ޔޫކްރެއިންގެ ވެރިރަށް ކީވާއި ދެވަނައަށް އެންމެ ބޮޑު ރަށް ކަމުގައިވާ ހަރްކިވަށް ރަޝިޔާއިން ދިން ވަރުގަދަ މިސައިލް ޙަމަލާތަކެއްގައި އާންމުންގެ 18 މީހުން މަރުވެއްޖެއެވެ. ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވީ ރަޝިޔާގެ ޙަމަލާތަކުގައި އެ ދެ ރަށުގައި ދިރިއުޅޭ އާންމުންގެ 130 އަށްވުރެ ގިނަ މީހުން ޒަޚަމުވެފައިވާ ކަމުގައެވެ.
ޔޫކްރެއިންގެ އިރުމަތީގައި އޮންނަ ހަރްކިވަށް ރަޝިޔާއިން ތިން ފަހަރެއްގެ މަތިން ވަރުގަދަ ޙަމަލާތަކެއް ދީފައިވާއިރު، މި ޙަމަލާތަކާއި އެ ރަށުގެ އިތުރުން ކީވްގައި އާންމުން ދިރިއުޅޭ ގިނަ ޢަދަދެއްގެ ޢިމާރާތްތަކަށް ބޮޑެތި ގެއްލުންތަކެއް ލިބިފައިވާ ކަމުގައި ޒެލެންސްކީ ވިދާޅުވިއެވެ. ދެކުނުގައި އޮންނަ ހަރްސަނަށް ވެސް ރަޝިޔާގެ ޙަމަލާތައް އަމާޒުކޮށްފައިވެއެވެ.
ޒެލެންސްކީ ވިދާޅުވީ، ރަޝިޔާއިން އެންމެ ފަހުން ދީފައިވާ ޙަމަލާތަކުގައި އެކި ބާވަތްތަކުގެ 40 ވަރަކަށް މިސައިލް ބޭނުން ކޮށްފައިވާ ކަމުގައެވެ. އަދި، ޔޫކްރެއިންގެ 200 އަމާޒަކަށް ޙަމަލާ ދިން ކަމަށާއި، އެ ޙަމަލާތަކުގައި އާންމުން ދިރިއުޅޭ 139 ގެއަކާއި ޢިމާރާތަކަށް ގެއްލުންވި ކަމުގައެވެ.
ހަރްކިވަަށް ދީފައިވާ ޙަމަލާތަކުގައި އާންމުންގެ އަށް މީހުން މަރުވި ކަމުގައި އެ ސަރަޙައްދުގެ ގަވަރުނަރާއި މޭޔަރު ވިދާޅުވިއެވެ. މި ޙަމަލާތަކުގައި ސުންނާފަތި ކޮށްލާފައިވާ ޢިމާރާތްތަކުގެ ދަށުވެ، ތާށިވެފައިވާ ކަމަށް ބެލެވޭ މީހުން ސަލާމަތް ކުރުމަށް ޔޫކްރެއިންގެ ކުއްލި ހާލަތްތަކުގައި ހަރަކާތްތެރިވާ އިދާރާގެ ޓީމުތަކުން އަދިވެސް ދަނީ ހަރަކާތްތެރިވަމުންނެވެ. މި ޙަމަލާތަކުގައި ހަރްކިވްގެ 100 އެއްހާ ޢިމާރާތަށް ގެއްލުން ލިބުނު ކަމުގައި ގަވަރުނަރު އޮލެގް ސިންޔެހުބޮވް ވިދާޅުވިއެވެ.
ޔޫކްރެއިންގެ އަސްކަރިއްޔާއިން ރަޝިޔާއިން ޙަމަލާދޭން ފޮނުވައިލި 44 މިސައިލްގެ ތެރެއިން 22 މިސައިލެއް ދިފާޢުކޮށް ވައްޓައިލާފައެވެ. އޭގެ ތެރެއިން 20 މިސައިލަކީ ވެރިރަށް ކީވަށް ޙަމަލާދޭން އަމާޒު ކޮށްފައިވާ މިސައިލްތަކެއް ކަމުގައި ޔޫކްރެއިންގެ އަސްކަރިއްޔާއިން ބުނެއެވެ.
ޔޫކްރެއިންގެ ރަށްތަކަށް އަމާޒުކޮށް ރަޝިޔާއިން ދެމުންދާ މިސައިލާއި ޑްރޯން ޙަމަލާތައް ފަހަކަށް އައިސް ވަނީ އިތުރު ކޮށްފައެވެ. މި ގޮތުން، ފާއިތުވި ދެ މަހެއްހާ ދުވަހުގެ ތެރޭގައި ރަޝިޔާއިން 600 މިސައިލް ޙަމަލާއާއި، 1,000 އެއްހާ ޑްރޯން ޙަމަލާ ދީފައިވާ ކަމުގައި ޔޫކްރެއިންގެ ދިފާޢީ ވަޒީރު ރުސްތަމް އުމެރޮވް ވިދާޅުވިއެވެ.
ރަޝިޔާގެ ފައުޖުތަކުން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ރަޝިޔާއިން ވަނީ ޔޫކްރެއިންގެ ބައެއް ސަރަޙައްދުތަކަށް އަތްގަދަ ކޮށްފައެވެ. އޭގެ ތެރޭގައި ޔޫކްރެއިންގެ އިރުމަތީ ދޮންބާސް ސަރަޙައްދުގައި އޮންނަ ލުހާންސްކާއި ދޮންޏެސްކުގެ އިތުރުން ދެކުނުގައި އޮތް ޒަޕޮރީޜިޔާގެ ސަރަޙައްދުތައް ހިމެނެއެވެ. ރަޝިޔާގެ އަތްދަށުން މިނިވަން ހޯދުމަށް ޔޫކްރެއިނުން މިހާރު ދަނީ ރައްދު ޙަމަލާތައް ދެމުންނެވެ. ނަމަވެސް އެ ޙަމަލާތަކުން ބޮޑެތި ކުރިއެރުންތަކެއް ހޯދިފައި ނުވާކަން ފާހަގަ ކޮށްލަން ޖެހެއެވެ.