ސަރަޙައްދީ ޤައުމުތަކުން ކުރިމަތިވަމުންދާ ނުރައްކާތަކުން ދިފާޢުވުމަށް އީރާނުގެ އިންޤިލާބީ ލަޝްކަރުން ޕާކިސްތާނުގެ ހަނގުރާމަމަތީ ޖަމާޢަތަށް ވަރުގަދަ ޙަމަލާތަކެއް ދީފިއެވެ.
އީރާނުގެ އިންޤިލާބީ ލަޝްކަރުން ޙަމަލާ ދީފައިވަނީ ޕާކިސްތާނުގެ ބަލޫޗިސްތާން ޕްރޮވިންސްގައި ޙަރަކާތްތެރިވާ ޖައިޝް އަލް އަދްލް ނަމަކަށް ކިޔާ ޖަމާޢަތެއްގެ މަރުކަޒުތަކަކަށެވެ. އެ ގޮތުން އީރާނުން ވަނީ މިސައިލާއި ޑްރޯން ބޭނުންކޮށްގެން އެ މަރުކަޒުތަކަށް ޙަމަލާ ދީފައެވެ. ޖައިޝް އަލް އަދްލް ވަނީ މީގެ ހަފުތާތަކެއް ކުރިން އީރާނުގެ ފުލުހުންގެ މަރުކަޒަކަށް ޙަމަލާ ދިނުމަށް ފަހު 11 މީހުން މަރައިލައިފައެވެ. އީރާނުން ވަނީ އެ ޙަމަލާގެ ބަދަލުހިފާނެ ކަމަށް ބުނެފައެވެ.
ޕާކިސްތާނުން ނެރުނު ބަޔާނެއްގައި ބުނެފައިވަނީ އެ ޤައުމުގެ ވައިގެ ސަރަޙައްދުގެ ޙުރުމަތް ކަނޑާލުމަށް ފަހު އީރާނުން ދިން ޙަމަލާގައި ދެ ކުޑަކުދިން މަރުވި ކަމަށެވެ. ނަމަވެސް އެ ޙަމަލާ އަމާޒުވި ސަރަޙައްދެއް އަދި އިތުރު ތަފްޞީލެއް އެ ޤައުމުން ޢާންމުކޮށްފައެއް ނުވެއެވެ. އެ ބަޔާނުގައި ފާހަގަކޮށްފައިވާ ގޮތުގައި އީރާނުން އެ ޙަމަލާ ދީފައިވަނީ އެ ޤައުމާއެކު ރަނގަޅު ގުޅުމެއް އޮއްވައެވެ. އަދި އެ ޙަމަލާގެ ފުރިހަމަ ޒިންމާ އީރާނުން އުފުލަން ޖެހޭނެ ކަމަށް ބުނެ ޕާކިސްތާނުން ވަނީ އީރާނުގެ ސަފީރު އެ ޤައުމުގެ ޚާރިޖީ ވުޒާރާއަށް ހާޒިރުކޮށްފައެވެ.
ޕާކިސްތާނަށް ޙަމަލާ ދިނުމުގެ ކުރިން އީރާނުން ވަނީ ޔަހޫދީ ޖާސޫސުން ޢިރާޤުގައި ބޭނުންކުރަމުންދިޔަ ޢިމާރާތަކަށް ޙަމަލާ ދީފައެވެ. އަދި ސޫރިޔާގައި ޙަރަކާތްތެރިވާ އައިއެސް ޖަމާޢަތުގެ ހަނގުރާމަވެރިންނާ ދެކޮޅަށް ވެސް އީރާނުގެ އިންޤިލާބީ ލަޝަކަރުން ވަނީ ޙަމަލާ ދީފައެވެ. އެ ޖަމާޢަތުން އީރާނުގައި ދިން ބޮމުގެ ޙަމަލާތަކެއްގައި 100 މީހުން ވަނީ މަރުވެފައެވެ.