މާލެއާއި ވިލިމާލޭގެ ހުރިހާ މަގެއް ތަރައްޤީކުރުމުގެ މަސައްކަތް މިއަހަރު ފަށަނީ

މާލެއާއި ވިލިމާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ އަމަލީ މަސައްކަތް މިއަހަރުގެ ތެރޭގައި ފަށްޓަވާނެކަމަށް ސަރުކާރުން ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ޗައިނާއަށް ކުރައްވަމުން ގެންދަވާ ދަތުރުފުޅުގެ ތެރެއިން އިއްޔެ ވަނީ މާލެއާއި ވިލިމާލެ މަގުތައް ތަރައްޤީކުރުމުގެ އެއްބަސްވުމުގައި ޗައިނާއާއެކު ސޮއިކޮށްފައެވެ. މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ އިމާރާތް ކުރުމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބްއެވެ.

ސަރުކާރުން ވިދާޅުވީ މާލޭއާއި ވިލިމާލޭގެ މަގުތައް ތަރައްޤީކުރުމުގެ ޢަމަލީ މަސައްކަތް މިއަހަރުގެ ތެރޭގައި ފަށްޓަވާނެކަމަށެވެ. އަދި އެ މަޝްރޫޢުގެ އަމަލީ މަސައްކަތް ފެށުމުގެ ކުރިން ކުރަން ޖެހޭ ދިރާސާތައް ކުރައްވަމުން ގެންދަވާނެކަމަށާއި އަމާޒަކީ މި 5 އަހަރުތެރޭގައި މަގުތައް ހަދާ ނިންމުންކަމަށް ސަރުކާރުން ވިދާޅުވެއެވެ.

މާލޭގެ މަގުތަކަކީ ދުވަސްވެ މަރާމާތެއް ކޮށްފައި ނެތުމުގެ ސަބަބުން ވަރަށް ބޮޑަށް ހަލާކުވެފައި އޮތްމަގުތަކެކެވެ. މީގެ އިތުރުން މިހާރު އޮތް މަގުތަކަކީ ފެންހިންދާ ރަނގަޅު ނިޒާމަކާއެކު ހަދާފައި އޮތް މަގުތަކަށް ނުވުމުގެ ސަބަބުން މަގުތަކުގައި ފެންބޮޑުވެ ގޭގެއަށް ފެންވަދެ އެކި ވަރުގެ ގެއްލުންތައް ލިބިފައި އެބަހުއްޓެވެ. މިގޮތުން ދާދިފަހުން މާލެއަށް ބޯކޮށް ވާރޭވެހި ފެންބޮޑުވެ ގޭގެއަށް ފެންވަނުމުގެ ހާދިސާއާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުއިއްޒުވަނީ މާލޭގެ ހުރިހާ މަގެއް ޒަމާނީ ފެންވަރަށް ތަރައްޤީ ކުރުމަށް ނިންމާފައިވާކަން ހާމަކުރައްވާފައެވެ. އަދި މަގުތައް ތަރައްޤީކުރާނީ ފެންހިންދާ ރަނގަޅު ނިޒާމަކާއެކުކަމަށް ރައީސުލްޖުމްހޫރިއްޔާ ވިދާޅުވިއެވެ.

މާލޭގެ މަގުތައް ހެދިގެން ދާނީ ފެނާއި ނަރުދަމާގެ ނިޒާމާއި ކަރަންޓު އަޕްގްރޭޑް ކުރުމާއި ސްޓޯމް ވޯޓާ ނިޒާމާއި ފަޔާ ހައިޑްރަންޓްގެ ނިޒާމުވެސް ގާއިމުކޮށްގެން ކަމަށް ސަރުކާރުން ވިދާޅުވެއެވެ. އަދި މާލޭގެ ހުރިހާ މަގެއް ތަރައްޤީ ކުރުމަށް 100 މިލިޔަންވުރެ ގިނަ ޑޮލަރު ޚަރަދުވާނެކަމަށްވެސް ސަރުކާރުން ލަފާކުރައްވައެވެ.

މާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ އިތުރަށް ސަރުކާރުން ވަނީ ވިލިމާލޭގެ މަގުތައްވެސް ތަރައްޤީކުރުމަށް ނިންމަވާފައެވެ. އެގޮތުން ވިލިމާލޭގެ މަގުތައް ތަރައްޤީކުރުމަށްޓަކައި ދިރާސާއެއް ހެދުމަށް އާރްޑީސީއާ ވަނީ ހަވާލުކޮށްފައެވެ. މި މަޝްރޫޢުގެ ދަށުން ވިލިމާލޭގައި 5.6 ކިލޯމީޓަރުގެ މަގު ތަރައްޤީކުރުމަށް ހަމަޖެހިފައިވެއެވެ.