ގެދޮރު ބިނާކުރުމަށް ކުޑަ އިންޓްރެސްޓެއްގައި ލޯނު ދޭން އަންނަނީ ތައްޔާރުވަމުން: ރައީސް

ގެދޮރު ބިނާކުރުމުގެ މަސައްކަތަށް ކުޑަ އިންޓްރެސްޓެއްގައި ލޯނު ދޫކުރަން ފެށުމަށް ކުރަންޖެހޭ އިދާރީ މަސައްކަތް ފެށިގެން ކުރިއަށްދާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ފުށިދިއްގަރު ފަޅު ހިއްކުމުގެ މަޝްރޫޢުގެ ފައްޓަވައިދެއްވާ، ގެދޮރުވެރިކަމުގެ ދާއިރާއިން ސަރުކާރުން ކުރައްވަމުންގެންދަވާ މަސައްކަތްތަކާއި ގުޅޭގޮތުން ވާހަކަދައްކަވަމުން ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވީ، ރައްޔިތުންނަށް ވެވަޑައިގެންނެވި ވަޢުދުތައް ފުއްދަވައިދެއްވުމަށް ސަރުކާރުން ވަރުބަލިކަމެއްނެތި މަސައްކަތް ކުރައްވަމުން ގެންދަވާކަމަށެވެ.

"ހަފްތާ 14" އެޖެންޑާގައި ހިމެނޭ ކަންކަމުގެ ތެރެއިން، ގެދޮރުވެރިކަމަށް ކުޑަ އިންޓްރެސްޓެއްގައި ލޯނު ދޫކުރުމަށް ކުރަންޖެހޭ މަސައްކަތްތައްވެސް މިހާރު ފެށިގެން ކުރިއަށްދާ ކަމަށް ރައީސް ވިދާޅުވިއެވެ. މިމަސައްކަތުގެ %35 ނިމިފައިވާކަމަށް، "ހަފްތާ 14" އެޖެންޑާ އަޕްޑޭޓްގައިވެއެވެ. ލޯނު ދޫކުރުމާއި ގުޅޭ ސިޔާސަތު އެކުލަވާލާ، ސަރުކާރުގެ 14ވަނަ ހަފްތާގެ ކުރިން އިޢުލާންކުރެއްވުމަށް ވަނީ ހިމަނުއްވާފައެވެ.

މި ލޯނާއި މާލީ އެހީއަކީ، ގެދޮރު އެޅުމަށް ބިން އޮވެ، މާލީ ތަނަވަސްކަން ނެތުމުގެ ސަބަބުން ގެދޮރު އިމާރާތް ނުކުރެވިވާ މީހުންނަށް ސަރުކާރުން އެހީތެރިކަން ފޯރުކޮށްދިނުމަށް ހުލުވާލާ ފުރުޞަތެއް ކަމަށް ރައީސުލްޖުމްހޫރިއްޔާ ވިދާޅުވިއެވެ.

މީގެ އެއްމެ ބޮޑު ބޭނުމަކީ ނިމުނު ސަރުކާރުގައި ބޯހިޔާވަހިކަމުގެ ނަމުގައި ދޭން ނިންމި ބިންތައް ލިބުނު މީހުންނަށް، އެތަންތަނުގައި ގެދޮރު އެޅޭނެ މާލީ އެހީތެރިކަން ފޯރުކޮށްދިނުމެވެ.

"5% އަށްވުރެ ކުޑަ އިންޓްރެސްޓް ރޭޓުގައި ލޯނު ދޫކުރުމަށް ކުރަންޖެހޭ އިދާރީ އަދި ފަންނީ މަސައްކަތް ދަނީ ކުރިއަށް. އަދި ހައުސިން ލޯނު، ބޭންކިން ނިޒާމުގެ ތެރެއިން ލިބޭނެ ގޮތްތައް ވަރަށް އަވަހަށް އިޢުލާންކުރާނަން. މީގެއިތުރުން މާލެ ސަރަޙައްދުން ގޯތި ލިބުނު މީހުން، ގެ އެޅުމަށް ޚާއްސަ ލޯނު ދޫކުރާނަން." ރައީސް ވިދާޅުވިއެވެ.

"ހަފްތާ 14" އެޖެންޑާގައި ގޯތި ބިނާކުރުމަށް މާލީ އެހީދިނުމައި ގުޅޭ 2 ކަމެއް ވަނީ ހިމަނުއްވާފައެވެ. އެއީ ބޯހިޔާވަހިކަން ފޯރުކޮށްދިނުމަށް %5 އިންޓަރެސްޓުގައި ތަޢާރަފުކުރާ ލުއި ލޯނާބެހޭ ސިޔާސަތު އެކުލަވާލައި އާންމުކުރުމާއި، ބޯހިޔާވަހި ކަމަށް ޚާއްޞަކޮށްގެން ގެދޮރުވެރިކަމުގެ ޓްރަސްޓް ފަންޑެއް ޤާއިމުކުރުމަށް ބޭނުންވާ އޮނިގަނޑު އެކުލަވާލުމުގެ މަސައްކަތެވެ.

ސަރުކާރުންވަނީ ބޯހިޔާވަހިކަމާއި ގުޅުންހުރި ބޮޑެތި ބިޔަ މަޝްރުޢޫތަކެއް ހިންގުމަށް ނިންމަވާފައެވެ. މީގެތެރޭގައި ގްރޭޓަރ މާލެ އޭރިއާގެ އިތުރުން، އަތޮޅުތަކުގެ 7 ސަރަޙައްދެއް ހިމެނެއެވެ.