އަމާޒަކީ އަހަރެއްހާ ދުވަހުގެ ތެރޭގައި ހުރިހާ ރަށެއްގައި އާރްޓީއެލް ޚިދުމަތް ފޯރުކޮށްދިނުން: ރައީސް

ރާއްޖެ ޓްރާންސްޕޯޓް ލިންކް، އާރްޓީއެލް ހައި ސްޕީޑް ފެރީގެ ޚިދުމަތް އެއްއަހަރު ތެރޭގައި ހުރިހާ ރަށަކަށް ފޯރުކޮށްދިނުމަކީ އަމާޒެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ދިވެހިރާއްޖޭގެ އަޑުގެ 61 ވަނަ އަހަރީ ދުވަހާ ގުޅިގެން ގެނެސްދިން "ބާއްޖަވެރި ހެނދުނެއް"ގެ ޚާއްސަ ޕްރޮގްރާމްގައި އެހުންތެރިއެއްގެ ސުވާލަކަށް ޖަވާބުދެއްވަމުންނެވެ.

"ބާއްޖަވެރި ހެނދުނެއް"ގެ ޚާއްސަ ޕްރޮގްރާމްގައި އއ. އުކުޅަހުގެ އެހުންތެރިއަކުވަނީ ރާއްޖެ ޓްރާންސްޕޯޓް ލިންކުގެ ޚިދުމަތް މިހާރު ނުފެށި ހުރި ހުރިހާ ސަރަޙައްދުތަކުގައި ފަށާނީ ކިހާތާކުތޯ ސުވާލުކުރައްވާފައެވެ. އެސުވާލަށް ޖަވާބު ދެއްވަމުން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވީ އެމްޓީސީސީއަށް ސީއީއޯއަކު އައްޔަން ކުރެއްވުމަށްފަހު އާރްޓީއެލްގެ ޚިދުމަތް ވަރުގަދަކޮށް މިހާރު ޚިދުމަތް ފަށާފައި އޮތް ހިސާބުން ފެށިގެން މަސައްކަތްތައް ފެށުމަށް އަންގަވާފައިވާނެކަމަށެވެ. އެގޮތުން މިހާރު ބޭނުންކުރާ އުޅަނދުތަކަށްވުރެ ރަނގަޅު އަދި ގިނަ އުޅަނދުތަކެއް ޚިދުމަތުގައި ބައިވެރިކުރުމަށް ޕްލޭން ކުރައްވާފައިވާކަމަށް އެމަނިކުފާނު ވިދާޅުވިއެވެ. ރައީސް ވިދާޅުވީ ސަރުކާރުގެ އަމާޒަކީ ގިނަވެގެން އަހަރެއްހާ ދުވަހުގެ ތެރޭގައި އާރްޓީއެލްގެ ޚިދުމަތް މުޅި ރާއްޖެއަށް ފޯރުކޮށްދިނުންކަމަށެވެ.

"އެއަރޕޯޓްތަކާއެކު ސީ ޓްރާންސްޕޯޓް ވެސް ބޭނުންވާނެ. އިންވެސްޓް ކުރަން އިތުރު ފުރުޞަތުތައް ހޯދައިދީ އިތުރު މުވައްޒަފުން ހޯދުމުގެ މަސައްކަތްވެސް ކުރިއަށްދާނެ. އެހެންކަމުން އަހަރެއްހާދުވަހުގެ ތެރޭގައި އާރްޓީއެލް ފެރީގެ ޚިދުމަތް ގުޅާލާ އެކަން ނިންމުމަކީ އަމާޒެއް." ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވިއެވެ.

އާރްޓީއެލް ޚިދުމަތަކީ ކޮންމެ ދުވަހަކު ދެމުންދާ ޚިދުމަތަކަށް ވުމާއެކު، މިއީ ރައްޔިތުންނަށް ބަރޯސާވެވޭ ޚިދުމަތަކަށްވެސް ވަނީ ވެފައެވެ. ޚިދުމަތުގައި ބޭނުން ކުރަމުން އަންނަނީ އޭސީކޮށްފައި ހުންނަ، ބާރުދުވެލީގައި ދަތުރުކުރާ ޒަމާނީ ލޯންޗު ފެރީތަކެކެވެ. މިހާތަނަށް ހއ، ހދ، ށ އަދި ޅ އަތޮޅު އަދި ގއ، ގދ، ފުވައްމުލައް ސިޓީ އަދި އައްޑޫ ސިޓީގައި މިޚިދުމަތް ވަނީ ފަށާފައެވެ. ގިނަ މީހުން އާރްޓީއެލް ފެރީގެ ޚިދުމަތް ބޭނުންކުރަނީ ބޭސްފަރުވާގެ ޚިދުމަތް ހޯދުމަށް ދަތުރުކުރުމަށެވެ.

މިޕްރޮގްރާމްގައި ބޯހިޔާވަހިކަމުގެ މަޝްރޫޢުތަކާ ގުޅޭގޮތުން ސުވާލު ދެންނެވުމުން ރައީސުލްޖުމްހޫރިއްޔާ ވިދާޅުވީ ބޯހިޔާވަހިކަމުގެ މަޝްރޫޢަކީ ސަރުކާރުން އިސްކަމެއް ދެއްވައިގެން ކުރައްވާނެ މަސައްކަތެއްކަމަށެވެ. އަދި ފަސް އަހަރު ނިމޭއިރު ބޯހިޔާވަހިކަމަށް ޖެހިފައިތިބި އެއްވެސް މީހަކު ނުހުންނާނެކަމަށް ރައީސް ވިދާޅުވިއެވެ. ރައީސުލްޖުމްހޫރިއްޔާ ވިދާޅުވީ ވީހާވެސް ފުޅާކޮށް ރާއްޖޭގެ އެކި ހިސާބުތަކުގައި ބޯހިޔާވަހިކަމުގެ މަޝްރޫޢުތައް ކުރިއަށްގެންދަވާނެކަމަށެވެ. އެގޮތުން 20،000އިން 30،000 އަށް ބޯހިޔާވަހިކަމުގެ އެކި މަޝްރޫއުތައް ކުރިއަށްގެންދަވާނެކަމަށް ވިދާޅުވިއެވެ. އަދި ގެދޮރު ބިނާކުރުމަށްޓަކައި ލުއި ލޯނުތައް ދޫކުރުމުގެ މަސައްކަތްވެސް ކުރިއަށްދާނެ ކަމަށް ރައީސް ވިދާޅުވިއެވެ.