ސިފަވަންތަ ޝަޚުސިއްޔަތަކަށްވުމަށް ދިވެހި އަސްކަރިއްޔާ

ރާއްޖެއަށް ދިމާވާ ބޮޑު ކޮންމެ ކާރިސާއަކާއި، ހާދިސާއެއްގައި ދިވެހި ރައްޔިތުންނާއި އެންމެ ގައިތުން މަސައްކަތް ކުރާ މުއައްސަސާއަކީ ދިވެހިރާއްޖޭގެ ޤައުމީ ދިފާޢީ ބާރެވެ. މިއީ ކޮންމެ ދިވެހި ރައްޔިތެއްވެސް ދެބަސްވުމެއްނެތި ޤަބޫލުކުރާ ކަމެކެވެ.

ޤައުމަށްޓަކައި، ދިވެހި ސިފައިން ވާ ޤުރުބާނީގެ އެންމެ ލާމަސީލު މިސާލަކަށް ނޮވެންބަރު 3ގެ ހާދިސާއާއި 2004ގެ ސުނާމީ އަދި 2014 ވަނަ އަހަރު މާލެ ފެނަށް ޖެހުނު ހާދިސާ ފުދެއެވެ. އެހެންކަމުން ދިވެހި އަސްކަރިއްޔާ އަކީ ދިވެހި ރައްޔިތުންގެ ދިފާޢީ އައްޑަނައެވެ. ދިވެހި ސިފައިންގެ އަޒުމަކީ އެންމެ ފަހު މީހާގެ އެންމެ ފަހު ނޭވާއާ ޖެހެންދެން ވެސް ގައުމުގެ ހައްގުގައި ގުރްބާންވުމެވެ. ސިފައިންނަކީ އެމީހުންގެ އަމިއްލަ ސަލާމަތާއި ރައްކާތެރިކަމަށްވުރެ، ރައްޔިތުންގެ ސަލާމަތަށް އިސްކަންދޭ ބައެއްކަން އަންނަނީ ބަހާއި ޤަމަލުން ސާބިތުކޮށްދެމުންނެވެ.

އެހެންކަމުން މި ޤައުމީވަންތަ ދިވެހި ސިފައިންގެ ލަޝްކަރާއި ނުގުޅޭންވީ ކީއްވެހެއްޔެވެ.

ދިވެހި އަސްކަރިއްޔާއަކީ ނުވަތަ ޤައުމީ ދިފާޢީ ބާރަކީ އަސްކަރީ ތަމްރީނު ހަދައިގެން ހަމައެކަނި ފޯރިއަށް ތިބެންޖެހޭ ބައެއްކަމަށް ބައެއް ފަރާތްތަކުން ދެކުނުނަމަވެސް އެއީ ހަގީގަތެއް ނޫނެވެ. ސިފައިންގެ މީހަކަށްވެހުރެ ކުރިއަށް ނުދެވޭނެ ދާއިރާއެއް ނެތެވެ. ޑޮކްތަރުކަމާއި ނަރުސްކަމާއި، ޕައިލެޓުކަމާއި، އިންޖިނިއަރުކަމާއި، މިއުޒިޝަނަކަށް ވުން ހިމެނޭހެން ކޮންމެ ދާއިރާއަކުންވެސް ކުރިއަށް ދެވޭނެއެވެ. އަދި އބޭނުން ދާއިރާއަކުން ކުރިއަށްދިއުމަށް އެތައް ފަހި ފުރުޞަތުތަކެއް ކޮށައިދެއެވެ.

ޕީއެސްއެމްއަށް މަޢުލޫމާތު ދެމުން އެމްއެންޑީއެފްގެ ޕްރިންސިޕަލް ޑައިރެކްޓަރ ކާނަލް މުޙައްމަދު ފިރްދައުސް ވަނީ ސިފައިންގޭގައި ކުރިއަށް ދެވެންހުރި ދާއިރާތައް ވަރަށް ތަފްސީލްކޮށް ކިޔާދެއްވާފައެވެ.

އެގޮތުން، ކާނަލް ފިރްދައުސް ވިދާޅުވީ ސިފައިންގެ ތެރޭގައި އުޅަނދުފަހަރު ދުއްވާ ކެޕްޓަނުންނާއި، ސެއިލަރުންނާއި، ޑައިވަރުންނާއި، އޭވިއޭރޓަރުންނާއި، ވެޕަން ސްޕެޝަލިސްޓުންނާއި، ތަފާތު އެކި ދާއިރާތަކުގެ އިންޖިނިއަރުންނާއި، އާކިޓެކްޗަރުންނާއި، ލޮޖިސްޓޭޝަނުންނާއި، އައިޓީ އެކްސްޕާޓުންނާއި، ލޯޔަރުންނާއި، އެކައުންޓަންޓުންގެ އިތުރުން، އެޑްމިނިސްޓްރޭޓަރުންނާއި، މީޑިޔާ އޮފިޝަލުންނާއި، މިޔުޒިޝަނުންނާއި، ޑޮކްޓަރުންނާއި ނަރުހުންފަދަ ދާއިރާތައް ހިމެނޭ ކަމަށެވެ.

