ފަލަސްޠީނުގެ ޣައްޒާގައި ވެރިކަން ޙަމާސް ޖަމާޢަތުގެ ބެލުމުގެ ދަށުގައި ތިބި ޔަހުދީ ރަހީނުންގެ ބައެއް މީހުން މަރުވެފައި ތިބެދާނެ ކަމަށް އެ ޖަމާޢަތުގެ ހަތިޔާރު އެޅި ގޮފީގެ ތަރުޖަމާނު އަބޫ ޢުބައިދާ ވިދާޅުވެއްޖެއެވެ. އޭނާ އެ ގޮތަށް ވިދާޅުވީ ޔަހޫދީ ފައުޖުތަކާއި ޙަމާސް ޖަމާޢަތާ ދެމެދު އޮކްޓޫބަރު ހަތް ވަނަ ދުވަހުން ފެށިގެން ކުރަމުންދާ ހަނގުރާމައަށް 100 ދުވަސް ފުރުމުން ޓީވީ މެދުވެރިކޮށް ދެއްވި ތަޤުރީރެއްގައެވެ.
އަބޫ ޢުބައިދާ ވިދާޅުވި ގޮތުގައި ޣައްޒާގެ ރައްޔިތުންނަށް އަމާޒުކޮށް ޔަހޫދީން ދޭ އަނިޔާވެރި ޙަމަލާތައް ހުއްޓުވުމުގެ ކުރިން އިތުރު އެއްވެސް ވާހަކައެއް ދެއްކުމަކީ އެއްވެސް މާނައެއް ހުރި ކަމެއް ނޫނެވެ. އޮކްޓޯބަރު ހަތް ވަނަ ދުވަހު ފަލަސްޠީނުގެ ބޯޑަރު ހުރަސްކޮށް ޔަހޫދީންނަށް ޙަމާސުން ދިން ޙަމަލާއަކީ 100 އަހަރު ވަންދެން ފަލަސްޠީނު ރައްޔިތުންނާ ދެކޮޅަށް ޔަހޫދީން ދިން ޙަމަލާތަކުގެ ރައްދު ކަމަށް ވެސް އޭނާ އިތުރަށް ވިދާޅުވިއެވެ.
ޙަމާސުން ދިން ޙަމަލާގައި 1،200އަށްވުރެ ގިނަ ޔަހޫދީން ވަނީ މަރުވެފައެވެ. އެއީ 1948 ވަނަ އަހަރު ޔަހޫދީންގެ ދަޢުލަތެއް ފަލަސްޠީނުގައި ޤާއިމުވިފަހުން ޔަހޫދީންނަށް އެއްދުވަހާ ލިބުނު އެންމެ ބޮޑު އެއް ގެއްލުމެވެ.
ޔަހޫދީންނަށް ދެމުންދާ ޙަމަލާތައް ފުޅާކުރުމުގެ ފުރުސަތު އޮތް ކަމަށް ވިދާޅުވެ އަބޫ ޢުބައިދާ އިތުރަށް ވިދާޅުވީ ކުރިއަށް އޮތް ދުވަސްތަކުގައި ޔަހޫދީންނަށް އަމާޒުކޮށް ދެމުންދާ ޙަމަލާތައް އިތުރަށް ފުޅާ ކުރާނެ ކަމަށް ޔަހޫދީންނާ ދެކޮޅަށް މަސައްކަތްކުރަ ގިނަ ޖަމާޢަތްތަކަކުން ބުނެފައިވާ ކަމަށެވެ.