ޕާކިން ބިލްޑިންގ އެޅުމުގެ މަސައްކަތް އޭޕްރިލް މަހު ފަށާނެ: ރައީސް

މާލެއަށް ދިމާވެފައިވާ ޕާކިން މައްސަލަ ހައްލު ކުރުމަށް ޕާކިން ބިލިންޑިންގ އެޅުމުގެ މަސައްކަތް އަންނަ އޭޕްރިލް މަހު ފެށޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މާލެ ސިޓީ ކައުންސިލަށް އަލަށް އިންތިޚާބުވެވަޑައިގެންނެވި މޭޔަރާއި 3 މެންބަރުން ހުވާކުރެއްވުމަށް ރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. މާލެއަކީ ރާއްޖޭގެ އެންމެ ގިނަ ރައްޔިތުން ދިރިއުޅެމުން އަންނަ ސަރަޙައްދަށްވާތީ މާލެއަށް ދިމާވެފައިވާ ބޮޑެތި ކަންކަން ހައްލު ކުރުމަށް މި ސަރުކާރުން މަސައްކަތް ކުރަމުން އަންނަކަމަށް ރައީސް ފާހަގަކުރެއްވިއެވެ.

ރައީސުޖުމްހޫރިއްޔާ ވިދާޅުވީ މާލެއަށް ދިމާވެފައި އޮތް އެންމެ ބޮޑު އެއް މައްސަލައަކީ މަގުތަކާ ގުޅިފައިވާ ތަފާތު މައްސަލަތައް ކަމަށެވެ. އޭގެ ތެރޭގައި މަގުތަކުގެ ފެންވަރުދަށް ކަމަށާއި އެމަނިކުފާނު މޭޔަރުކަމުގެ ހުވާކުރެއްވިއިރު އޭރުގެ ސިޓީ ކައުންސިލުން ފަށާފައި އޮތް މަގުހެދުމުގެ މަޝްރޫއު ކުރިއަށްގެންދަން ބޭނުންފުޅުވި ނަމަވެސް ސަރުކާރުން އެ މަޝްރޫއު އަތުލުމުގެ ސަބަބުން މަސައްކަތް ކުރިއަށްނުގެންދެވުނު ކަމަށް ރައީސް ވިދާޅުވިއެވެ. ނަމަވެސް އެ މަޝްރޫއުވެސް މިހާރު ކުރިއަށްގެންދަން ސަރުކާރުން ނިންމާފައިވާ ކަމަށް އެމަނިކުފާނު ވިދާޅުވިއެވެ.

މާލޭގެ މަގު ހެދުމުގެ މަޝްރޫއު ކުރިއަށްގެންދާނީ ޗައިނާގެ ގްރާންޓް އެހީގެ ތެރެއިން ކަމަށް ރައީސް ފާހަގަކުރެއްވިއެވެ. އަދި މި މަޝްރޫއު ކުރިއަށްގެންދާނީ މާލެ ސިޓީ ކައުންސިލް މެދުވެރިކޮށް ކަމަށްވެސް އެމަނިކުފާނު ވިދާޅުވިއެވެ.

"މަގު ހެދުމުގެ މަސައްކަތަކީ ވަރަށް އިސްކަންދީގެން އިރާދަކުރެއްވިއްޔާ ކުރިއަށް ގެންދާނެ މަސައްކަތެއް. އޭގެތެރޭގައި، ފެންބޮޑުވުމުގެ މައްސަލައާއި، ޑީވޯޓަރިންގގެ މައްސަލަވެސް އިރާދަކުރެއްވިއްޔާ ހަމަޖެހިގެންދާނެ. އާދެ، މި މަސައްކަތަށް އިރާދަކުރެއްވިއްޔާ، ކައުންސިލްގެ ފުރިހަމަ އެއްބާރުލުން ލިބޭނެކަމަށް ޔަޤީންކުރަން. ކައުންސިލްގެ ފުރިހަމަ އެއްބާރުލުމާ އެކީގައި، މާލޭގެ މަގު ހެދުމުގެ މަސައްކަތަކީ، ވަރަށް އަވަހަށް ފެށިގެންދާނެ ކަމެއް،" ރައީސް ވިދާޅުވިއެވެ.

