ހުއްޓިފައިވާ 32 މަޝްރޫޢެއްގެ މަސައްކަތް އަލުން ފަށައިފިން: ވަޒީރު މުއްޠަލިބް
-
64 މަޝްރޫޢަކީ އެމްޓީސީސީއާއި އާރްޑީސީއާ ހަވާލުކޮށްފައިވާ މަޝްރޫޢު
-
ސޮއިކުރުމަށްފަހު މަސައްކަތް ފެށިފައިނުވާ 83 މަޝްރޫޢެއް އެބައޮތް
-
އަމިއްލަ ކުންފުނިތަކާ ހަވާލުކުރެވިފައިވާ ގިނަ މަޝްރޫޢުވަނީ ނުފެށި
ހުއްޓިފައިވާ 32 މަޝްރޫޢެއްގެ މަސައްކަތް އަލުން ފަށާފައިވާ ކަމަށް އިމާރާތްކުރުމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވެއްޖެއެވެ.
އިމާރާތްކުރުމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބް މިހެން ވިދާޅުވީ ސަރުކާރުން ބައެއް މަޝްރޫޢުތައް ހުއްޓާލަމުން ގެންދާ ކަމަށް ވިދާޅުވެ ކުރީގެ ރައީސް އިބްރާހިމް މުހައްމަދު ޞާލިހު ރޭ ދެއްކެވި ވާހަކަފުޅާ ގުޅިގެންނެވެ.
"އެކްސް" ގައި ކުރެއްވި ޕޯސްޓެއްގައި އިމާރާތްކުރުމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވީ ކުރީ ސަރުކާރު ނިމުނުއިރު ހަވާލުކޮށްފައިވާ މަޝްރޫޢުތަކުގެ ތެރެއިން ގިނަ މަޝްރޫޢުތަކެއް އޮތީ ހުއްޓިފައިކަމަށެވެ. އެގޮތުން އެމްޓީސީސީއާއި އާރްޑީސީއާ ހަވާލުކޮށްފައިވާ މަޝްރޫޢުތަކުގެ ތެރެއިން 64 މަޝްރޫޢެއްގެ މަސައްކަތް ފެށުމަށްފަހު ކުރިއަށް ނުގެންގޮސް ހުއްޓިފައި އޮތްކަމަށެވެ.
އަދި އޭގެ ތެރެއިން 32 މަޝްރޫޢެއްގެ މަސައްކަތް އަލުން ފަށާފައިވާކަމަށް ވަޒީރު ވިދާޅުވިއެވެ. ވަޒީރު ވިދާޅުވީ އެމަޝްރޫޢުތަކުގެ އިތުރަށްވެސް އެ ދެކުންފުންޏާއެކު އެބަސްވުންތަކުގައި ސޮއިކުރުމަށްފަހު މަސައްކަތް ފެށިފައިނުވާ 83 މަޝްރޫޢެއް އޮތްކަމަށެވެ.
މީގެ އިތުރުން ފެނަކަ، އެމް.ޑަބްލިއު.އެސް.ސީ އަދި އަމިއްލަ ކުންފުނިތަކާ ހަވާލުކުރެވިފައިވާ ވަރަށް ގިނަ މަޝްރޫތައްވެސް ނުފެށި ހުއްޓިފައި ހުރިކަން ވަޒީރު ފާހަގަކުރެއްވިއެވެ.
ސަރުކާރުގެ އަމާޒަކީ ހުއްޓިފައިވާ ހުރިހާ މަޝްރޫއެއް ވީހާވެސް އަވަހަކަށް ފެށުން ކަމަށްވެސް ވަޒީރު ޑރ.މުއްޠަލިބު ވިދާޅުވިއެވެ.
ކުރީ ސަރުކާރުގެ ފަހު ދައުރުގައި ރާއްޖޭގެ އެކި ސަަރަޙައްދުތަކުގައި ތަރައްޤީގެ ގިނަ މަޝްރޫޢުތަކެއް ކުރިއަށް ގެންދިޔުމަށްޓަކައި ކުންފުނިތަކާ ހަވާލުކުރެއްވިއެވެ. އަދި އޭގެ ކުރިންވެސް އެކި ކުންފުނިތަކާ މަސައްކަތް ހަވާލުކޮށް އެކި ސަބަބުތަކާ ހުރެ މަސައްކަތް ނުފެށި ލަސްވެ އަދި ހުއްޓިފައި ހުރިކަން ފާހަގަކޮށްލެވެއެވެ.