ފަލަސްޠީނުގެ ޣައްޒާގައި ވެރިކަން ކުރާ ޙަމާސް ޖަމާޢަތުން ރަހީނު ކޮށްފައިވާ ޔަހޫދީ އަސީރުން މިނިވަން ކުރުމަށް އެ ޖަމާޢަތުން ހުށަހަޅާފައިވާ ޝަރުޠުތަކަށް ޔަހޫދީންގެ ޖައްބާރު ބޮޑުވަޒީރު ބުންޔާމިން ނަތަންޔާހޫ ނޫނެކޭ ބުނެފިއެވެ. ޙަމާސުން ހުށަހަޅާފައިވާ ޝަރުޠުތަކުގެ ތެރޭގައި ހިމެނެނީ ޣައްޒާއަށް އަރާފައިވާ ޔަހޫދީ ސިފައިން އެ ސަހަރުން ފޭބުމާއި ޣައްޒާގެ ޢާންމު ރައްޔިތުންގެ ގެދޮރަށް ބޮންއެޅުން ހުއްޓައިލުމާއި އެ ސަހަރުގެ ވެރިކަމުގައި ދެމިއޮތުމަށް ޙަމާސަށް ފުރުޞަތު ދިނުމެވެ.
ޙަމާސްގެ ޝަރުޠުތަކަށް ދެކޮޅު ހެދުމަށް ފަހު ޔަހޫދީ ފައުޖުން ވަނީ ޣައްޒާގެ ދެކުނުން އޮންނަ ޚާން ޔޫނިސްސަށް ދެމުންދާ ޙަމަލާތައް އިތުރަށް ވަރުގަދަ ކޮށްފައެވެ. އެ ކަމާ ގުޅޭ ގޮތުން ވާހަކަފުޅު ދައްކަވަމުން ޙަމާސްގެ ތަރުޖަމާނު ސާމީ އަބޫ ޒުޙްރީ ވިދާޅުވީ އެ ޖަމާޢަތުގެ ޝަރުޠުތަކަށް ޔަހޫދީން އެއްބަސްނުވާ ނަމަ އަސީރުން މިނިވަން ކުރުމުގެ އެއްވެސް ފުރުޞަތެއް ނެތް ކަމުގައެވެ.
ޙަމާސުން ރަހީނު ކޮށްފައިވާ އަސީރުންގެ ތެރެއިން 100 މީހުން އެ ޖަމާޢަތުން މިހާރު ވެސް ވަނީ މިނިވަން ކޮށްފައެވެ. އެ މީހުން މިނިވަންކޮށްފައި ވަނީ ޤަޠަރާއި، މިޞްރާއި އެމެރިކާ ގުޅިގެން ޙަމާސާއި ޔަހޫދީންނާ ދެމެދު އެކުލަވައިލި އެއްބަސްވުމެއްގެ ދަށުންނެވެ. އެ އެއްބަސްވުމާ އެއްގޮތަށް ޔަހޫދީން ވެސް ވަނީ، ޖަލުތަކުގައި ހައްޔަރު ކޮށްފައިވާ ފަލަސްޠީނުގެ ކުށެއް ނެތް ޢާންމުންގެ ތެރެއިން 240 މީހުން މިނިވަން ކޮށްފައެވެ.
ޙަމާސްގެ ބެލުމުގެ ދަށުގައި އަދިވެސް 136 އަސީރުން ތިބި ކަމަށް ބެލެވެއެވެ. އެ މީހުންގެ ޢާއިލާތަކުން ދަނީ އެ މީހުން މިނިވަން ކުރުމަށް މަސައްކަތް ކުރުމަށް ނަތަންޔާހޫއަށް ބާރު އަޅަމުންނެވެ. އަސީރުންނާ ބެހޭ މަދަނީ ޖަމުޢިއްޔާއެއް ކަމުގައިވާ ހިސްޓޭޖަސް އެންޑް މިސިންގް ޕާސަންސް ފެމިލީސް ފޯރަމުން ބުނީ އެ މީހުން މިނިވަން ކުރަން މަސައްކަތް ކުރާނެ ކަން ނުވަތަ ނޫން ކަން ނަތަންޔާހޫ ސާފުކޮށް ބުނެދޭން ޖެހޭނެ ކަމުގައެވެ.
އަސީރުން މިނިވަން ކުރުމަށް ހަރުދަނާ މަސައްކަތްތަކެއް ކުރުމަށް ގޮވައިލާ އެ މީހުންގެ ޢާއިލާތަކުން ދަނީ ނަތަންޔާހޫ ދިރިއުޅޭ ގޭގެ ކައިރީގައި މުޒާހަރާ ކުރަމުންނެވެ. "މިއީ މި ސަރުކާރުގެ ސަބަބުން ކުރިމަތިވި ހާލަތެއް. ސަރުކާރުން މި ކަމުގެ ޒިންމާ އުފުލަން ޖެހޭނެ. ސަރުކާރުން މި ކަން ހައްލު ކޮށްދޭން ޖެހޭނެ. އަސީރުން މިނިވަން ކޮށް އަނބުރާ ޢާއިލާތަކަށް ރައްދު ކޮށްދޭން ޖެހޭނެ،" އެއް އަސީރެއްގެ ޢާއިލާގެ މެންބަރަކު ނޫސްވެރިންނާ ވާހަކަ ދައްކަމުން ބުންޏެވެ.
ޖަނަވަރީ 19 ވަނަ ދުވަހު އެމެރިކާގެ ރައީސް ޖޯ ބައިޑަން ވަނީ ޖައްބާރު ނަތަންޔާހޫއަށް ފޯނުން ގުޅުއްވައި ފަލަސްޠީނުގެ މިނިވަން ދަޢުލަތެއް ގާއިމު ކުރުމުގެ މަސައްކަތް ހަލުވި ކުރެވޭނެ މަގުތަކެއް ހުށަހަޅުއްވާފައެވެ. ނަމަވެސް، ނަތަންޔާހޫ ވަނީ އެ ކަމަށް ދެކޮޅު ހަދާފައެވެ. ފަލަސްޠީނުގެ މިނިވަން ދަޢުލަތެއް ގާއިމު ކޮށްދޭން ޖެހޭނެ ކަމަށް އޭނާ ނުދެކެއެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 25,105އަށް އުފުލިފައެވެ. އޭގެ ތެރެއިން 16,000 މީހުންނަކީ އަންހެނުންނާއި މައުސޫމު ކުޑަކުދިންނެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 62,000 ފަހަނަ އަޅާފައެވެ.