މަގުތަކާ ގުޅިފައިވާ އެންމެ ބޮޑު އެއް މައްސަލައަކީ ޕާކިން މައްސަލަކަން ފާހަގަކުރައްވައި ރައީސް ވިދާޅުވީ އެމަނިކުފާނު މޭޔަރު ކަމުގައި ހުންނެވިއިރު މާލޭގެ 6 ސަރަހައްދެއްގައި ޕާކިން ބިލްޑިންގ އަޅަން ބޭނުންފުޅުވި ނަމަވެސް ސަރުކާރުން އެ ފުރުޞަތު ނުދެއްވި ކަމަށެވެ. ނަމަވެސް މިހާރު އެ ބިލްޑިންގެ މަސައްކަތް ކުރިއަށްގެންދަން ނިންމަވާފައިވާ ކަމަށާއި އޭޕްރީލް މަހު އެ ބިލްޑިންތަކުގެ އަމަލީ މަސައްކަތް ފެށިގެންދާނެކަމަށް ރައީސް ވިދާޅުވިއެވެ.

މަގުހެދުމާއި ޕާކިން ބިލްންޑިގެ އިތުރުން މަސްމާރުކެޓެއް އެޅުމަށް ވެސް އޭރު ސަރުކާރުން ފުރުޞަތު ނުދެއްވިކަން ރައީސް ފާހަގަކުރެއްވިއެވެ. އެ މަސައްކަތް ވެސް ރަމަޟާން މަސް ނިމުމާއެކު ފެށޭނެ ކަމަށް ރައީސް ވިދާޅުވިއެވެ.

މަސްމާރުކޭޓު އެޅުމަށް ސަރުކާރުން ނިންމާފައިވަނީ މިހާރު ލޯކަލް މާރުކޭޓު ހުރިތަނުގައެވެ. މިއީ ޒަމާނީ ފެންވަރުގެ އިމާރާތަކަށް ވާނެ ކަމަށާއި އެ އިމާރާތުގެ ތިރީގައި ޕާކިން ޒޯނެއް ހަދާނެ ކަމަށް ރައީސް ވިދާޅުވިއެވެ.

"އެންމެ ޒަމާނީ ސްޓޭޓް އޮފް ދަ އާރޓް، މަސް މާރުކޭޓް. ފަސްޓް، ސެކަންޑް ފްލޯރ ލެވެލްގައި، ފްރެޝް ފުޑް، ދެން މި ކިޔާ އެކިކަހަލަ ކާބޯތަކެތި. ލޯކަލް މާރުކޭޓް އަދި ދަތުރުވެރިންގެ މާރުކޭޓުގައި އެ ވިއްކާ ބާވަތްތަކުގެ ތަކެތި ވިއްކާގޮތަށް ހުންނާނެ. އަދި އެންމެ މަތީގައި އެކިކަހަލަ ވިޔަފާރިތައް. ރެސްޓޯރެންޓް ފަދަ ތަންތަން ހުންނަ ޑިޒައިނެއް އެއީ. އެހެންވީމާ، އެއީ ކައުންސިލުން ފާސްކޮށްފައި އޮތް އެއްޗެއް. އެހެންވީމާ، އެކަން ކުރިއަށް ގެންދިޔުމުގައި، އިރާދަކުރެއްވިއްޔާ ކާމިޔާބީ ހާސިލްވާނެ" ރައީސް ވިދާޅުވިއެވެ.

ރައީސް ޑރ. މުޢިއްޒު ވިދާޅުވީ މާލޭގެ ސިނަމާލެ ސަރަޙައްދުގައި ގެދޮރު ބިނާ ކުރުމުގެ މަޝްރޫއު ވެސް މިހާރު ކުރިއަށްގެންދެވޭނެ ގޮތް ހަމަޖެހިފައިވާ ކަމަށާއި އެ މަސައްކަތް ވެސް އޭޕްރިލް މަހު ފަށްޓަވާނެ ކަމަށެވެ. އަދި ވިލިމާލޭގައި 500 ހައުސިންގ ޔުނިޓް އެޅުމުގެ މަސައްކަތް ވެސް އޭޕްރިލް މަހު ފެށުމަށް ތައްޔާރުވަމުން އަންނަ ކަމަށާއި މަލޭގެ ތެރޭގައި ހުރި ގަރާޖުތަކާއި ގުދަން އަދި ވަރކްޝޮޕްތައް އިންޑަސްޓްރިއަލް ޒޯނަށް ބަދަލު ކުރައްވާނެ ކަމަށް ވެސް ރައީސް ވިދާޅުވިއެވެ.

މީގެ އިތުރުން ޗައިނާގެ ގްރާންޓް އެހީގެ ދަށުން ވިލުިމާލޭގައި 100 އެނދުގެ ޓަރޝަރީ ހޮސްޕިޓަލެއް އެޅުމުގެ މަސައްކަތް ވެސް ކުރިއަށްގެންދަވާނެ ކަމަށް ރައީސް ވިދާޅުވިއެވެ.