އެމްއެންޑީއެފް ބެހިފައިވަނީ މައިގަނޑު ތިން ގޮތްޕަކަށެވެ. އެ އެ 3 ގޮތްޕަކީ ކަނޑުގެ ބާރެއްގެ ގޮތުގައި ކޯސްޓުގަރޑް، އެއްގަމު ބާރެއްގެ ގޮތުގައި މެރިން ކޯޕްސް، އަދި މަދަނީ ދިފާޢުގެ ބާރެއްގެ ގޮތުގައި ފަޔަރ އެންޑް ރެސްކިޔު ސާވިސްއެވެ.

"ޤައުމީ ދިފާޢީ ބާރު ސްޓްރަކްޗަރ ކޮށްފައިވާ ގޮތަށް ބަލާއިރު، ކަނޑުގެ ބާރެއްގެ ގޮތުގައި ކޯސްޓް ގާރޑު، އެއްގަމުގެ ބާރެއްގެ ގޮތުގައި މެރިން ކޯޕްސް، އަދި މަދަނީ ދިފާޢުގެ ބާރެއްގެ ގޮތުގައި ފަޔަރ އެންޑް ރެސްކިޔު ސާވިސް ހަރަކާތްތެރިވޭ." ފިރްދައުސް ވިދާޅުވިއެވެ.

މީގެ އިތުރުން، މުޖުތަމަޢު ޤަބޫލުކުރާ ހަރުދަނާ ސިފަވަންތަ ޝަޚުސިއްޔަތަކަށްވުމަށް، ސިފައިންގެއަކީ ވަރަށް ރަނގަޅު މުއައްސަސާއެއް ކަމަށް ފިރުދައުސް ފާހަގަކުރެއްވިއެވެ.


ދިރިއުޅުމަށް އާރޯކަމާއި ރޯކަން ގެނައުމަށް، އަނެއްކާވެސް 18 އަހަރުން މަތީގެ ދިވެހި ކޮންމެ ޒުވާނަކަށް މިވަނީ މަގުފަހިވެފައެވެ. ސިފައިންގެއަށް ވަނުމުގެ ފުރުޞަތު ފެބްރުއަރީމަހުގެ 15 ވަނަ ދުވަހާއި ހަމައަށް މިވަނީ ހުޅުވާލެވިފައެވެ.

ދިވެހި ސިފައިންނަކީ މުޖުތަމަޢުގެ ކުރިމަތީގައި ޝަރަފު ލިބިފައިވާ ބައެކެވެ. ސިފައިންގެ މުއައްސަސާއަކީ، ފަޚުރުވެރި ޤަދަރުވެރި މުއައްސަސާއެވެ. މިހެންވެ، ސިފައިންނަށް ސަރުކާރުން ޚާއްސަ އެކި އިނާޔަތްތައްވެސް ދެއްވައެވެ. އެގޮތުން، މާލޭގައި ޢާއިލާއަކާއި ނުލައި ދިރިއުޅޭ ސިފައިންނަށް އުޅޭނެ ތަނެއް ފޯރުކޮށްދިނުމާއި، ސިފައިންނާއި ސިފައިންގެ ޢާއިލާތަކަށް ޞިއްޙީ ފަރުވާގެ ޚަރަދު ސަރުކާރުން ދެއެވެ.

ޝައްކެވެސް ނެތެވެ. ދިވެހިންގެ ދިފާޢުގައި، ދިވެހިންނަށްޓަކައި ނިކުންނަ ބަޔަކީ ދިވެހި ސިފައިންނެވެ. ސިފައިންގެ ލަވަޔާއި އެއްގޮތަށް ފަސްގަނޑާއި، އިސްލާމް ދީނާ، ޤައުމަށްޓަކައި ރޫޙާނީ ބާރުން ނިކުންނަ ބަޔަކީ ދިވެހި ސިފައިންނެވެ. ޤައުމީ ޚިދުމަތުގައި، ޤައުމަށް ނަޞްރު ހޯދައިދިނުމަށް ޖިހާދުކޮށް ޝަހީދުވެ އެމީހުންގެ ލޭ ހަދިޔާކުރާ ބަޔަކީވެސް ދިވެހި ސިފައިންނެވެ.