މާލޭގެ ފެންބޮޑުވާ މައްސަލަ ޙައްލުކުރުމަށް ހުރިހާ ކާނުތަކެއް ސާފުކުރުމަށް ޚާއްޞަ ޕްރޮގްރާމެއް
-
މި ޕްރޮގްރާމް ކުރިއަށް ދިއުމަށް ހަމަޖެހިފައިވަނީ އެއް ހަފްތާގެ މުއްދަތައް
-
މަޤްސަދަކީ މާލޭގެ މަގުތަކުގައި ފެންބޮޑުވާ މައްސަލައަށް ހައްލެއް ގެނައުން
-
އުންމީދަކީ މާލޭގެ ރައްޔިތުންނަށް ޖެހިފައިވާ ގޮންޖެހުންތަކަށް ލުޔެއް ލިބުން
މާލެ ސިޓީގެ މަގުތަކުގައި ފެންބޮޑުވާ މައްސަލަ ޙައްލުކުރުމުގެ ގޮތުން ހުރިހާ މަގުތަކުގެ ފެން ހިންދާ ކާނުތައް ސާފުކުރުމުގެ ޚާއްޞަ ޕްރޮގްރާމެއް ފަށައިފިއެވެ. މި ޕްރޮގްރާމް ފަށްޓަވައިދެއްވީ، ސިޓީތަކާއި އިދާރީ ދާއިރާތަކާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރެވެ.
މާލޭގެ މަގުތަކުގެ ކާނުތައް ސާފުކުރުމުގެ ޚާއްސަ ޕްރޮގްރާމް އިފްތިތާހުކުރެއްވުމަށް ބޭއްވި ޚާއްސަ ރަސްމިއްޔާތުގައި ވާހަކަފުޅުދައްކަވަމުން ސިޓީތަކާއި އިދާރީ ދާއިރާތަކާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވީ މިދިޔަ ހޮނިހިރު ދުވަހު މާލެއަށް ކުރި ވިއްސާރަގައި ފެންބޮޑުވި އެއް ސަބަބަކީ މަގުތަކުގައި ރަނގަޅަށް ފެން ހިނދޭ އިންތިޒާމެއް ނެތުމުގެ ސަބަބުންކަމަށެވެ. ނަމަވެސް އެ މައްސަލަތައް ޙަލުކުރުމަށް މި ސަރުކާރުން އިސްކަމެއް ދެއްވައިގެން މަސައްކަތްކުރައްވާކަން ވަޒީރު ފާހަގަކުރެއްވިއެވެ.
ހޮނިހިރު ދުވަހު ކުރި ވިއްސާރާގައި ބައެއް ގެތަކަށް ގެއްލުންވިކަން ފާހަގަކުރައްވާ ވަޒީރު ވިދާޅުވީ، މާލޭގެ މަގުތަކުގެ ކާނުތައް ސާފުކުރުމަށް ކުރިއަށްގެންދާ ޚާއްޞަ ޕްރޮގްރާމަކީ މާލޭގައި ދިރިއުޅޭ ރައްޔިތުންނަށާއި ޢާންމު މުޖުތަމައުގެ އެންމެހާ ފަރުދުންގެ ސަލާމަތާއި ރައްކާތެރިކަމަށް ނުހަނު މުހިންމު ކަމެއް ކަމަށެވެ.
"ޚާއްސަގޮތެއްގައި މާލޭގެ މަގުތަކުގައި ފެންބޮޑުވުމުގެ މައްސަލައަކީ ވަރަށް ގިނަ ދުވަސްވަންދެން އަޅުގަނޑުމެނަށް އެކަމަކަށް ދޭންވީ ސަމާލުކަން ނުދެވުމުގެ ސަބަބުން ކާނުތައް ރަނގަޅަށް ސާފުނުކުރެވި ގިނަ ދުވަސްތަކެއް ވުމުގެ ސަބަބުން ހިނގަމުން ދިޔަ ކަންތައްތައް" އާދަމް ޝަރީފް ޢުމަރު ވިދާޅުވިއެވެ.
