅުވިއެވެ.

"ސޭފް އައިލެންޑް" ބައިނަލްއަޤްވާމީ މިންގަނޑަށް މިތަރައްޤީކުރަނީ. މެދަށް 3 މީޓަރު އުސްކޮށް، އަދި ރަށުގެ އަރިއަށް 2 މީޓަރު އުސްކޮށް. އަދި ފެހިކަން ގަދަ، ހިތްގައިމު ރަށަކަށްވާނެ. އަދި މި ސީޓީ ވެގެންދާނީ ރާއްޖޭގެ ފުރަތަމަ "0 ކަރބަން" ސިޓީއަށް. ދުއްވާނީ ތިމާވެއްޓާ ރައްޓެހި އުޅަނދު." ރައީސް ވިދާޅުވިއެވެ.

ރައީސް ވިދާޅުވީ ސީޓީއަށް ކަރަންޓުގެ ޚިދުމަތް ފޯރުކޮށްދޭނީ ތިމާވެއްޓާއި ރައްޓެހި ފުރިހަމަ ހަކަތައިގެ ނިޒާމަކުންކަމަށެވެ. އަދި ބޯހިޔާވަހިކަމުގެ މައްސަލައަށް ހައްލު ގެނައުމުގެ އިތުރުން، މިސިޓީވެގެންދާނީ މުޖުތަމަޢުގައި ތިބި އެހީތެރިކަން ބޭނުންވާ މީހުންނަށްވެސް ފަސޭހައިން ޚިދުމަތްތައް ހޯދޭނެހެން ފަރުމާކޮށްފައވާ "އިންކްލޫސިވް" ސިޓީއަކަށްކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.

ރައީސް ވިދާޅުވީ މީގެ 30 ދުވަސްކުރިން އެމަނިކުފާނު ރަސްމިއްޔާތެއްގައި ޢިޢުލާންކުރެއްވިގޮތަށް، 1މަސްދުވަހުގެ ތެރޭގައި ފުށިދިއްގަރު ފަޅު ހިއްކަން ފަށްޓަވާފައިވާކަމަށެވެ. މިގޮތަށް، ކޮންމެ ކަމެއްވެސް ވަޢުދުވިގޮތަށް، ޢަމަލީގޮތުން ދައްކަވާނެކަމަށް އެމަނިކުފާނުވަނީ ވިދާޅުވެފައެވެ.

ރައީސް ވިދާޅުވީ ސޭފް އައިލެންޑްގައި މީހުން އާބާދުކުރަން ފަށާއިރު، އެތަނުގައި ދުނިޔޭގެ ފެންވަރުގެ ޒަމާނީ ހައިސްޕީޑް ދަތުރުފަތުރުގެ ނިޒާމެއް ޤާއިމުކުރައްވާނެކަމަށެވެ. އެގޮތުން ކަނޑުދަތުރާއި އަދި ވައިގެ މަގުންވެސް ދަތުކުރެވޭނެ ޒަމާނީ ނިޒާމެއް ހަމަޖައްސަވާނެކަމަށް އެމަނިކުފާނު ވިދާޅުވިއެވެ.

"މާލެއާއި ރަސްމާލެއާއި ދެމެދު ޒަމާނީ އެކްސްޕްރެސް ޓްރާންސްޕޯޓް ސިސްޓަމެއް ޤާއިމުކުރާނަން. އަދި ވެލާނާ އިންޓަރނޭޝަނަލް އެއަރޕޯޓަށް ދަތި ނުވާގޮތަށް، "އެއަރ ސްޓްރައިޕް" ވައިގެ ދަތުރުގެ ނިޒާމެއްވެސް ޤާއިމުކުރާނަން." ރައީސް ވިދާޅުވިއެވެ.

ފުށިދިއްގަރު ފަޅުން ހިއްކާ ބިމުން 11000 ގޯއްޗާއި، 26000 އަށްވުރެ ގިނަ ފްލެޓް ދޫކުރައްވާނެކަން ރައީސުލްޖުމްހޫރިއްޔާ ވަނީ ހާމަކުރައްވާފައެވެ. އަދި ސީޓިއަށް ބޭނުންވާ އާއްމު ޚިދުމަތްތަކާއި، ވަޒީފާގެ ފުރުޞަތުތައްވެސް ފަހިކުރައްވާނެކަމަށް ރައީސް ވިދާޅުވިއެވެ.

ފުށިދިއްގަރު ފަޅު ހިއްކުމުގެ މަޝްރޫޢަށް 400މިލިއަނަށްވުރެ ގިނަ ރުފިޔާ ޚަރަދުކުވެއެވެ. މަސައްކަތް ކުރިއަށްގެންދަނީ ހައުސިން ޑިވެލޮޕްމަންޓް ކޯޕަރޭޝަނުން، ބޭރުގެ ދެ ކުންފުންޏަކާއި ހަވާލުކޮށްގެންނެވެ.