ޔަމަނުގައި ޙަރަކާތްތެރިވާ ހަތިޔާރުއެޅި ޙޫޘީ ޖަމާޢަތާ ދެކޮޅަށް އެމެރިކާގެ އަސްކަރިއްޔާއިން އިސްވެ އިތުރު ޙަމަލާތަކެއް ދީފިއެވެ. ޙޫޘީންނަށް އަމާޒުކޮށް އެމެރިކާގެ އަސްކަރިއްޔާއިން ޙަމަލާތައް ދޭން ފަށައިފައި ވަނީ ރަތް ކަނޑުން ޔަހޫދީންގެ ރަށްތަކަށް ދަތުރުކުރާ ބޯޓުފަހަރަށް ޙޫޘީ ޖަމާޢަތުން ދެމުންދާ ޙަމަލާތައް ހުއްޓުވުމަށް ކަމަށް ބުނެއެވެ.
އެމެރިކާއިން އަސްކަރިއްޔާއިން ޔަމަނަށް އިތުރު ޙަމަލާތައް ދީފައި ވަނީ އާގު ބޯޓުތަކަށް ދޭ ޙަމަލާތައް ހުއްޓައިނުލައިފިނަމަ ޙޫޘީންނަށް ދޭ ޙަމަލާތައް އެމެރިކާއިން ހުއްޓައިނުލާނެ ކަމަށް އެމެރިކާގެ ރައީސް ޖޯ ބައިޑެން ވިދާޅުވެފައިވަނިކޮށެވެ. ޔަމަނަށް އެންމެ ފަހުން ދިން ޙަމަލާތައް އަމާޒުކޮށްފައި ވަނީ ވެރިރަށް ޞަންޢާގެ ރާޑަރުތަކަކަށެވެ. ދެ ދުވަހުގެ މަތިން ޔަމަނުގެ 70އަށްވުރެ ގިނަ އަމާޒަށް 100އަށްވުރެ ގިނަ ޙަމަލާ ދީފައިވެއެވެ. އެމެރިކާއިން ދެމުންދާ ޙަމަލާތަކުގައި އިނގިރޭސިވިލާތުން ވެސް ބައިވެރިވެއެވެ.
ރަތް ކަނޑުން ޔަހޫދީންގެ ރަށްތަކަށް ދަތުރުކުރާ ބޯޓުފަހަރުތަކަށް ޙޫޘީން ދެމުންދާ ޙަމަލާތަކުގެ ސަބަބުން ދުނިޔޭގެ ބޮޑެތި ޝިޕިން ކުންފުނިތަކުން ވަނީ ރަތް ކަނޑުން ކުރާ ދަތުރުތައް ހުއްޓައިލައިފައެވެ. ބައެއް ކުންފުނިތަކުން ވަނީ ރަތް ކަނޑުގެ ބަދަލުގައި ދެކުނު އެފްރިކާގެ ވަށައިލައިގެން ދަތުރުކުރަން ފަށައިފައެވެ. އެއާއެކު ކަނޑުމަގުން ކޮންޓޭނަރުގައި މުދާ އުފުލުމަށް ނަގާ އަގުތަކާއި ތެލުގެ އަގު ވެސް ވަނީ އުފުލިފައެވެ. ރަތް ކަނޑުގެ ބަދަލުގައި ދެކުނު އެފްރިކާ ވަށައިލައިގެން ދަތުރުކުރުމަށް ގާތްގަނޑަކަށް އިތުރު 10 ދުވަސް ހޭދަވެއެވެ. އަދި އެ ދަތުރުގެ އެއްކޮޅަށް ދުވާލަކަށް 10 މިލިއަން ޑޮލަރުގެ ތެޔޮ ބޭނުންވެއެވެ.