ޢަދަން ކަނޑުގައި ދަތުރު ކުރަމުން ދިޔަ ބޯޓަކަށް އެމެރިކާގެ އަސްކަރިއްޔާގެ އެންމެ ކުޅަދާނަ ލަޝްކަރުގެ ގޮތުގައި ބުނެވޭ ޔޫއެސް ނޭވީ ސީލްސްގެ ސިފައިން ޖެހި ރޭޑެއްގައި ޙަރަކާތްތެރިވަނިކޮށް ގެއްލުނު ސިފައިންގެ ދެ މީހުން މަރުވެފައިވާ ކަމަށް އެމެރިކާއިން ކަނޑައަޅައިފިއެވެ. ޔޫއެސް ނޭވީ ސީލްސްއިން ރޭޑު ޖަހާފައި ވަނީ އީރާނުގެ ހަތިޔާރުތަކެއް އުފުލާ ކަމަށް ތުހުމަތު ކުރެވުނު އުޅަނދަކަށެވެ.
މެދުއިރުމަތީގައި ޙަރަކާތްތެރިވާ އެމެރިކާ ސިފައިންގެ އިސް މަރުކަޒު ޔޫއެސް ސެންޓްރަލް ކޮމާންޑުން ބުނީ ނޭވީ ސީލްސްގެ ސިފައިންގެ ދެ މީހަކު އުޅަނދަށް އަރާފައި ވަނީ ޖަނަވަރީ 11 ވަނަ ދުވަހު ކަމުގައެވެ. އެ މީހުން އެ ބޯޓަށް އަރާފައި ވަނީ ސޮމާލިޔާގެ އައްސޭރިފަށުން ދަތުރު ކުރަމުން ދަނިކޮށް ކަމުގައި އެ އިދާރާއިން ބުންޏެވެ.
ގެއްލިފައިވާ ސިފައިން ހޯދުމަށް އެމެރިކާގެ އަސްކަރިއްޔާއިން ވަނީ ޚާއްޞަ ޙަރަކާތެއް ހިންގައި 21,000 އަކަމޭލުގެ ކަނޑުގެ ސަރަޙައްދެއް ބަލާފައެވެ. އެ ޙަރަކާތުގައި ސްޕެއިންނާއި ޖަޕާނުގެ އަސްކަރިއްޔާއިން ވެސް ބައިވެރިވިއެވެ. ނަމަވެސް، ގެއްލިފައިވާ ދެ މީހުން ފެނިފައި ނުވާ ކަމުގައި ސެންޓްރަލް ކޮމާންޑުން ބުނެއެވެ.
އެމެރިކާގެ އަސްކަރިއްޔާގެ އެންމެ ކުޅަދާނަ އަދި ޤާބިލު ކަމަށް ބެލެވޭ ނޭވީ ސީލްސްގެ ސިފައިންގެ ދެ މީހުން ގެއްލިފައި ވަނީ އެމެރިކާއާއި އިނގިރޭސިވިލާތުގެ އަސްކަރިއްޔާއިން ގުޅިގެން ޔަމަނުގެ ހޫޘީ ޖަމާޢަތާ ދެކޮޅަށް ވަރުގަދަ އަސްކަރީ ޙަރަކާތެއް ހިންގަމުންދާ ދަނޑިވަޅެއްގައެވެ. ރަތް ކަނޑުގައި ދަތުރުކުރާ އާގުބޯޓުފަހަރަށް ހޫޘީން ދެމުންދާ ޙަމަލާތައް ހުއްޓުވުމުގެ ނަމުގައި އެމެރިކާއިން ފަށާފައިވާ ޙަރަކާތުގެ ދަށުން އެ ޤައުމުގެ އަސްކަރިއްޔާއިން ދަނީ ޔަމަނަށް ބޮން އަޅަމުންނެވެ.