މާލޭގައި އެއްގަމު އުޅަނދު ރަޖިސްޓްރީކޮށްދޭނެ އަދަދެއް 6 މަސްދުވަހުގެ ތެރޭގައި ކަނޑައަޅަނީ

މާލެ ސިޓީގައި އެއްގަމު އުޅަނދު ރަޖިސްޓަރީކޮށްދޭނެ އަދަދާއި އުޅަނދު ބޭނުންކުރެވޭނެ މުއްދަތާއި ގުޅޭގޮތުން ކުރިއަށް އޮތް 6 މަސްދުވަހުގެ ތެރޭގައި ގޮތެއް ނިންމަވާނެކަމަށް މާލެ ސިޓީގެ މޭޔަރ އާދަމް އާޒިމް ވިދާޅުވެއްޖެއެވެ.

އާޒިމް މިހެން ވިދާޅުވީ މާލެ ސިޓީގެ މޭޔަރުކަމުގެ މަޤާމާއި ހަވާލުވެވަޑައިގަތުމަށްފަހު ބޭއްވެވި ފުރަތަމަ ނޫސްވެރިންގެ ބައްދަލުވުމުގައެވެ.

އެއްގަމު ދަތުރުފަތުރުގެ ޤާނޫނުގައި އޮންނަގޮތުން ދިވެހިރާއްޖޭގެ ވަކި ރަށެއްގައި ނުވަތަ ސިޓީއެއްގައި ނުވަތަ ސަރަހައްދެއްގައި އެއްގަމު އުޅަނދު ރަޖިސްޓަރީކޮށްދޭނެ އަދަދާއި އުޅަނދު ބޭނުންކުރެވޭނެ މުއްދަތު އެ ރަށެއްގެ ނުވަތަ ސިޓީއެއްގެ ކައުންސިލުން ކަނޑައަޅަންޖެހޭނެއެވެ.

މާލެ ސިޓީގެ މޭޔަރ ވިދާޅުވީ އެންމެ މުހިންމު މަސައްކަތެއްގެ ގޮތުގައި މާލޭގެ މަގުތަކުގެ ތޮއްޖެހުން ކުޑަކުރުމަށް ކުރަންޖެހޭ މަސައްކަތްތައް ފައްޓަވާނެކަމަށެވެ. އެގޮތުން މާލޭގައި ދުއްވާ ވެހިކަލްގެ އަދަދު ކަނޑައެޅުމަށް ކުރަންޖެހޭ މަސައްކަތްތަކުގެ މަޝްވަރާގެ މަސައްކަތް މިހާރުވެސް ޓްރާންސްޕޯޓް މިނިސްޓްރީއާއެކު ފައްޓަވާފައިވާކަމަށް އޭނާ ވިދާޅުވިއެވެ.

އާޒިމް ވިދާޅުވީ ވެހިކަލް ރަޖިސްޓްރީކޮށްދޭނެ އަދަދެއް ކަނޑަނާޅާ މަގުތައް ތޮއްޖެހުމުގެ މައްސަލަ ހައްލުނުވާނެކަމަށެވެ.

"ޓްރާންސްޕޯޓް މިނިސްޓްރީއާއެކު ގާތުން މަސައްކަތްކޮށް މިކަމުގައި ގޮތެއް ނިންމާނަން. ކުރިއަށް އޮތް 6 މަސް ތެރޭގައި، ވެހިކަލް ލިމިޓްކުރުމުގެ މައްސަލައިގައި ގޮތެއް ނިންމާނަން. މިއީ ވަރަށް މުހިންމު ކަމެއް." އާޒިމް ވިދާޅުވިއެވެ.

އާޒިމް ވިދާޅުވީ މާލޭގެ މަގުތަކުގައި ހުރި ބޭނުން ނުކުރާ ވެހިކަލްތަކާމެދު ޢަމަލުކުރާނެގޮތެއްވެސް ކަމާބެހޭ ފަރާތްތަކާއި މަޝްވަރާކުރައްވައިގެން ހޯދާނެކަމަށެވެ. މީގެއިތުރުން ސިޓީ ކައުންސިލުން ޕާކުކުރުމަށް ޖާގަ ދޫކޮށްފައިވާ ގޮތުގެ އުސޫލުތައް މުރާޖައާކޮށް، މާލޭގެ މަގުތަކަށް އެންމެ ލުއިވާނެގޮތަށް އެމައްސަލަތަކަށް ޙައްލު ހޯއްދެއްވުމަށްވެސް މަސައްކަތް ކުރައްވާނެކަމަށެވެ.

މީގެއިތުރުން މާލޭގެ މަގުތައް ޒަމަނީ ފެންވަރަށް ތަރައްޤީކުރުމަށް ކުރިއަށްގެންދިއުމަށް ސަރުކާރުން ނިންމާފައިވާ މަޝްރުޢޫއަށްވެސް ސިޓީ ކައުންސިލުން ފުރިހަމައަށް އެއްބާރުލުން ދެއްވާނެކަމަށް އާޒިމް ވިދާޅުވިއެވެ. އަދި ރަނގަޅު ފެންވަރަކަށް މަގުތައް ހެދި ތަރުތީބުވުމުންވެސް ތޮއްޖެހުމުގެ މައްސަލައަށް ބޮޑު ލުޔެއް ލިބޭނެކަމަށް އާޒިމް ވިދާޅުވިއެވެ.