ހުޅުމާލެ 3ވަނަ ފިޔަވަހިން 15 ހެކްޓަރު މިހާތަނަށް ހިއްކައިފި

ހުޅުމާލޭ 3 ވަނަ ފިޔަވަހި ބިން ހިއްކުމުގެ މަސައްކަތުގެ ދަށުން މިހާތަނަށް 15 ހެކްޓަރުގެ ބިން ހިއްކާ ނިންމާފައިވާކަމަށް ހައުސިން ޑިވެލޮޕްމެންޓް ކޯޕޮރޭޝަން (އެޗްޑީސީ)ން ވިދާޅުވެއްޖެއެވެ. ހުޅުމާލެ 3 ވަނަ ފިޔަވަހި ހިއްކުމުގެ މަސައްކަތް ކުރަމުން ދަނީ އެކި މަރުހަލާތަކަށް ބަހާލައިގެންނެވެ.

ހުޅުމާލެ 3 ވަނަ ފިޔަވަހި ހިއްކުމުގެ މަސައްކަތުގެ ދަށުން ފުރަތަމަ މަރުހަލާގެ 10 ހެކްޓަރުގެ މަސައްކަތް ނިންމުމަށް ފަހު ދެވަނަ މަރުހަލާ ހިއްކުމުގެ މަސައްކަތް ފަށާފައިވަނީ މިދިޔަ މަހުގެ 30 ވަނަ ދުވަހުގައެވެ. ދެވަނަ ފިޔަވަހީގައި ހިއްކަން ހަމަޖެހިފައިވާ ޖުމްލަ 29 ހެކްޓަރުގެ ތެރެއިން 5 ހެކްޓަރު މިހާރު ވަނީ ހިއްކާފައެވެ. އަދި ތިންވަނަ މަރުހަލާގައި ހިއްކުމަށް ހަމަޖެހިފައިވާ 24 ހެކްޓަރުގެ ބިމާއެކު ޖުމްލަ 63 ހެކްޓަރުގެ ބިން ހިއްކާނެއެވެ.

ބިން ހިއްކުމުގެ މަސައްކަތް ތާވަލާ އެއްގޮތަށް ކުރިއަށްދާ ކަމަށާއި މިހާރު ވެސް 24 ގަޑިއިރު މަސައްކަތް ކުރަމުންދާ ކަމަށް އެޗްޑީސީން ވިދާޅުވެއެވެ. އަދި މިހާރު ހިއްކަމުން ދަނީ ވަރަށް ފުން ސަރަޙައްދެއް ކަމަށް ވެސް އެޗްޑީސީން ވިދާޅުވެއެވެ.

ހުޅުމާލެއިން އަލަށް ހިއްކާ ބިމުން ގެދޮރުވެރިކަމުގެ ބޭނުންތަކަށާއި ސިނާއީ ބޭނުންތަކަށާއި މެރީނާގެ ބޭނުމަށް ބިން ބޭނުން ކުރާނެ ކަމަށް އެޗްޑީސީން ވަނީ ވިދާޅުވެފައެވެ. އަދި އަލަށް ހިއްކާ ސަރަޙައްދުން މާލޭ ރައްޔިތުންނަށް ޚާއްޞަކޮށްގެން ގޯތި ދިނުމަށް ވެސް ވަނީ ނިންމާފައެވެ. ބޯހިޔާވަހިކަމުގެ ސިޔާސަތުގެ ދަށުން މާލެ ސަރަޙައްދުން ބަންޑާރަގޯތި ދޫކުރުމަށް ހިންގާ ބިންވެރިޔާ ސްކީމުން ގޯއްޗަށް ހުޅުވާލި ފުރުސަތުގައި 1،351 ގޯތި ހުޅުމާލެއިން ދޫކުރުމަށް ވަނީ ނިންމަވާފައެވެ.

ހުޅުމާލޭގައި މިހާރު ތަރައްޤީކުރަމުންދާ ދެވަނަ ފިޔަވައްސެކޭ އެއްފަދައިން 3 ވަނަ ފިޔަވަހީގައި ވެސް ގިނަ ޚިދުމަތްތަކާއި ވަޞީލަތްތައް ތަރައްޤީ ކުރުމަށް ހަމަޖެހިފައިވާ ކަމަށް އެޗް.ޑީ.ސީން ވަނީ މީގެ ކުރިން ވިދާޅުވެފައެވެ. އެ ގޮތުން އެ ފިޔަވަހި ވެސް ތަރައްޤީ ކުރާނީ މަގުތަކާއި ބްރިޖުގެ އިތުރުން ޕާކްތަކާއި ކުޅިވަރާއި މުނިފޫހިފިލުވުމުގެ ޙަރަކާތްތަކަށް ވެސް ގިނަ ފުރުޞަތުތަކެއް ފަހިވާނެގޮތަށް ކަމަށް އެޗްޑީސީން ވަނީ ވިދާޅުވެފައެވެ.