ޗައިނާގެ ޔުނާން ޕުރޮވިންސުގައި ހިނގި ބިންގަނޑު ކެނޑުމުގެ ނުރައްކާތެރި ޙާދިޘާއެއްގައި މަރުވި މީހުންގެ ޢަދަދު 11އަށް އަރައިފިއެވެ. އެ ޙާދިޘާ ހިނގާފައި ވަނީ ޔުނާންގެ ޝެންޝިއޯންގް ކައުންޓީގައެވެ.
ބިންގަނޑު ކެނޑުމުގެ އަސަރު އެ ކައުންޓީގެ ދެ އަވަށަކަށް ކޮށްފައިވެއެވެ. އެ ޙާދިޘާގައި އެ ދެ އަވަށުގެ ގިނަ ޢިމާރާތްތަކަކަށް ގެއްލުންވި ކަމަށާއި ހިލައާއި ވެލީގެ އިތުރުން ވެއްޓުނު ޢިމާރާތްތަކުގެ ދަށުގައި ގިނަ ޢަދަދެއްގެ ބަޔަކު ތާށިވެފައިވާ ކަމަށް ބެލެވޭ ކަމުގައި މީހުން ސަލާމަތް ކުރަން މަސައްކަތް ކުރަމުންދާ ފަރާތްތަކުން ބުނެއެވެ. އެ މަސައްކަތުގައި ޗައިނާގެ އަސްކަރިއްޔާއިން ވެސް ދަނީ އެހީތެރިކަން ފޯރުކޮށްދެމުންނެވެ. އެ ޙާދިޘާގައި 18 ޢިމާރާތެއް ވެއްޓި 47 މީހުން ގެއްލިފައިވާ ކަމަށް ބެލެވެއެވެ.
ބޯކޮށް ސްނޯ ފޭބުމާއި އާދަޔާ ޚިލާފަށް ފިނިހޫނުމިން ދަށްވުމުގެ ސަބަބުން ގެއްލިފައިވާ މީހުން ސަލާމަތް ކުރަން ކުރަމުންދާ މަސައްކަތްތަކަށް ވަނީ ހުރަސް އެޅިފައެވެ. އެ ސަރަޙައްދުގެ ބިންގަނޑު އޮތް ހާލަތުގެ ސަބަބުން ބިންގަނޑު ކޮންނަން ބޭނުން ކުރާ އާލާތްތައް ބޭނުން ކުރުމަށް ހުރަސްތަކެއް ކުރިމަތިވެފައިވާ ކަމުގައި ވެސް އެ ޓީމުތަކުން ބުނެއެވެ.
ޗައިނާގެ ނޭޝަނަލް ހެލްތު ކޮމިޝަނުން ބުނީ ބިންގަނޑު ކެނޑުމުގެ ޙާދިޘާގައި ޒަޚަމުވި ދެ މީހަކަށް ހޮސްޕިޓަލުގައި އެޑްމިޓު ކޮށްގެން ފަރުވާ ދެމުންދާ ކަމުގައެވެ. އޭގެ ތެރެއިން އެކެއްގެ ބޮލަށް ވަރަށް ބޮޑަށް ގެއްލުން ލިބިފައިވާ ކަމުގައި ވެސް އެ އިދާރާއިން ބުނެއެވެ. ބިންގަނޑު ކެނޑުމުގެ ޙާދިޘާ ހިނގި ސަރަޙައްދުގައި ދިރިއުޅޭ 500 އެއްހާ މީހުން މިހާރު ވަނީ ރައްކާތެރި ހިސާބުތަކަށް ބަދަލު ކޮށްފައެވެ.