ޔަހޫދީންގެ ޖައްބާރު ބޮޑުވަޒީރު ބުންޔާމިން ނަތަންޔާހޫގެ އިސްތިއުފާއަށް ގޮވައިލާ އެތަކެއް ހާސް ބަޔަކު ޔާފާގެ މަގުތައް ފުރައިލައިފިއެވެ.
އެއްވުމުގެ ބައިވެރިން ބުނަމުން ދަނީ ޔަހޫދީންގެ ސަލާމަތަށް އޮތް އެންމެ ބޮޑު ނުރައްކަލަކީ ނަތަންޔާހޫ ކަމުގައެވެ. އަދި އިސްތިއުފާ ދެއްވުމަށް ފަހު އަލުން އިންތިޚާބެއް ބޭއްވުމަށް އެ މީހުން ދަނީ ގޮވައިލަމުންނެވެ.
2023 ވަނަ އަހަރުގެ ފަހުކޮޅު ވެސް އިސްތިޢުމާރުކޮށްފައިވާ ފަލަސްޠީނުގެ ރަށްތަކުގައި އެތަކެއް ސަތޭކަ ހާސް ބަޔަކު ވަނީ ނަތަންޔާހޫގެ ސަރުކާރާ ދެކޮޅަށް އަޑު އުފުލައި އޭނާގެ އިސްތިއުފާއަށް ގޮވައިލާފައެވެ. ނަމަވެސް އޮކްޓޫބަރު 7 ވަނަ ދުވަހު ނަތަންޔާހޫގެ ޢަމުރަށް ޔަހޫދީ ފައުޖުން ޣައްޒާގެ މުސްލިމުންގެ ގެދޮރަށް ބޮންއަޅަށް ފެށުމާއެކު، މުޒާހަރާތައް މަޑުޖެހުނެވެ.
ޣައްޒާގެ މުސްލިމުން ޤަތުލު ކުރުމަށް ނަތަންޔާހޫ ފަށާފައިވާ ލާއިންސާނީ ޢުދުވާން މިހާރު ވަނީ ހަތަރު މަސް ދުވަހަށް ދެމިގެން ގޮސްފައެވެ. އެއާ އެކު ޔަހޫދީންގެ މެދުގައި ނަތަންޔާހޫއަށް އޮތް ތާޢީދު ވެސް ދަނީ ފަނޑުވަމުންނެވެ. ޚިޔާލު ހޯދުމުގެ ޕޯލްތަކުން އެ ކަން ހާމަވެއެވެ. ހުސްވި އަހަރު ބޭއްވި މުޒާހަރާތަކުގައި ބައިވެރިވި މީހުންގެ ޢަދަދާ އެއްވަރަށް މިހާރު ޔާފާގައި ބާއްވަމުންދާ މުޒާހަރާތަކުގައި މީހުން ބައިވެރި ނުވި ނަމަވެސް ނަތަންޔާހޫއާ މެދު ޔަހޫދީންގެ ހިތްތަކުގައި އުފެދެމުންދާ ރުޅިވެރިކަމަށް ބަދަލެއް ނާދެއެވެ.
"ސަރުކާރު ބަދަލުކޮށް ޤައުމުގެ މިސްރާބު އިސްލާޙު ކުރުމުގެ ބާރު އޮތީ ރައްޔިތުންގެ ކިބައިގައި. މި ސަރުކާރުން ގެއަށް ދާން ޖެހޭ ވަގުތު އަތުވެއްޖެ. މިހާރު މިއޮތީ ވަގުތު ޖެހިފައި،" ނަތަންޔާހޫއާ ދެކޮޅަށް އަޑު އުފުލުމަށް ބާއްވަމުންދާ މުޒާހަރާގެ ބައިވެރިއަކު ބުންޏެވެ.
ޖައްބާރު ނަތަންޔާހޫގެ ހަނގުރާމައިގެ ކެބިނެޓުގެ ތެރޭގައި ވެސް ވަނީ ޚިޔާލު ތަފާތުވުންތައް އުފެދި ކެބިނެޓު ވެސް ވަނީ ދެބައިވެފައެވެ. ނަމަވެސް ނަތަންޔާހޫގެ އޮތީ އެންމެ އަމާޒެކެވެ. އެއީ ވީހާވެސް ގިނަ ދުވަހަކު ވެރިކަމުގައި ދެމިހުރުމެވެ. އަދި، ވީހާވެސް ގިނަ ޢަދަދެއްގެ މުސްލިމުންގެ ލޭ އޮހޮރުވައިލާ ޝަހީދުކޮށްލުމެވެ. އެއާ އެކު ކުޑަކުދިން ޔަތީމު ކޮށް އަންހެނުން ހުވަފަތް ކުރުމެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގައި ޝަހީދު ކޮށްލާފައިވާ މީހުންގެ ޢަދަދު ވަނީ 25,100އަށް އުފުލިފައެވެ. އޭގެ ތެރޭގައި 16,000އަށްވުރެ ގިނަ ޢަދަދަކަށް މައުސޫމު ކުޑަކުދިންނާއި އަންހެނުން ހިމެނެއެވެ. އަދި ޒަޚަމު ކޮށްލާފައިވާ މީހުންގެ ޢަދަދު 61,000އަށް އަރައެވެ. ނަމަވެސް، އޭގެ ތެރެއިން ގިނަ މީހުންނަށް ޞިއްޙީ ފަރުވާ ދޭނެ ގޮތެއް ނެތެވެ. ޣައްޒާއިން ބޭސްފަރުވާގެ ސާމާނު ހުސްވެފައިވާއިރު، ޔަހޫދީ ފައުޖުން ދަނީ މެދުކެނޑުމެއް ނެތި ޣައްޒާގެ ހަސްފަތާލުތަކަށް ބޮން އަޅަމުންނެވެ.