ޤަޠަރާއި ފަރަންސޭސިވިލާތުން ގުޅިގެން ކުރި މަސައްކަތުން ފަލަސްޠީނުގެ ޣައްޒާއަށް އިންސާނީ އެހީގެ ސާމާނާއި ބޭސްފަރުވާއަށް ބޭނުންވާ ސާމާނު އެތެރެ ކުރުމުގެ ހުއްދަ ދޭން ޔަހޫދީން އެއްބަސްވެއްޖެއެވެ. ޣައްޒާގައި ވެރިކަން ކުރާ ޙަމާސް ޖަމާޢަތުން ވެސް ވަނީ ޤަޠަރާއި ފަރަންސޭސިވިލާތުގެ ހުށަހެޅުންތަކަށް އެއްބަސްވެފައެވެ.
އެ އެއްބަސްވުމުގެ ދަށުން ޙަމާސްގެ ބެލުމުގެ ދަށުގައި ތިބި ޔަހޫދީ އަސީރުންގެ ތެރެއިން 45 މީހަކަށް ބޭނުންވާ ޞިއްޙީ އެހީތެރިކަން ޙަމާސުން ފޯރު ކޮށްދޭނެއެވެ. އަދި އޭގެ ބަދަލުގައި ޣައްޒާއަށް ކާބޯތަކެއްޗާއި އިންސާނީ އެހީގެ އިތުރުން ބޭސް ފަރުވާގެ ސާމާނު އެތެރެ ކުރުމުގެ ފުރުޞަތު ދޭން ޔަހޫދީން ވަނީ އެއްބަސްވެފައެވެ.
ޤަޠަރާއި ފަރަންސޭސިވިލާތުން ބުނީ ޣައްޒާއަށް އިންސާނީ އެހީގެ ސާމާނު ފޮނުވަން މިހާރު މަސައްކަތް ފަށާފައިވާ ކަމުގައެވެ. އަދި ޖަނަވަރީ 17 ވަނަ ދުވަހު އެ ތަކެތި މިޞްރަށް ފޮނުވާނެ ކަމަށާއި މިޞްރު މަގުން ރަފަޙް ހުރަސް މެދުވެރިކޮށް ޣައްޒާއަށް އެ ތަކެތި ވައްދާނެ ކަމުގައި އެ ދެ ޤައުމުން ބުނެއެވެ.
ޔަހޫދީން އެ ކަމަށް އެއްބަސްވެފައި ވަނީ ޙަމާސްގެ ބެލުމުގެ ދަށުގައި ތިބި ޔަހޫދީ އަސީރުންގެ ޢާއިލާތަކުން އެ ކަމަށް ބާރު އެޅުމުންނެވެ. އެ ކަމަށް އެދި ހުށަހަޅާފައި ވަނީ އަސީރުންގެ ޢާއިލާތަކުން ކަމަށާއި އެ ކަމާ ގުޅޭ ގޮތުން އެއްބަސްވުމަކަށް އާދެވިފައި ވަނީ ހަތަރު ހަފުތާއަށް ދެމިގެންދިޔަ މަޝްވަރާތަކަކަށް ފަހުގައި ކަމަށް ފަރަންސޭސިވިލާތުގެ ޚާރިޖީ ވުޒާރާގެ އިސްވެރިއެއް ކަމުގައިވާ ފިލީޕް ލާލިއޯ ވިދާޅުވިއެވެ. އަސީރުންނަށް ބޭނުންވާ ބޭސްތައް ފޯރުކޮށްދޭނީ ރެޑް ކްރޮސް މެދުވެރިކޮށެވެ.
ޣައްޒާއަށް އަލުން އިންސާނީ އެހީގެ ސާމާނު ވައްދަން ޔަހޫދީން އެއްބަސްވެފައިވާ ދަނޑިވަޅެއްގައި ޔަހޫދީ ފައުޖުން ދަނީ ޣައްޒާގައި ހިންގަމުންދާ ލާއިންސާނީ ޢުދުވާން އިތުރަށް ވަރުގަދަ ކުރަމުންނެވެ. އެ ގޮތުން ސުންނާފަތި ކޮށްލާފައިވާ ޣައްޒާގެ އުތުރުގެ ސަރަަޙައްދުތަކަށް ޔަހޫދީ ފައުޖުގެ އަސްކަރީ ޓޭންކުފަހަރު އަނެއްކާ ވެސް ވަންނަން ފަށާފައިވާ ކަމުގައި އެ ސަރަޙައްދުގައި ދިރިއުޅޭ ރައްޔިތުން ބުނެއެވެ. ޣައްޒާގެ އުތުރުގައިވާ ރަށްތައް ސުންނާފަތި ކޮށްލާފައި ވަނީ ޔަހޫދީންގެ ޢުދުވާނުގެ ކުރީ ކޮޅުގައެވެ.
ޔަހޫދީންގެ ޙަމަލާތައް ވަރުގަދަ ކުރަން ފެށުމާއެކު އެ ކަމަށް ރައްދު ދިނުމުގެ ގޮތުން ޙަމާސް ޖަމާޢަތުން ވެސް ވަނީ ޔަހޫދީންގެ ރަށްތަކަށް އަމާޒުކޮށް ރޮކެޓް ޙަމަލާތައް ދޭން ފަށާފައެވެ. މަސްރަޙު ދިރާސާ ކުރާ ފަރާތްތަކުން ބުނީ ޙަމާސާ ދެކޮޅަށް ޔަހޫދީން ފަށާފައިވާ ޢުދުވާނަށް 100 ފާއިތުވެފައިވާއިރު ވެސް، އެ ޖަމާޢަތުގެ ކުޅަދާނަ ކަމަށް ބަދަލެއް އައިސްފައި ނުވާ ކަމުގައެވެ.
ފާއިތުވި 24 ގަޑިއިރުގެ ތެރޭގައި ޔަހޫދީ ފައުޖުން ޣައްޒާއަށް ދީފައިވާ އެކި ޙަމަލަތަކުގައި 158 މީހުން ޝަހީދު ކޮށްލާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ބުނެއެވެ. އެއާއެކު، އޮކްޓޫބަރު 7 ވަނަ ދުވަހަށް ފަހު ޝަހީދު ކޮށްލާފައިވާ މީހުންގެ ޢަދަދު ވަނީ 24,448 އަށް އުފުލިފައެވެ. އަދި ޒަޚަމު ކޮށްލާފައިވާ މީހުންގެ ޢަދަދު 61,504 އަށް އަރައެވެ.
ޔަހޫދީން އެންމެ ފަހުން ދީފައިވާ ޙަމަލަތަކުގައި ޣައްޒާގެ ދެކުނުގައި އޮންނަ ޚާން ޔޫނިސްގައި އުރުދުނުން ގާއިމު ކޮށްފައިވާ ފީލްޑް ހޮސްޕިޓަލްގެ ބޮޑު ބައެއް ސުންނާފަތި ކޮށްލާފައިވާ ކަމުޔައި އެ ޤައުމުން ބުނެއެވެ. އެއީ ޔަހޫދީންގެ ޙަމަލާތަކުގައި ޒަޚަމު ކޮށްލާފައިވާ މީހުންނަށް ޞިއްޙީ ފަރުވާ ދިނުމަށް ހުރަސް އެޅުމުގެ ގޮތުން ޔަހޫދީން ދީފައިވާ ޙަމަލާއެކެވެ.