ޢިރާޤާއި ސޫރިޔާގައި ޙަރަކާތްތެރިވާ ކުރުދީ ހަނގުރާމަވެރި ޖަމާޢަތްތަކާ ދެކޮޅަށް ތުރުކީވިލާތުން ވަރުގަދަ ވައިގެ ޙަމަލާތަކެއް ދީފިއެވެ. އެ ޙަމަލާތައް ދީފައި ވަނީ ޢިރާޤުގައި ޙަރަކާތްތެރިވަމުންދިޔަ ތުރުކީވިލާތުގެ ސިފައިންގެ ނުވަ މީހަކު ކުރުދީން މަރާލުމުންނެވެ. ތުރުކީވިލާތުގެ ސިފައިން މަރުވެފައިވަނީ ޢިރާޤުގައި ހުންނަ ތުރުކީވިލާތުގެ އަސްކަރީ މަރުކަޒަކަށް ދިން ޙަމަލާއެއްގައެވެ.
ތުރުކީވިލާތުގެ ދިފާޢީ ވުޒާރާއިން ބުނީ ރައްދުގައި ޢިރާޤުގެ 29 އަމާޒަކަށް ޙަމަލާދީފައިވާނެ ކަމަށާއި އޭގެ ތެރޭގައި ކުރިދީސްތާން ވޯކާރސް ޕާޓީ (ޕީކޭކޭ)އާއި ސޫރިޔާގައި ތިބި ކުރުދީ ޖަމާޢަތެއް ކަމަށްވާ ޕީޕަލްސް ޕްރޮޓެކްޝަން ޔުނިޓްސް (ވައިޕީޖޭ)އަށް ނިސްބަތްވާ ބިންގަރާސްތައް ހިމެނޭ ކަމަށް އެ ވުޒާރާއިން ބުނެއެވެ. އެ ޙަމަލާތަކުގައި ކުރުދީންގެ އަށް މީހުން ވަނީ މަރުވެފައެވެ.
ޙަމަލާތަކާ ގުޅިގެން ކުރުދީން އަދި ޢިރާޤުން ވެސް އެއްވެސް އެއްޗެއް ބުނެފައެއް ނުވެއެވެ. މީގެ ކުރިން ވެސް ތުރުކީވިލާތުން ވަނީ ކުރުދީންގެ އަމާޒުތަކަށް ޙަމަލާ ދީފައެވެ. އެ ގޮތުން 2022 ވަނަ އަހަރުގެ އޭޕްރީލް މަހު ތުރުކީވިލާތުން ވަނީ އޮޕަރޭޝަން ކްލޯ-ލޮކްގެ ނަމުގައި ޢިރާޤުގެ އުތުރުގައި އަސްކަރީ ޙަރަކާތެއް ފަށާފައިވެއެވެ. އަދި ޢިރާޤުގައި އޮންނަ ކުރުދީ ސަރަޙައްދެއް ކަމަށްވާ ދިހޫކްގައި އަސްކަރީ މަރުކަޒުތަކެއް ތުރުކީވިލާތުން ޤާއިމުކޮށްފައިވެއެވެ. ޢިރާޤުން ވަނީ ތުރުކީވިލާތުގެ ސިފައިން އެ ޤައުމުން ގެންދިއުމަށް ގޮވައިލައިފައެވެ.