އާދަމް ޝަރީފް ވިދާޅުވީ މާލޭގެ މަގުތަކުގައި ފެންބޮޑުވާ މައްސަލައަށް ހައްލެއް ގެނެސްދިނުމަށް މާލޭ ސިޓީ ކައުންސިލުން އިސްނަންގަވައިގެން، ހެލްތު މިނިސްޓްރީ އާއި އެޗްޕީއޭއާއި އަދި އެހެން ފަރާތްތަކާއި އެ ވުޒާރާ ގުޅިގެން ކުރިއަށްދާ މާލެ ސާފުކުރުމުގެ މަސައްކަތަކީ މުހިންމު އަދި މާލެއަށް ކޮންމެހެން ބޭނުންވެފައިވާ މަސައްކަތެއްކަމަށެވެ.
މި ރަސްމިއްޔާތުގައި ވާހަކަފުޅު ދައްކަވަމުން މާލެ ސިޓީގެ އެކްޓިންގ މޭޔަރ އަޙްމަދު ނަރީޝް ވިދާޅުވީ މާލޭ ސާފުކުރުމުގެ ގޮތުން ކުރިއަށް ގެންދިއުމަށް ހަމަޖެހިފައިވާ ހަރަކާތަކީ މާލޭގެ ކާނުތައް ސާފުކުރުމުގެ ގޮތުން އެއް ހަފްތާގެ މުއްދަތައް ހިންގުމަށް ހަމަޖެހިފައިވާ ޕްރޮގްރާމެއް ކަމަށެވެ.
"މީގެ ސަބަބުން މާލޭގެ ރައްޔިތުންނަށް ތަސައްލީއެއް އަދި ލުޔެއް ލިބޭނެ ކަމުގެ އަޒުމާއި އުންމީދުގައި ކުރިއަށް މި ގެންދަނީ. އަޅުގަނޑު ހިތުން މި ފެށިގެންދާ މަސައްކަތާއި އެކީގައި މާލޭގެ މަގުތަކުގެ ކާނުތަކަށް އިތުރު ލުއިތަކެއް ލިބި، ފެންހިންދުމަށް އިތުރު ބާރަކަށް ވެގެންދާނެކަމަށް އަޅުގަނޑުމެން އުންމީދުކުރަނީ." އެކްޓިންގ މޭޔަރު އަޙްމަދު ނަރީޝް ވިދާޅުވިއެވެ.
— Malé City Council (@MaleCitymv) January 6, 2024
މާލެ ސާފުކުރުމުގެ ޕްރޮގްރާމަކީ ސިޓީތަކާއި އިދާރީ ދާއިރާތަކާއި އާންމު މަސައްކަތްތަކާ ބެހޭ ވުޒާރާއާއި، މާލެ ސިޓީ ކައުންސިލާއި، ސިއްޙީ ވުޒާރާއާއި ވޭސްޓް މެނޭޖްމަންޓް ކޯޕަރޭޝަން، ވެމްކޯ ގުޅިގެން ކުރިއަށްގެންދާ ޕްރޮގްރާމެކެވެ.
މިއީ މާލޭގެ ބްލޮކްވެފައިވާ ކާނުތައް ސާފުކުރުމަށް އެއް ހަފްތާގެ މުއްދަތައް ކުރިޔަށް ގެންދެވޭ ޙާއްސަ ޕްރޮގްރާމެއް ނަމަވެސް ޕްރޮގްރާމް ނިމުމަށްފަހުވެސް އާދައިގެމަތިން ކާނުތައް ސާފުކުރުމުގެ މަސައްކަތް މާލެސިޓީ ކައުންސިލުން ކުރިޔަށް ގެންދަވާނެކަމަށް އެ ކައުންސިލުން ވިދާޅުވެއެވެ.