ޢިރާޤުގައި ހުންނަ ޔަހޫދީންގެ ޖާސޫސީ އިދާރާ މޮސާދުގެ މައި މަރުކަޒަށް އީރާނުން ވަރުގަދަ ވައިގެ ޙަމަލާތަކެއް ދީފިއެވެ. އެ ޙަމަލާތައް އަމާޒު ކޮށްފައި ވަނީ ޢިރާޤުގެ އުތުރުގައި އޮންނަ ކުރްދިސްތާން ސަރަޙައްދުގެ ވެރިރަށް އިރްބީލުގައި ހުންނަ ޢިމާރާތަކަށެވެ. އީރާނުން ބުނީ އެ ޙަމަލަތައް ދީފައި ވަނީ އެ ޤައުމުގެ އިސްލާމީ އިންޤީލާބީ ލަޝްކަރުން ކަމުގައެވެ.
އީރާނުން ޔަހޫދީންގެ ޖާސޫސީ އިދާރާއަކަށް ޙަމަލާދީފައި ވަނީ ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ފަށާފައިވާ ލާއިންސާނީ ޢުދުވާނާ ގުޅިގެން، ސަރަޙައްދީ ހަމަނުޖެހުމެއް ފެށުމުގެ ބިރު އޮތް ކަމުގެ އިންޒާރު ދެމުންދާ ދަނޑިވަޅެއްގައެވެ. ލުބްނާނާއި ސޫރިޔާގެ އިތުރުން ޢިރާޤާއި ޔަމަނުގައި ޙަރަކާތްތެރިވާ ހަތިޔާރު އެޅި ޖަމާޢަތްތަކުން ވެސް އެ ހަމަނުޖެހުންގަނޑުގެ ތެރެއަށް ވަދެފައިވާ ކަން ފާހަގަ ކޮށްލަން ޖެހެއެވެ.
"ޢިރާޤުގެ ކުރްދިސްތާން ސަރަޙައްދުގައި ހުންނަ ޔަހޫދީންގެ ޖާސޫސީ އިދާރާގެ މައި މަރުކަޒަށް ބެލިސްޓިކް މިސައިލް ޙަމަލާތަކެއް ދީފައި ވަނީ އެ ލަޝްކަރުގެ ކޮމާންޑަރުން ޝަހީދު ކޮށްލުމުން އެ ކަމުގެ ބަދަލު ހިފުމަށް. އަދި، އެކްސިސް އޮފް ރެސިސްޓެންސްޓުގައި ހިމެނޭ ޖަމާޢަތްތަކަށް ޒަޔަނިސްޓުން ދެމުންދާ ޙަމަލާތަކުގެ ބަދަލު ހިފުމުގެ ގޮތުން،" އީރާނުގެ އިންޤިލާބީ ލަޝްކަރުން ބުންޏެވެ.
އެ ލަޝްކަރުން ބުނީ، އިރްބީލްގެ އިތުރުން ސޫރިޔާގައި ޙަރަކާތްތެރިވާ އައިއެސް ޖަމާޢަތުގެ އަމާޒުތަކަށް ވެސް ޙަމަލާތައް އަމާޒު ކޮށްފައިވާނެ ކަމުގައެވެ. އައިއެސްއަށް ޙަމަލާ ދީފައި ވަނީ، މި މަހުގެ ކުރީކޮޅު އީރާނުގައި ބޮމުގެ ޙަމަލާތަކެއްދީ 100 އެއްހާ މީހުން މަރައިލުމުންނެވެ.
ސޫރިޔާގައި ޙަރަކާތްތެރިވަމުން ދިޔަ އީރާނުގެ އިންޤިލާބީ ލަޝްކަރުގެ އިސް ކޮމާންޑަރުންތަކެއް ދާދި ފަހުން ޝަހީދު ކޮށްލާފައިވެއެވެ. އީރާނުން ބުނީ، އެ މީހުން ޝަހީދު ކޮށްލާފައި ވަނީ ޔަހުދީން ދިން ވައިގެ ޙަމަލާތަކެއްގައި ކަމުގައެވެ. އަދި، އެ ކަމުގެ ބަދަލު ހިފާނެ ކަމުގެ އިންޒާރު ވެސް އީރާނުން ދީފައިވެއެވެ.
ޢިރާޤުގެ ކުރުދިސްތާނަށް އީރާނުން ބޮން އެޅުމުން، ޢިރާޤުން ވަނީ އެ ކަމާ މެދު ހިތްހަމަނުޖެހުން ފާޅު ކުރުމުގެ ގޮތުން ތެހެރާނުގައި ހުންނަވާ ޢިރާޤުގެ ސަފީރު އަނބުރާ ޤައުމަށް ގެންގޮސްފައެވެ. އަދި، ބަޣްދާދުގައި ހުންނަ އީރާނުގެ ޚާރިޖީއްޔާގެ އެންމެ އިސްވެރިޔާ ހާޒިރުކޮށް، އެ ކަމާ މެދު ސުވާލު ކޮށްފައެވެ. ޢިރާޤުން ބުނީ، އެ ޤައުމުގެ މިނިވަންކަމާއި ސިޔާދަތު ހިމާޔަތް ކުރުމަށް ޤާނޫނީ ގޮތުން ކުރެވެން ހުރި ހުރިހާ މަސައްކަތެއް ކުރާނެ ކަމުގައެވެ.
ޢިރާޤުގެ ކުރުދީންގެ ބޮޑުވަޒީރު މަސްރޫރު ބަރަޛާނީ ވެސް ވަނީ އީރާނުގެ ޙަމަލާތައް ކުށްވެރި ކުރައްވާފައެވެ. އަދި، އެއީ ކުރުދީންނާ ދެކޮޅަށް އީރާނުން ދީފައިވާ ޙަމަލާއެއްގެ ގޮތުގައި އޭނާ ސިފަ ކުރައްވައެވެ. އީރާނުގެ މިސައިލް ޙަމަލާގައި އާންމުންގެ ހަތަރު މީހުން މަރުވެ، އިތުރު ހަ މީހުން ޒަޚަމުވި ކަމުގައި ކުރްދިސްތާނުގެ ސަރުކާރުން ބުނެއެވެ.