ޕަޕުއާ ނިއު ގީނީގައި ހިނގި ހަމަނުޖެހުންތަކެއްގައި 16 މީހުން މަރުވުމުން އެ ޤައުމުގައި ކުއްލި ޙާލަތު އިޢުލާނުކޮށްފިއެވެ.
ހަމަނުޖެހުންތައް ހިންގައިފައި ވަނީ މުސާރަ ކުޑަކުރުމުން ފުލުހުންނާއި ޕަބްލިކް ސެކްޓަރުގައި މަސައްކަތްކުރާ މުވައްޒަފުންނެވެ. ވީޑިއޯތަކުން ފެންނަ ގޮތުގައި ހަމަނުޖެހުންތަކުގައި އެތައް ހާސް ބަޔަކު ވަނީ މަގުމައްޗަށް ނުކުމެ ތަންތަން ލޫޓުވައިފައެވެ. ހަމަނުޖެހުންތަކުގެ ސަބަބުން އެ ޤައުމުގެ ވެރިރަށް ޕޯޓް މޯޒްބީން ނުވަ މީހުން މަރުވެފައިވެއެވެ. އަދި ލާއޭ ސިޓީގައި އިތުރު ހަތް މީހުން ވަނީ މަރުވެފައެވެ.
ހަމަނުޖެހުންތަކާ ގުޅިގެން ޕަޕުއާ ނިއު ގިނީގެ ފުލުހުންގެ އިސްވެރިޔާއާއި ޑިޕާޓުމަންޓުތަކުގެ އިސްވެރިން މަޤާމުގެ މަސްއޫލިއްޔަތުން ދުރުކޮށްފައިވާ ކަމަށް އެ ޤައުމުގެ ބޮޑުވަޒީރު ޖޭމްސް މަރަޕޭ ވިދާޅުވިއެވެ. އިތުރު ހަމަނުޖެހުމެއް ހިނގުން ހުއްޓުވުމަށް 1،000 ސިފައިން ތައްޔާރީ ޙާލަތަށް ގެނެސްފައިވާ ކަމަށް ވެސް މަރަޕޭ ވިދާޅުވިއެވެ.