ފަލަސްޠީނުގެ ޣައްޒާގައި ވެރިކަންކުރާ ޙަމާސް ޖަމާޢަތާ ދެކޮޅަށް ޔަހޫދީ އިސްތިޢުމާރީ ފައުޖުން ކުރަމުންދާ ހަނގުރާމާގައި އެއް ދުވަހުގެ މަތިން 24 ސިފައިން މަރުވުމުން ޔަހޫދީންނަށް ބޮޑު ސިހުމެއް ލިބިއްޖެއެވެ.
ފާއިތުވި ދުވަސްތަކުގައި ޔަހޫދީންގެ ޙަމަލާތައް ބޮޑަށް އަމާޒުކޮށްފައި ވަނީ ޣައްޒާގެ މެދުތެރެއާއި ދެކުނުގެ ސަރަޙައްދުތަކަށެވެ. ނަމަވެސް އެއީ ޙަމާސްގެ ބާރުގަދަ ސަރަޙައްދުތަކެކެވެ. އެ ގޮތުން އެ ޖަމާޢަތުގެ މުޖާހިދުން ދަނީ އެ ސަރަޙައްދުގެ ކޮންމެ ޢިމާރާތެއް އަދި ކޮންމެ މަގެއް ހުށިޔާރުކަމާއެކު ދިފާޢުކުރަމުންނެވެ. އެ ގޮތުން ބަދަލުކުރަމުންދާ ޙަމަލާތަކުގައި ޔަހޫދީންގެ 21 މީހުން މަރައިލާފައި ވަނީ އެ މީހުން ތިބި ޢިމާރާތެއް ގޮއްވާލައިގެންނެވެ.
މީގެ ކުރިން ވެސް ޔަހޫދީ ފައުޖަށް ބޮޑެތި ގެއްލުންތަކެއް ލިބެމުންދާ ވީޑިއޯތަކެއް ޙަމާސުން ވަނީ އެކި ފަހަރު މަތިން ޢާންމުކޮށްފައެވެ. ނަމަވެސް ޔަހޫދީ ފައުޖަށް ލިބެމުންދާ ގެއްލުންތަކަށް ބޮޑު ސަމާލުކަމެއް ލިބުނީ މި ފަހަރުއެވެ. އެ ގޮތުން ޔަހޫދީ ސިފައިންނަށް ލިބެމުންދާ ގެއްލުންތަކުގެ ޚަބަރުތައް ޔަހޫދީ ނޫސްތަކުން ވަނީ ތަފުޞީލުކޮށް ގެނެސްދީފައެވެ. ނަމަވެސް ހަނގުރާމަ ހުއްޓައިލުމުގެ އޮއިވަރެއް ޔަހޫދީންގެ މެދުގައި ފެތުރިފައެއް ނުވެއެވެ.
ގިނަ ޢަދަދެއްގެ ސިފައިން މަރުވެފައިވާ ދަނޑިވަޅެއްގައި ޔަހޫދީންގެ ހަރުކަށި ބޮޑުވަޒީރު ބުންޔާމިން ނަތަންޔާހޫ ވިދާޅުވީ ފުރިހަމަ ކާމިޔާބެއް ލިބެންދެން ހަނގުރާމަ ކުރިއަށް ދާނެ ކަމަށެވެ. ޔަހޫދީންގެ ދިފާޢީ ވަޒީރު ޔޮއޯވް ގަލާންޓް ވިދާޅުވީ ގިނަ ޢަދަދެއްގެ ސިފައިން މަރުވުަމީ ހިތަށް އުނދަގޫ ކަމެއް ކަމަށާއި އެ ހަނގުރާމައަކީ ޔަހޫދީންގެ ކުރިމަގު ބައްޓަންކުރަން ކޮންމެހެން ވެސް ކާމިޔާބު ކުރަން ޖެހޭ ހަނގުރާމައެއް ކަމަށެވެ.
ޙަމާސްގެ އިތުރުން ލުބުނާނުގެ ޙިޒްބުﷲ ޖަމާޢަތާއި ޔަމަނުގެ ޙޫޘީ ޖަމާޢަތުން ދެމުންދާ ޙަމަލާތަކުގައި ލިބެމުންދާ ގެއްލުންތައް ޔަހޫދީން ދަނީ ވަރަށް ބޮޑަށް ދުނިޔެއަށް ސިއްރުކުރަމުންނެވެ. ބެލެވޭ ގޮތުގައި ހަނގުރާމާގައި ޔަހޫދީންގެ އެތައް ހާސް ސިފައިންނެއް ވަނީ މަރުވެ އަދި ޒަޚަމުވެފައެވެ.