ޔަހޫދީ އިސްތިޢުމާރީ ފައުޖުން ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނަށް 100 ދުވަސް ފުރޭއިރު، މުސްލިމުންނާ ދެކޮޅަށް ޔަހޫދީން ހިންގަމުންދާ ޤަތުލުޢާންމު ހުއްޓައިލާނެ ކަމުގެ ކޮޅުމަތި ފެންނާކަށް ނެތެވެ. ފެންނަމުން ދަނީ އޭގެ އިދިކޮޅެވެ. މުސްލިމުންގެ ގެދޮރަށް އަސްކަރީި އުޅަނދުފަހަރު ބޭނުން ކޮށްގެން ބޮންއެޅުން އިތުރު ކުރަމުންދާ މަންޒަރެވެ. އަދި އަސްކަރީ ޓޭންކުފަހަރާ އެހެނިހެން ބަރުހަތިޔާރު ބޭނުން ކޮށްގެން މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތައް އިތުރު ކުރަމުންދާ މަންޒަރެވެ.
ޣައްޒާގެ ސަރަޙައްދުތަކުން މުވާސަލާތީ ޚިދުމަތްތަކާއި އިންޓަނެޓުގެ ޚިދުމަތް ކަނޑައިލާފައި އޮންނަތާ ތިން ދުވަސްވީއެވެ. އެ ޚިދުމަތްތަކާ ނުލައި ޔަހޫދީންގެ ޢުދުވާންތަކުގައި ޒަޚަމުވެފައިވާ މީހުން ސަލާމަތް ކޮށްގެން ހަސްފަތާލުތަކަށް ފަރުވާދޭން ގެންދަން އެމްބިޔުލާންސްތަކާއި ޞިއްޙީ ޚިދުމަތްތެރިންނަށް ވަނީ އިތުރު ގޮންޖެހުންތަކެއް ކުރިމަތިވެފައެވެ.
ޔަހޫދީންގެ އެންމެ ފަހުގެ ޙަމަލާތައް އަމާޒު ކުރަމުން ދަނީ ޣައްޒާގެ ދެކުނުގައި އޮންނަ ޚާން ޔޫނިސާއި މެދުތެރޭގައި އޮތް އަލް-ބުރަޔިޖާއި އަލް-މަޣާޒީއަށެވެ. އެންމެ ގިނައިން ބޮން އަޅާފައި ވަނީ އެ ރަށްތަކުގައި އޮންނަ ރެފިއުޖީ ކޭމްޕުތަކަށެވެ. ފާއިތުވި 24 ވަރަކަށް ގަޑިއިރުގެ ތެރޭގައި ޔަހޫދީ ފައުޖުން ވަނީ ޣައްޒާގެ 125 މީހުން ޝަހީދު ކޮށްލާފައެވެ. އަދި އިތުރު 265 މީހުން ޒަޚަމު ކޮށްލާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ހާމަ ކުރެއެވެ.
އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 24,000 އަށް އިތުރުވެފައެވެ. އޭގެ ތެރޭގައި 9,000 އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި ޒަޚަމު ކޮށްލާފައިވާ މީހުންގެ ޢަދަދު ވަނީ 60,000 ފަހަނަ އަޅާފައެވެ.
ޔަހޫދީން ޣައްޒާގެ މުސްލިމުންނާ ދެކޮޅަށް ޢުދުވާން ހިންގަން ފަށާފައި ވަނީ ޣައްޒާގައި ވެރިކަން ކުރާ ޙަމާސް ޖަމާޢަތުން ޔަހޫދީންގެ ދެކުނުގައި އޮތް ރަށްތަކަށް އަރައި ދިން ޖިހާދީ ޙަމަލަތަކާ ގުޅިގެންނެވެ. "އަޅުގަނޑުމެންގެ އަމާޒަކަށްވީ ހަނގުރާމައެއް ފެށުމެއް ނޫން. އަޅުގަނޑުމެންގެ ހަމައެކަނި އަމާޒަކީ [ޔަހޫދީންގެ އަޅުވެތިކަމުން] މިނިވަން ކަން ހޯދުން،" ޙަމާސްގެ ޖިހާދާ ގުޅޭ ގޮތުން ވާހަކަފުޅު ދައްކަވަމުން އެ ޖަމާޢަތުގެ އިސްވެރިޔާ އިސްމާޢީލް ހަނިއްޔާ ވިދާޅުވިއެވެ.
ޔަހޫދީންގެ ޤަތުލުޢާންމު ހުއްޓައިލަން މުޅި ދުނިޔެއިން އެއް އަޑަކުން ގޮވަމުން ދިޔަ ނަމަވެސް ޔަހޫދީންނަށް އެ އަޑު އިވޭ ކަމަކަށް ނުވެއެވެ. އަދި ޢުދުވާންތައް ހުއްޓައިލަން ދަނީ ފާޅުގައި ދެކޮޅު ހަދަމުންނެވެ. ޔަހޫދީންގެ މި ޢުދުވާނަކީ އެމެރިކާގެ ފުރިހަމަ އެހީތެރިކަމާއި އެއްބާރުލުމާ އެކު ހިންގަމުންދާ ޤަތުލުޢާންމެކެވެ. ފަލަސްޠީނުގެ ރައްޔިތުންގެ ގެދޮރަށް ޔަހޫދީ ފައުޖުން އަޅަމުންދާ ބޮންތަކަކީ އެމެރިކާއިން ފޯރުކޮށްދީފައިވާ ހަތިޔާރުތަކެވެ.
މުސްލިމުންގެ ދިފާޢުގައި ޔަހޫދީންނާ ދެކޮޅަށް ތެދުވެފައިވާ އެއް ޖަމާޢަތަކީ ލުބްނާނުގައި ހަރަކާތްތެރިވާ ޙިޒްބުاللهއެވެ. އެ ޖަމާޢަތުން ދަނީ މެދުކެނޑުމެއް ނެތި ޔަހޫދީންގެ ރަށްތަކަށް ޙަމަލާ ދެމުންނެވެ. އަދި، ލުބުނާނުގެ ސަރަޙައްދީ ރޮނގު ހުރަސްކޮށް ޔަހޫދީންގެ ރަށްތަކަށް އަރަން ވެސް ޙިޒްބުاللهގެ ހަނގުރާމަވެރިން ދަނީ މަސައްކަތް ކުރަމުންނެވެ. ޔަހޫދީން ބުނީ ސަރަޙައްދީ ރޮނގު ހުރަސްކޮށް އެ ޤައުމަށް އަރަން މަސައްކަތް ކުރި ޙިޒްބުاللهގެ ހަތަރު މެންބަރުން ޝަހީދު ކޮށްލާފައިވާނެ ކަމުގައެވެ.
ޙިޒްބުاللهގެ އިތުރުން ޔަމަނުގެ ޙޫޘީ ޖަމާޢަތުން ވެސް ވަނީ ޔަހޫދީންގެ ރަށްތަކަށް ޙަމަލާ ދީފައެވެ. އަދި ރަތް ކަނޑުން ޔަހޫދީންގެ ރަށްތަކަށް ދަތުރުކުރާ ޔަހޫދީންނާ ގުޅުން އޮންނަ އާގުބޯޓުފަހަރަށް ވެސް އެ ޖަމާޢަތުން ވަނީ ޙަމަލާ ދީފައެވެ. ޔަހޫދީންގެ ދިފާޢުގައި އެމެރިކާއިން ވަނީ ޔަމަނަށް ބޮން އަޅައިފައެވެ.