ޓްރޭޑް ޑެފިސިޓް ކުޑަކުރުމަށް ކާގޯ ޓަރމިނަލް އަދިވެސް ބޮޑުކުރުމަކީ ރައީސްގެ އަމާޒެއް: ސަޢީދު

ރާއްޖޭގެ ޓްރޭޑް ޑެފިސިޓް ނުވަތަ އިމްޕޯޓާއި އެކްސްޕޯޓްގެ ފަރަގު ކުޑަކުރުމަށް އެއަރޕޯޓްގެ ކާގޯ ޓަރމިނަލް އަދިވެސް އިތުރަށް ބޮޑުކުރުމަކީ ރައީސުލުޖުމްހޫރިއްޔާ ޑރ. މުހައްމަދު މުއިއްޒުގެ އަމާޒެއްކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު މިހެން ވިދާޅުވީ ވެލާނާ އިންޓަނޭޝަނަލް އެއަރޕޯޓްގައި ތަރައްޤީކުރި އައު ކާގޯ ޓަރމިނަލް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ވަޒީރު މުޙައްމަދު ސަޢީދު ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާއި ހަވާލުވެވަޑައިގަތް ދުވަހުން ފެށިގެން އިންތިޤާލީ މަރުހަލާގައިވެސް ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަސައްކަތާއި މިހާރު ކުރިއަށްދާ މުހިއްމު މަޝްރޫޢުތައް ވަރަށް ގާތުން ބެއްލެވިކަމަށެވެ. އެގޮތުން އެއަރޕޯޓަށް ވަޑައިގެން 2 ގަޑިއިރުވަންދެން އެއަޕޯޓްގެ އިންސްޕެކްޝަންއެއް ހެއްދެވުމަށްފަހު، ވީ އެންމެ އަވަހަކަށް މަސައްކަތް ނިންމާ ޚިދުމަތަށް ގެނައުމަށް ކުރަންޖެހޭ މަސައްކަތްތައް ކުރުމަށް ރައީސުލްޖުމްހޫރިއްޔާ އިރުޝާދުދެއްވިކަމަށެވެ.

މިއަދު ހުޅުވި 120،000 ޓަނުގެ ކާގޯ ހޭންޑަލް ކުރެވޭ ޓާމިނަލްއާ ގޫޅޭގޮތުން ވަޒީރު ވިދާޅުވީ ރައީސުލްޖުމްހޫރިއްޔާގެ އަމާޒަކީ ޓާމިނަލްގެ ކެޕޭސިޓީ އަދިވެސް އިތުރު ކުރުން ކަމަށެވެ. އަދި މިހާރުން މިހާރަށް މަސައްކަތް ފަށާއި ކާގޯ ޓަމިނަލްއިން މުދާ ހޭންޑަލްކުރެވޭ އަދަދު 3 ލައްކަ ޓަނަށް އިތުރުކުރުމަކީ ރައީސުލްޖުމްހޫރިއްޔާގެ ތަސައްވުރެއްކަމަށްވެސް ސައީދު ވިދާޅުވިއެވެ.

ކާގޯ ޓަރމިނަލް ބޮޑުކުރުމާއެކު މިހާރަށްވުރެ ބޮޑަށް އެއަރ ކާގޯ އަންނާނެ ގޮތް ފަހިކުރުމަކީވެސް ކުރަންޖެހޭ މަސައްކަތެއްކަން ވަޒީރު ފާހަގަކުރެއްވިއެވެ. އަދި ކާގޯ ޓާމިނަލް 3 ލައްކަ މެޓްރިކް ޓަނަށް ބޮޑު ކުރެވުމަކީ ރާއްޖޭގެ ޓްރޭޑް ޑެފިސިޓްއަށް ހައްލެއް ހޯދުމަށްޓަކައި ރައީސުލްޖުމްހޫރިއްޔާއަކަށް ނިންމެވޭނެ އެންމެ މުހިއްމު ނިންމެވުންކަމަށްވެސް ވަޒީރު ވިދާޅުވިއެވެ.

"މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން އުފެއްދުމާއެކު މިފަދަ ދައުވަތުތައް އައިސް، މިނިވަން ވިޔަފާރީގެ ބޮޑު ބާޒާރުގައި ބައިވެރިވެވި ކާގޯ ޓާމިނަލް 3 ލައްކަ މެޓްރިކް ޓަނަށް ބޮޑު ކުރެވުމަކީ ރާއްޖޭގެ ޓްރޭޑް ޑެފިސިޓް، 3.48 ބިލިޔަން ރުފިޔާގެ އިމްޕޯޓް، 300 މިލިޔަން ރުފިޔާގެ އެކްސްޕޯޓް ގެޕްއަށް ހައްލެއް ހޯދުމަށްޓަކައި ރައީސުލްޖުމްހޫރިއްޔާއަކަށް ނިންމެވޭނެ އެންމެ ވިޝަނަރީ ނިންމެވުން. އަދި ރާއީސްގެ ވިޝަން ކާމިޔާބުކުރުމަށްޓަކައި މުޅި ސަރުކާރު މަސައްކަތް ކުރައްވާނެ." ސަޢީދު ވިދާޅުވިއެވެ.

ވަޒީރު ވިދާޅުވީ އައު ކާގޯ ޓާމިނަލްގެ ވަޞީލަތްތަކާއެކު މިހާރު ރާއްޖެއަށް އެތެރެކުރާ ކުރާ ފިނީ ބާވަތްތަކާއި ތަރުކާރީއާ މޭވާ އަވީގައި ބަހައްޓަން ނުޖެހޭނެކަމަށެވެ. އަދި އެއަރޕޯޓް ބޮޑުކުރުމުގެ މަޝްރޫޢުއާއެކު ރާއްޖޭގެ އިޤްތިޞާދު 6 ބިލިޔަން އެމެރިކާ ޑޮލަރުން 12 ބިލިޔަން އެމެރިކާ ޑޮލަރަށް މަތިކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ގެންގުޅުއްވާ ތަސައްވުރަށް ވާސިލްވެވޭނެކަމަށް ޔަގީންކުރައްވާކަމަށްވެސް ވަޒީރު ވިދާޅުވިއެވެ.