ލުބްނާނުގައި ޙަރަކާތްތެރިވާ ޙިޒްބުالله ޖަމާޢަތުން ޔަހޫދީންގެ ރަށެއް ކަމުގައިވާ ކިރިޔަތު ޝުމޯނޭއަށް ވަރުގަދަ ރޮކެޓް ޙަމަލަތަކެއް ދީފިއެވެ. ކިރިޔަތު ޝުމޯނޭއަކީ ލުބްނާނުގެ ސަރަޙައްދީ ރޮނގު ކައިރީގައި އޮންނަ ރަށެކެވެ.
ޙިޒްބުاللهން ބުނީ އެއީ ޔަހޫދީން ލުބްނާނަށް ދީފަައިވާ ވައިގެ ޙަމަލާތަކެއްގައި އެ ޖަމާޢަތުގެ ޞިއްޙީ ޚިދުމަތްތެރިންގެ ތެރެއިން ދެ މީހަކު ޝަހީދު ކޮށްލާފައިވާތީ އެ ކަމުގެ ރައްދުގައި ދީފައިވާ ޙަމަލާތަކެއް ކަމުގައެވެ. ޔަހޫދީންގެ ޙަމަލާތައް އަމާޒު ކޮށްފައި ވަނީ ލުބްނާނުގެ ޞިއްޙީ މަރުކަޒަކަށް ކަމުގައި ވެސް ޙިޒްބުاللهން ބުންޏެވެ.
ޔަހޫދީ ދަޢުލަތުގެ އުތުރުގައި އޮންނަ ކިރިޔަތު ޝުމޯނޭގެ އިތުރުން އެ ރަށާ އިންވެގެން އޮންނަ މަރްގަލިއޯޓަށް ވެސް 10 ރޮކެޓް ޙަމަލާ ޙިޒްބުاللهން ދީފައިވެއެވެ. އޭގެ ތެރެއިން ތިން ޙަމަލާއެއް ދިފާޢުކޮށް ވައްޓައިލާފައިވާނެ ކަމުގައި ޔަހޫދީ ފައުޖުން ބުނެއެވެ. ޙިޒްބުاللهގެ ޙަމަލާތަކުގައި އެއްވެސް މީހެއްގެ ފުރާނައަށް ނުރައްކާވި ކަމެއް ސާފެއް ނޫނެވެ.
ޙިޒްބުاللهއާއި ޔަހޫދީންނާ ދެމެދު ޙަމަލާ ބަދަލު ކުރަމުން ދަނީ އޮކްޓޫބަރު 7 ވަނަ ދުވަހު ފަލަސްޠީނުގެ ޣައްޒާގައި ދިރިއުޅޭ މުސްލިމުންނާ ދެކޮޅަށް ޔަހޫދީ ފައުޖުން ފެށި ލާއިންސާނީ ޢުދުވާނާ ގުޅިގެންނެވެ. ޙިޒްބުاللهން ޔަހޫދީންގެ ރަށްތަކަށް ޙަމަލާދޭން ފަށާފައި ވަނީ ޣައްޒާގައި ވެރިކަން ކުރާ ޙަމާސް ޖަމާޢަތަށް ތާޢީދު ކުރުމުގެ ގޮތުންނެވެ. އެއީ ޔަހޫދީންގެ ލާއިންސާނީ ޢުދުވާން ހުއްޓުމަކަށް ގެންނަން ބާރު އެޅުމުގެ ގޮތުން ފަށާފައިވާ ޙަމަލާތަކެކެވެ. ޙިޒްބުاللهއަށް ރައްދު ދިނުމުގެ ގޮތުން ޔަހޫދީން ދީފައިވާ ތަފާތު ޙަމަލާތަކުގައި ލުބްނާނުގެ ޢާންމުންގެ 20 މީހުންނާއި ޙިޒްބުاللهގެ 150 މެންބަރުން ވަނީ ޝަހީދުކޮށްލާފައެވެ.
ޣައްޒާގެ މުސްލިމުންނާ ދެކޮޅަށް ޔަހޫދީން ފަށާފައިވާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 23,708 އަށް އުފުލިފައެވެ. އަދި ޒަޚަމުކޮށްލާފައިވާ މީހުންގެ ޢަދަދު 60,000 އަށް އަރައެވެ. އޭގެ ތެރޭގައި 9,000 އަށްވުރެ ގިނަ ޢަދަދަކަށް ކުޑަކުދިން ހިމެނެއެވެ.