އަމީނީމަގު "އެއްކޮޅުން އަނެއްކޮޅަށް ބަލައި" ހުރިހާ މައްސަލައެއް ހައްލުކުރަނީ
-
ކުރީ ސަރުކާރުގައި ހެދި ސެގްމަންޓްތަކުގައި ގިނަ މައްސަލަތަކެެއް
-
ބައެއް ސަރަހައްދުތަކުގައި ވަޅުގަނޑު ވަނީ ހެދިފައި
ޒަމާނީ ފެންވަރަކަށް ތަރައްގީކުރަމުންދާ އަމީނީ މަގުން ފާހަގަވާ ހުރިހާ މައްސަލަތަކެއް ހައްލުކުރުމުގެ މަސައްކަތް ކުރަމުންދާކަމަށް ސަރުކާރުން ވިދާޅުވެއްޖެއެވެ.
ސަރުކާރުން މިކަން ހާމަކޮށްފައި މިވަނީ އަމީނީ މަގުގެ ތާރު އަޅާފައިވާ ބައެއް ސަރަހައްދުތަކުން ތާރުތައް ނެއްޓިގެން ދިއުމާއި ބައެއް ތަންތަނުގައި ވަޅުގަނޑު ހެދިފައި ހުރިކަމުގެ ޝަކުވާ ބައެއް ފަރާތްތަކުން ކުރަމުންގެންދާ ދަނޑިވަޅެއްގައެވެ.
އިމާރާތްކުރުމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވީ އަމީނީ މަގު ތަރައްގީކުރުމުގެ މަސައްކަތުގެ ދަށުން އިއްޒުއްދީންމަގާއި ހަމައަށް ތާރު އެޅުމުގެ މަސައްކަތް ކޮށްފައިވަނީ ކުރީ ސަރުކާރުންކަމަށެވެ.
ވަޒީރުގެ ޓްވީޓްގައި ފާހަގަކޮށްފައިވާ ގޮތުން ސޯޝަލް މީޑިއާގައި ދައުރުވަމުންދަނީ ކުރީ ސަރުކާރުން ހަދާފައިވާ އަމީނީ މަގުގެ ސެގްމަންޓްތަކުން ހަލާކުވެފައިވާ ތަންތަނުގެ ފޮޓޯތަކެވެ.
ވަޒީރު ވިދާޅުވީ އަމީނީ މަގު "އެއްކޮޅުން އަނެއްކޮޅަށް" ބަލައި، ފާހަގަވާ މައްސަލަތައް ރަނގަޅުކުރުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަނުން މިހާރު ކުރަމުންދާކަމަށެވެ.
އަމީނީ މަގު އިއްޒުންދީން މަގާ ހަމައަށް ކޮށްފައިވާ މަސައްކަތަކީ 17 ނޮވެންބަރު 2023 ގެ ކުރިން ކޮށް ނިންމާފައިވާ މަސައްކަތެއް. @rdcmaldives މިހާރު ދަނީ އަމީނީ މަގުގެ އެއްކޮޅުން އަނެއްކޮޅަށް ހުރި މައްސަލަތައް ބަލައި ރަނގަޅުކުރުމުގެ މަސައްކަތް ކުރަމުން. https://t.co/68w4W77vlo
— Abdulla Muththalib (@muththo) January 23, 2024
އަމީނީ މަގު ތާރު އަޅައިގެން ތަރައްގީކުރުމުގެ މަސައްކަތް ކުރީ ސަރުކާރުން ފުރަތަމަ ހަވާލުކުރީ މާލޭ ސިޓީ ކައުންސިލާއެވެ. ނަމަވެސް އެމަސައްކަތް ފަހުން ވަނީ އާރުޑީސީއާ ހަވާލުކޮށްފައެވެ.
އަމީނީ މަގު ތަރައްގީކޮށް، ތާރު އެޅުމުގެ މަސައްކަތް ކުރީ ސަރުކާރުން އާރުޑީސީއާ ހަވާލުކޮށްފައި އޮތްނަމަވެސް، ތާރު އަޅަން ބޭނުންވާ ސާމާނު އެ ކުންފުނީގައި ނެތުމުން، އެ މަގުގައި ތާރު އެޅުމުގެ މަސައްކަތް ފުރަތަމަ ކުރިއަށް ގެންދިޔައީ އެމްޓީސީސީންނެވެ.
13 ސެގްމަންޓަކަށް ބަހާލައިގެން ކުރިއަށްގެންދިޔަ އަމީނީ މަގުގެ މަސައްކަތް މިދިޔަ އަހަރު ނިންމާގޮތަށް ތާވަލްކުރިނަމަވެސް އެ މަސައްކަތް ތާވާލާއި އެއްގޮތަށް ނިންމާފައެއް ނުވެއެވެ. އަދި ތާރު އެޅުމަށްފަހު ކުރީ ސަރުކާރުން ހުޅުވި ސަރަހައްދުތަކުގައިވެސް ހުރީ ބައެއް މަސައްކަތްތައް އެއްކޮށް ނުނިންމައެވެ.
ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެރިކަމާއި ހަވާލުވެވަޑައިގަތުމަށްފަހު އަމީނީ މަގުގެ މަސައްކަތް އަވަސްކުރުމަށް ހާއްސަ އިސްކަމެއް ވަނީ ދެއްވާފައެވެ. އެގޮތުން ކުރީ ސަރުކާރުން މީގެކުރިން ހަދާފައިވާ ސެގްމަންޓްތަކުގައި ހުރި މައްސަލަތައް ހައްލުކުރުމުގެ އިތުރުން، މަގުގައި ނުނިންމާ އޮތް 2 ސެގްމަންޓެއްގެ މަސައްކަތްވެސް ވަނީ މި ސަރުކާރުން މިހާރު ނިންމާލާފާއެވެ.